[सम्झना] कदी : साले नम्बर ८६
नेपाली भाषालाई संकलन गरेर हुन्छ कि, सम्पादन/प्रकाशन गरेर हुन्छ कि, लेखकहरूलाई पुरस्कार दिएर हुन्छ कि, यस्ता अनेक तरहले नेपाली भाषाको संवद्र्धन र प्रवद्र्धनमा अहोरात्र सक्रिय सिपाही ।
कमल दीक्षित । महिना दिनअघि दिवंगत उनीबारे धेरैले धेरै कुरा लेखिसके । तैपनि, यो अनुच्छेद औपचारिक भूमिका नै भयो । केही न केही ऐतिहासिक तथ्य उद्घाटन गरेका अनुसन्धात्मक ६२ निबन्ध/प्रबन्ध पुस्तकका लेखक । सूक्तिसिन्धु, जंगबहादुरको बेलाइत यात्रा, बुइँगल, वीरचरित्रलगायत दुई दर्जन उस्तै पुस्तकका सम्पादक/भूमिका लेखक । नेपाली भाषाका दुर्लभ लेखोट तथा ३७ हजार पुस्तकका संग्रहक । ५७ वर्षदेखि निरन्तर नेपाली त्रैमासिकका संस्थापक/सम्पादक । धेरैओटा सर्वेक्षणले ‘टप फाइभ’ भनेका आमाको सपना, घामका पाइलाहरू, माधवी, शिरीषको फूल, एब्स्ट्रयाक्ट चिन्तन प्याजजस्ता पुस्तकलाई जन्मँदै चिनेर मदन पुरस्कारले प्रेरणा दिने निष्पक्ष ‘न्यायाधीश’ ।
समग्रमा भन्दा नेपाली भाषालाई संकलन गरेर हुन्छ कि, सम्पादन/प्रकाशन गरेर हुन्छ कि, लेखकहरूलाई पुरस्कार दिएर हुन्छ कि, यस्ता अनेक तरहले नेपाली भाषाको संवद्र्धन र प्रवद्र्धनमा अहोरात्र सक्रिय सिपाही । यहाँ नेपाली भाषा भन्नाले नेपालमा बोलिने सबै भाषा भनिएको होइन, केवल यो लेख लेखिएको भाषाका संरक्षक ।
दीक्षितले विसं ०१६ देखि एउटा पत्रिका निकाल्न सुरु गरे, नेपाली त्रैमासिक । अहिलेसम्म यसका २ सय २५ अंक छापिइसकेका छन् । सुरुमा तीन अंकसम्म कदीले यसमा कविता पनि छापे । बालकृष्ण समका कविता । तर, पछि उनलाई के लाग्यो भने त्यतिबेलाका सबैजसो पत्रिकामा कि कविता कि त कथा मात्रै छापिएका हुने । उनलाई अनुसन्धानमूलक लेख/निबन्ध लेखिनु/छापिनुपर्छ भन्ने लाग्यो । र, सूचनै निकाले, ‘नेपालीमा कथा र कविता छापिँदैन ।’
सूचना छापिएपछि काल्पनिक कहानी लेखनी गर्ने केही साहित्यकारहरू तर्सिए र तिनले कथा–कविता पनि छाप्न आग्रह गरे । तर, कदीको जोड के रह्यो भने, कथा–कविता छाप्ने पत्रिका धेरै छन्, नेपालीले यथार्थ सूचना र ज्ञान पस्किनुपर्छ । अनुसन्धान, अभिलेख, सम्भाषण, पर्चा–पम्प्लेट, चिट्ठी, निमन्त्रणा (पारिवारिक नै पनि) जस्ता ताथ्यिक महत्त्वका ‘जे पायो त्यही’ (जेपीटी) छाप्नुपर्छ । यसरी नेपाली साहित्यिक पत्रिकाबाट जेपीटी जर्नलमा रूपान्तरित भयो । जेपीटी किन भने यसमा कथा–कविता छापिएन मात्र होइन, कथा–कविताबाहेक जे पनि छापियो । समीक्षा, निबन्ध, यात्रा, जीवनी, संस्मरणदेखि कानुन, दर्शन, कृषि, विज्ञान जे पनि छापियो र यो भयो– इन्टरडिसिप्लिनरी जर्नल । कदीका शब्दमा हातहातै नबिक्ने छाप्नलाई मात्र छापिने नपढिने रुखो नेपालीलाई कसले विज्ञापन दिने ? विज्ञापन माग्दा पनि नपाएपछि ठूलो कुरा किन नगर्ने भनेर उनलाई जङ चल्यो । र, उनले फेरि सूचनै छापे, ‘नेपालीमा विज्ञापन लिइनेछैन ।’
कथा र कविता नछाप्ने भनेपछि उनलाई तीन महिनामा पनि ४० पृष्ठ भर्न गाह्रो भयो । तर, अहिले हेर्दा उनको निर्णय ठीक थियो । काल्पनिकीको सट्टा त्यसमा यथार्थिक–ताथ्यिक सामग्री छापिए । पेज भर्नकै लागि छापिएका हावादारी चिट्ठी र भाषणहरू त्यतिबेला कम महत्त्वका भए पनि अहिले ती पढेर हामी तत्कालीन समाज, शासन, सम्बन्ध, चिन्ता र चिन्तन पहिचान्न सक्छौँ । दाइ जंगबहादुर राणाले आफ्ना भाइ कायममुकायम प्रधानमन्त्री बमबहादुरलाई बेलायतबाट लेखेको चिट्ठी नेपालीमै छापिएको छ । राजा त्रिभुवनका पिता पृथ्वीले चन्द्रशमशेरलाई ‘माइ डियरेस्ट महाराजा मामा’ सम्बोधन गरी नेपालीमा लेखेको चिट्ठी पनि नेपालीमै छ । १९९७ सालमा जेलमा सँगै बसेका पुष्करनाथ पन्त (डोटी)लाई जिउँदो सहिद रामहरि शर्माले लेखेको पारिवारिक चिट्ठी पनि कम महत्वको छैन । सत्ताबाट हट्दा जुद्धशमशेरले ००२ मा दिएको अन्तिम शासकीय भाषण पनि नेपालीमै पढ्न पाइन्छ । कथा र कविताभन्दा यस्ता अभिलेखीय सामग्री छाप्ने नेपालीको योगदान नेपालीमा शारदा र रूपरेखाभन्दा कम छैन ।
कदीले भनेथे, ‘मेरा किताब कसैले पढ्दैन किनकि ती कुनै कथा, उपन्यास होइनन् । किताब नै लेख्छु भनेर मैले एकैचोटि लेखेको पनि हैन । फुटकर रूपमा लेख्तै–छाप्तै गरेर पछि संकलन गरिएका हुन् ।’ कदीको यो भनाइले धेरै संकेत गर्छ । साहित्यकार परिचय कोश पुस्तक निकाल्दा पाँच हजार पृष्ठले पनि नपुग्ने देशमा साहित्यिक/ऐतिहासिक अनुसन्धानात्मक लेखनीले पाँच जना पाठक पाउन पनि मुस्किल हुनुले हाम्रो जग कति गहिरो र त्यसमाथि उठेको घर कति दरिलो छ भन्ने बोल्छ ।
हामी कदीलाई उनले लेखेका भन्दा सम्पादन गरेका र भूमिका लेखेका पुस्तकबाट बढी चिन्छौँ । घुम्ने मेचमाथि अन्धो मान्छेमा भूपी शैलीमै उनले लेखेको भूमिका होओस् या सेतो बाघमा । सेतो बाघको भूमिकाका कारण त दरबारमा टिप्पणी नै उठेछ, साझा प्रकाशन सरकारी अनि त्यहीँबाट सरकारविरोधी पुस्तक छापियो भनेर । कदीले बडो चलाखीसाथ लेखेको भूमिकाका कारण उनी जोगिए । गोर्खा भाषा प्रकाशिनी समितिको उत्तराधिकारी साझाका पहिलो अध्यक्ष उनले भूमिका लेख्दै पुस्तक छाप्दै गरे त्यहाँबाट । ‘लाइब्रेरी भ्यालु’का पुस्तक आफ्नो जगदम्बाबाट र ‘मार्केट भ्यालु’ भएका पुस्तक साझा प्रकाशनबाट छापे । निजी संस्थाभन्दा सार्वजनिक संस्थालाई बढी दरिलो र भरिलो बनाउनुपर्छ भन्ने ठानेको देखिन्छ उनले । चिन्दै नचिनेका, भेट्दै नभेटेका लेखक रणशूर लिम्बूको बर्माको सम्झना (०१८), लीलबहादुर क्षत्रीको बसाइँ (०१४) उनैले साझा नजन्मिँदै छापिदिए जगदम्बाबाट ।
गोरखापत्रको पहिलो अंक ‘नेपाल सम्वत् १९५८ मिति ज्येष्टवदी ३ सोमबार’ (१९५८ वैशाख २४) निस्केको भनेर कदीले नै पत्ता लगाएका हुन् । त्यसभन्दा अघि वैशाख १ गते वर्ष फेथ्र्याे गोरखापत्र । गोरखापत्रबारे उनका कागतीको सिरप (०२६), चार कन्था (०५३), शाखासन्तान (०६१) पुस्तक विशेष
पठनीय छन् ।
अहिलेको विशाल पुस्तकालय र सम्मोहनकारी पुरस्कारको रचनागर्भ पनि कम्ती रोचक छैन । दरबार स्कुलमा पढ्दा कदी दिनको आठ पैसा खाजा खर्च पाउँथे । त्यही पैसा जम्मा गरेर उनले पुस्तक किन्न थाले । ‘ कमलको नेपाली संग्रह’ भनेर रबर स्ट्याम्प नै बनाए । असनमा रहेको मानदास (चित्तधर) मानन्धरको पुस्तक पसलबाट उनले बढी किताब बटुले । भनेका छन्, ‘पुस्तकालयमा ल्याएर राख्नलाई मैले धेरै लेखोट चोरेको, मागेको, पैँचो लिएको र नफर्काएको पनि छु ।’
च्वाँचे/चण्डालमणि (जर्नेलले उनलाई दिएको नाउँ)ले पुरस्कारका लागि गरेको चलाखी पनि कम्ती रमाइलो छैन । केटौले जोसका उनले आफ्नो १० हजार रुपियाँ हालेर आफ्नी आमाका नाममा ‘विद्यादेवी नेपाली निबन्ध प्रतियोगिता’ आयोजना गरे । जित्नेलाई १ सय २० रुपियाँ दिइने भयो तर एकैपटक होइन, प्रत्येक महिनामा १०/१० रुपियाँ गरेर १२ महिनामा दिइसक्ने । कदीकै शब्दमा ‘सम्पादक बाजे’ प्रेमलाल पौडेलले गोरखापत्रमा पहिलो पृष्ठमा समाचार मात्र छापिदिएनन्, सम्पादकीयसमेत लेखेर प्रशंसा गरिदिए । कदीका बाबुले जगदम्बालाई गोरखापत्र देखाएर, ‘नजर होओस् त, यस्तो फुच्चेको यत्रो तारिफ ! रानीसाहेबले नै केही गरिबक्से झन् कत्रो तारिफ होला !’ भनेर उक्साएको परिणाम नै आज हाम्रा धेरै लेखकको ८ हजार ८ सय ४८ मिटरको गन्तव्य–उचाइ अर्थात् अन्तिम इच्छा भइदिएको छ, मदन पुरस्कार ।
नेपाल राजकीय प्रज्ञा–प्रतिष्ठान स्थापना र कमलमणि संस्थाकरण भएको लगभग सँगसँगैजस्तो हो । अलिकताले मदन पुरस्कार/पुस्तकालय जुम्ल्याहा जेठो/जेठी हो । दुवै संस्थाको क्षेत्र उही भाषा–साहित्य । आज कमलादी कहाँ छ र कमल–दी कहाँ ? प्राज्ञिकता र विश्वसनीयतामा कमलादीको ओरालो यात्रा र कमल–दीको विस्तारित, व्यवस्थित, संगठित र उल्लेखनीय उकालो यात्राबारे बिनापूर्वाग्रह विवेचना किन गर्दैनौँ हामी ? हाम्रो तिरोबाट बाँडिने/चल्ने कमलादीका भागबन्डे पद, पुरस्कार, पुस्तकालय, प्रकाशन, प्राज्ञको गरिमा कस्तो छ ? पाँच लाखको पृथ्वी प्रज्ञा पुरस्कार र दुई लाखको मदन पुरस्कार दुवै पाएका क्रान्तिकारीदेखि मण्डले लेखकसम्मले पनि ‘तपाईंले पाउनुभएको ठूलो पुरस्कार ?’ भनेर सोध्दा मदन पुरस्कार नै भन्छन्, पृथ्वी प्रज्ञा पुरस्कारको नाम लिँदैनन् । किन ?
मैले कदीलाई सोधेथेँ, ‘मदन पुरस्कार पुस्तकालयमा पहिले ज–जसले आफ्ना किताब दिए, अहिले उनीहरूले नै हेर्नसमेत पाउँदैनन् रे ! जो–कोहीलाई सहज पहुँच छैन, किन ?’ उनले भनेका थिए, ‘मदन हाम्रो पुस्तकालयभन्दा बढी अभिलेखालय हो । राष्ट्रिय पुस्तकालय, केशर पुस्तकालय, राष्ट्रिय अभिलेखालय, प्रज्ञा पुस्तकालय, त्रिवि पुस्तकालय व्यवस्थित नभएरै हामीलाई बढी व्यवस्थित हुनुपरेको हो । कत्रो महत्त्वका, संसारभरि नै एक प्रति मात्रै भएका लेखोटलाई पीपलबोटमा बसेर पत्रिका पढेजस्तो सजिलो बनाइदियो भने कति दिन जोगिन्छ ?’
हुन पनि हो, हाम्रा धेरै पुस्तकालय बोरामा छन् अझै । हामीलाई थाहै छ, केशर पुस्तकालयबाटै कति पुस्तक हराए ? त्रिवि पुस्तकालयका कति किताब प्राध्यापकले पचाए ? संसद् पुस्तकालयका कति पुस्तक सांसद–कर्मचारीले झ्याप पारे ? यहाँ कतै नपाइने अभिलेख अमेरिका र युरोपका पुस्तकालयमा कसरी पुगे ? हाम्रा सन्धि, अभिलेख र पत्रको सक्कल कपी खोज्न अमेरिका–युरोपका पुस्तकालय धाउनुपर्ने कति लाजमर्दाे बेवास्ता/व्यवस्था छ हामीसँग !
अब अलिकति आफ्नो कुरा । त्रिचन्द्र कलेजमा पढ्दा विभागबाट वार्षिक रूपमा प्रकाशन हुने आकुञ्चनको सम्पादन गर्ने मौका जुरेको थियो मलाई । खै, मेरो खप्परमा के–के अन्टसन्ट फुर्छ बेलाबेला । मैले पाँच जना ज्येष्ठ–श्रेष्ठ विधानायक छानेँ र घरघरै पुगेर अन्तर्वार्ता गरेँ । आवरणमा छापियो– उपन्यासशमशेर राणा, कविताप्रसाद घिमिरे, नाटकबहादुर मल्ल ‘गोठाले’, निबन्धचन्द्रसिंह प्रधान र साहित्यिकसंस्थामणि दीक्षितसितका निवार्ता । अब यीमध्येका एक मात्र जीवित छन् र सबैभन्दा कान्छा पात्र थिए, कदी ।
कदीको हास्यचेत पनि तीक्ष्ण थियो । अनुसन्धानजस्तो रुखो विषयलाई कसरी पढूँपढूँ बनाउने भन्ने प्रश्नको जवाफ पनि कदी नै हुन् । उनी ०१५ मा धनकुटा गएका थिए । त्यहाँ उनलाई सोधियो, ‘कुन साले पर्नुभो तपाईं ?’ कदी अकमक्क परे । अनुहार हेर्दा र सोधाइको लबज सुन्दा बडो विनम्रता झल्किन्छ तर पहिलो भेटमै ‘कुन साले’ भन्छ यार ! कदीलाई हुनुसम्म तनाव भो !
कुरो बुझेपछि उनले भने, ‘म ८६ साले, साले नम्बर ८६ । अनि, हजुरचाहिँ फेरि कुन साले पर्नुभो नि ?’
सम्बन्धित
भोको बिहान बोकेर, सँधै सँधै उदाइरहने, मेरा हत्केलाका ठेलाहरू हेर, लेख्न सक्छौ तिमी, मेरा अ...
पोस्टमार्टम स्थलबाट सूर्यबहादुर तामाङको आग्रह
जुत्ताको तलुवामुनि, सदियौँदेखि कुल्चिएका छौ तिमीले - मेरो अस्तित्व । (कविता)...
म निसास्सिइरहेको छु
मैले तिमीलाई गाउँ गाउँ अनि दलित, गरिबका बस्ती बस्तीमा आउ भनेको थिएँ । तर तिमी त सहर-बजारका...
गणतन्त्र
गाउँभरि युवाहरूको अभावमा खेत बाँझो देख्न नसकी, घरका हल गोरुसँगै, आफ्नो पनि हत्या गर्ने वृद...
एक बौद्धिकलाई प्रश्न
मेरो अन्त्यको अर्थहीन विलम्बबीच म सोचमग्न छु- अविलम्ब जागृत हुनुपर्ने मानिस कहाँ छ ? (कवित...
सृष्टिमा अन्तिम सेतो जिराफ
सत्तालाई सबैभन्दा बढी झोँक चल्छ, जब चिच्चाउन थाल्छ कोही नाङ्गो मानिस... ...