सहरमा ठूलै रोग आएको छ रे !

तर कति ठूलो

त्यो मैले अझै जानेको छैन ।

हो,

मैले अझै जानेको छैन –

खोकी लाग्‍नु/रुघा चल्नु/ज्वरो बढ्नु

यो कहिलेदेखि रोगको सूची बन्यो ?

तिमी नै भन,

‘सास फेर्न गाह्रो हुनु’ कुनै रोग हो भने

सासै फेर्न नपाउनु के हो त ?

एकाएक जब पाइरहेको काम बन्द भयो

एकाएक जब खाइरहेको माम बन्द भयो

तब मात्रै मलाई थाहा भयो

रोग साँच्चै ठूलो आएको रहेछ !

आउँदा आउँदै जब हावाको शितल झोंका बन्द भयो

आउँदा आउँदै जब आफ्नै देशको ढोका बन्द भयो

हो, तब मात्रै मलाई थाहा भयो

रोग साँच्चै ठूलो रहेछ !

सायद ठूलै भएर होला

रोग अर्कालाई लागेको भए पनि

औषधी खान म बाध्य भएको छु,

मरेको कुनै अर्कै भए पनि

घाट जान म बाध्य भएको छु ।

हो,

धनीहरूलाई रोग लाग्दा

गरिबहरू कसरी थला पर्छन्

त्यो आज मलाई थाहा भयो,

धनीहरूले खान नपाए

गरिबहरू कसरी भोका पर्छन्

त्यो आज मलाई थाहा भयो ।

त्यसैले मलाई शंका छ –

लकडाउन त भोलि खुल्छ होला

तर लकडाउन खुलेर पनि

देश खुलेन भने के होला ?

आज रोगबाट बच्‍न

बाक्लो मास्क लगाइरहेका हाम्रा शासकहरूले

भोलि लाजबाट बच्‍न

मास्क फुकाउनै मिलेन भने के होला ?