[स्मरण] ‘पढेलेखेको मान्छे प्रहरीमा ?’
त्यति बेला प्रहरी सेवातर्फ प्रवेश गर्न शारीरिक व्यायाम, लिखित परीक्षा आदि केही दिनु पर्दैनथ्यो ।
उच्च शिक्षा अध्ययन गर्नेहरू डाक्टर–इन्जिनियर बन्थे । त्यो नभए प्राध्यापन तथा निजामती सेवातर्फ लाग्थे । पढेलेखेकाहरूका निम्ति तिनै क्षेत्र पहिलो रोजाइमा पर्थे । तर, सामान्य अध्ययन र अध्ययनमा असफलता बेहोरिरहेका मानिसहरूका लागि भने प्रहरी र राजनीति उपयुक्त क्षेत्र मानिन्थ्यो । समाजमा यो मान्यताले जरा गाडेर बसेको थियो ।
नेपाली कांग्रेसको क्रान्तिकारी रोमाञ्चकतामा लागेर पढाइलाई बीचैमा छोडी राणा शाही समाप्त गर्ने सशस्त्र संघर्षमा होमिनेमध्येमा म पनि एक थिएँ । हजुरबुबाको हतियार चोरेर मुक्ति सेनामा आबद्ध भइरहँदा बेग्लै रोमाञ्चकता थियो । तर, जब दिल्ली सम्झौतापछिको संयुक्त सरकार बन्यो, हामीलाई एउटा ठूलै झट्का महसुस भयो । राजनीतिक पार्टीको पछि लागेर मुलुक परिवर्तनको दिशातर्फ लाग्ने हाम्रो क्रान्तिकारी सपना बीचमै तुहिएजस्तो भयो । र, झन्डै तीन महिना जेल बसेपछि त त्यो क्रान्तिकारी रोमाञ्चकता पनि हराएर गयो । त्यसपछि त आफ्नो भविष्य नै अन्धकार देखिन थाल्यो ।
जेलबाट छुटेर घर फर्किंदा पिताजीको पहिलो फट्कार थियो, ‘सकियो क्रान्तिकारी रोमाञ्चकता ! अब पढाइतिर लाग् र भविष्य सुधार् ।’ आखिर सत्य पनि त्यही थियो । तर, मुखले कुनै जवाफ फर्काइनँ । बीएस्सी पढ्दापढ्दै टुटेको पढाइलाई निरन्तरता दिन नसकेपछि बीएमा भर्ना भएँ र नयाँ सिराबाट पढाइलाई अघि बढाएँ । एमएको पढाइ पूरा गरिसक्दा नसक्दै पाँच वर्ष बितेको पत्तै भएन ।
यसरी मुक्ति सेनाको रोमाञ्चकताबाट बाहिर निस्किएर एमएको पढाइ सकेर काठमाडौँ आएको थिएँ । ठमेल–११ का तर्फबाट फुटबल खेल्दै समय बिताइरहेको थिएँ । यत्तिकैमा एक दिन लोकसेवा आयोगले राजपत्रांकित सेवातर्फ केही प्रहरी इन्स्पेक्टर आवश्यक रहेको विज्ञापन गोरखापत्रमा प्रकाशित गरेको रहेछ । नजिकको साथीले जानकारी दिएपछि मैले पनि त्यसमा भाग लिने निर्णय गरेँ ।
विसं ०१२ मा ऐन निर्माण गरी प्रहरी सेवालाई पुन:गठन गर्ने काम भयो । त्यसअघि प्रहरी सेवा करारमा चल्थ्यो । एक–एक वर्षमा म्याद थप्दै अस्थायी ढंगले अगाडि बढिरहेको स्थिति थियो । ऐन बनेर वैधानिक अस्तित्व प्रदान गरिएपछि प्रहरी सेवा व्यवस्थित बन्न पुग्यो । ०१५ मा नियमावली बनेपछि त सरकारको एउटा अभिन्न अंगकै रूपमा यसको विकास हुन पुगेको थियो ।
तर, ०१३ मा इन्स्पेक्टर पदका लागि अन्तर्वार्ता दिइरहँदा मैले धेरै कुरा सोचेकै थिइनँ । थाहा पनि थिएन । मुक्तिसेनाका हस्तीहरू जीबी याकथुम्बा, पूर्णसिंह खवास, दिलमानसिंह थापाजस्ता व्यक्तिहरूले सुसज्जित यो संस्था केही गरौँ भन्नेहरूका लागि अवश्य पनि सुन्दर फूलबारी होला भन्ठानेर एकाएक अन्तर्वार्ताका लागि तयार भएको थिएँ । सैनिक पृष्ठभूमिको परिवारमा जन्मेहुर्केको हुनाले पनि मेरो रगतमा त्यो जुनुन कतै सवार थियो कि, जसले मलाई सुरक्षा क्षेत्रमै जान प्रेरित गरिरहेको थियो ।
त्यति बेला प्रहरी सेवातर्फ प्रवेश गर्न शारीरिक व्यायाम, लिखित परीक्षा आदि केही दिनु पर्दैनथ्यो । खालि लोकसेवा आयोगले मौखिक अन्तर्वार्ता लिन्थ्यो र उत्तीर्ण भएपछि प्रहरी सेवामा प्रवेश पाइन्थ्यो । म पनि सोही प्रक्रिया पूरा गरेर प्रहरी सेवामा प्रवेश गरेको हुँ ।
अन्तर्वार्ता दिन जाँदा तीन जना लहरै बसेका थिए । नरेन्द्रमणि आचार्य दीक्षितले मलाई सोधेको पहिलो प्रश्न थियो, ‘पोस्टग्य्राजुएसन (एमए) गरेर पनि प्रहरी सेवामा आउने सोच कसरी पलायो ?’ त्यसको तयारी जवाफ मसँग केही थिएन । अनायासै मेरो मुखबाट फुत्किएको थियो, ‘पढेलेखेका मानिसहरूले प्रहरीमा जागिर खानु हुँदैन र ?’ मेरो यो जवाफपछि तीनै जनाले मुखामुख गरे र ‘एमए पढेको मान्छे दुई सय रुपियाँ तलबमा के टिक्ला र ?’ भन्दै कानेखुसी गरेको मधुरो स्वर मेरा कानसम्म पनि ठोक्किन आइपुग्यो । अन्य सामान्य प्रश्नको जवाफ मैले सामान्य ढंगले नै दिएँ ।
एक सातापछि थाहा भयो, म अन्तर्वार्ताबाट छनोट भएछु । तर, नरेन्द्रमणि आचार्य दीक्षितले सोधेको प्रश्नले मलाई लामो समयसम्म पछ् याइरह्यो । मेरो पिताजीले पनि भन्नुभयो, ‘प्रहरीमा तँ के टिक्न सक्छस् र † केही दिनको पाहुना त होलास् ।’ इन्स्पेक्टरको नियुक्ति बुझेर पहिलोपटक तत्कालीन प्रहरी महानिरीक्षकको कार्यालयमा प्रवेश गर्दा पनि मैले सामना गर्नुपरेको पहिलो प्रश्न त्यही थियो । तत्कालीन डीआईजी दिलमानसिंह थापाले त मुखै फोरेर भनेका थिए, ‘यत्रो पढेलेखेको मानिस पनि के प्रहरीमा जागिर खान आएको ? पहिले नै भनेको भए अन्यत्र भनिदिन्थेँ नि !’
प्रहरी प्रशासन भनेको डन्डाको भरमा चल्ने निकाय हो, त्यसमा शिक्षित र पढेलेखेका मानिस जरुरी नै हुँदैन भन्ने मान्यता जबर्जस्त रूपमा थियो त्यतिबेला । जसको सामना पलपलमा गरिरहनुपथ्र्यो । मैले प्रहरी सेवामा प्रवेश गरेर आफ्नो क्षमता प्रदर्शन गर्ने भरपूर अवसर पाएँ । मेरो अध्ययनले त्यो सेवालाई कति सहयोग मिल्यो, त्यो त म भन्न सक्दिनँ । तर, मलाई भने त्यही पढाइका कारण त्यहाँ बसेर काम गर्दा ठूलठूला चुनौती र अवसरको सामना गर्न सहयोग पुर्यायो र असफलताबाट बचाउन मद्दत गर्यो ।
प्रस्तुति : ईश्वरी ज्ञवाली
सम्बन्धित
कम्युनिस्ट पार्टीको गुपचुप गतिविधि गरिरहेका नरबहादुर कम्मर र छाती दुवैतिर जापानी, भारु, ने...
थैले काण्डमा पक्राउ पुर्जी
नारदमुनि स्वयंले अंग्रेजी पढाउँथे । ब्रिटिस फौजको जमदार भएका र त्यति धेरै नपढेका उनले हाम...
नारदमुनि थुलुङको सम्झना
हुन त कतिपयले ममा भारतीय कलाकार मकबुल फिदा हुसैनको प्रभाव परेको भन्ठान्छन् । तर भक्तपुरमा ...
यस कारण घोडाचित्र
राजा वीरेन्द्रले आफ्ना निजी सचिव चेतबहादुर कुँवरमार्फत ६० हजार रुपैयाँ पठाइदिए । त्यही पै...
राजाले दिएको टिकटमा अमेरिका
सरकारी स्वामित्वको अखबार भएको हुँदा व्यवस्थाको विरोध गरेर गोरखापत्रमा व्यंग्यचित्र बनाउन प...
अखबारमा कार्टुनकारिता
जापानको फुकुओका आर्ट म्युजियममा पहिलोपल्ट आयोजित एसियाली कला प्रदर्शनीमा दस अवतार सिर्जना ...