[सम्पादकीय] जनता मार्न खोज्ने विकासको डोजर
विवाद समाधान गर्नु साटो फरक विचार राख्नेहरूमाथि नै स्काभेटर लगाउने जुन हर्कत त्यहाँ देखियो, यसले सोच्नैपर्ने बनाएको छ– हामी कस्तो विकास गर्न खोजिरहेका छौँ ?
कात्तिक पहिलो साता बैतडीको दशरथचन्द नगरपालिकामा जे भयो, त्यो विकासका नाममा कसरी सर्वसाधारणको आवाज बन्द गरिन्छ भन्ने झल्को मात्र हो । विकास निर्माणका क्रममा स्थानीयबीच फरक मत आउनु र त्यसमा विवाद देखिनु सामान्य हो । तर विवाद समाधान गर्नु साटो फरक विचार राख्नेहरूमाथि नै स्काभेटर लगाउने जुन हर्कत त्यहाँ देखियो, यसले सोच्नैपर्ने बनाएको छ– हामी कस्तो विकास गर्न खोजिरहेका छौँ ?
बाटो खन्न अवरोध गर्न खोज्नेहरूको माग ठूलो थिएन । उनीहरूको भनाइ थियो, ‘केही समय दिनुस्, अहिले सडक नखन्नुस् ।’ तर बाटो बनाउने हतारोमा रहेको निर्माण समिति पर्खिने पक्षमा देखिएन । र, जे भयो– त्यो सबैलाई थाहा छ । नगरपालिकाको वडा–९ ग्वाल्लेक, अयरखालीमा स्काभेटरले हान्दा घाइते स्थानीय गौरा जोशी अस्पतालमा गम्भीर अवस्थामा उपचार गराइरहेकी छन् । धन्न ! मानिससँग स्मार्ट फोन छ र उक्त बर्बर घटनाको भिडियो खिचे र सोसल मिडियामा राखे, जसले पूरै देशलाई सिरिंग बनायो । नभए यस्ता कति घटनाबारे देश बेखबर रहँदो हो ?
विकास निर्माण गर्नुपर्छ भन्नेमा सन्देह रहेन । मानिसको जीवन समृद्ध बनाउन सडक, पुलपुलेसा सबै थोक बनाउनुपर्छ । तर जसका निम्ति विकास गर्न खोजिएको हो, उसैमाथि जबर्जस्ती स्काभेटर चलाएर कस्तो विकास थोपरिरहेका छौँ हामी ? अब घोत्लिनुपर्ने समय आएको छ । बिनायोजना जबर्जस्ती थोपरिएको विकासले केही मानिसको धन्दा त चल्ला तर आम नागरिकको जीवन सहज हुने गरी दिगो विकास गर्न सक्दैन । यस खाले निर्माणले एकातिर प्राकृतिक विनाश त गर्छ नै, अर्कोतर्फ सर्वसाधारणमा झन् असन्तुष्टि र निराशा बढाउँछ ।
फरक मतको सम्मान गरेर र चित्त बुझ्ने गरी सम्बोधन भए मात्र लोकतन्त्र उन्नत बन्न सक्छ । तर बैतडी घटनामा सर्वसाधारणको कुनै हैसियत नै नभएजस्तो व्यवहार देखियो । उनीहरूका आवाजको कुनै अर्थ नभएजस्तो गरी बर्बर व्यवहार भयो ।
नेपाल म्यागजिनले गत साता गरेको ‘राउन्ड टेबल’ मा पनि वक्ताहरूको एक मत थियो, ‘राजनीति सबै खालका अपराधको केन्द्रबिन्दु बन्यो ।’ बैतडीको डोजरकाण्डमा पनि सत्तारुढ नेकपाकै स्थानीय नेताहरू जोडिएको खुलेको छ । स्थानीय नेताहरूसँग ठेकेदारको अन्तरसम्बन्ध नयाँ कुरा होइन । तर स्थानीयमाथि यो स्तरमा गरिएको बर्बर दमनले कसरी यो ‘नेक्सस’ विकासका नाममा नागरिकविरोधी हर्कत गर्न पनि हिचकिचाउँदैन भन्ने देखाएको छ ।
विकासका नाममा प्राकृतिक स्रोत–साधन दोहन गरी सीमित व्यक्तिलाई धनी बनाउने धन्दा तब मात्र अन्त्य हुन सक्छ, जब हामी स्थानीय आवश्यकता के–के हुन् भनेर थाहा पाउँछौँ । त्यो काम हरेक स्थानीय तहको हो । विडम्बना, नागरिकको लामो संघर्षपछि गाउँ पुगेका यी ‘सिंहदरबार’ मा पनि माथि भनेजस्तै दोहन धन्दा गर्नेहरूकै बोलवाला छ । विकासका नाममा आफ्नो गाउँठाउँ आसपास के भइरहेको छ भन्नेमा चाहिँ नागरिक सचेत हुनैपर्ने भएको छ । यति मात्र हुन सक्यो भने पनि नागरिकले आफ्नो आवश्यकताविपरीत केही भए प्रश्न उठाउन सक्नेछन् ।
यो पनि पढ्नुस्ः जनतामाथि चलाइएको विकासको डोजर
सम्बन्धित
स्वदेशभित्र औपचारिक क्षेत्रभित्र काम गर्ने कर्मचारीहरूदेखि सडकका व्यापार र मजदुरका कुरा, र...
रोगभन्दा भयानक बन्दै छ रोजगारी संकट [सम्पादकीय टिप्पणी]
समय छँदै देखाइने अग्रसरता यही स्तरमा कायम रहे हामी सम्भवत: यो विश्वव्याधि छल्न सफल राष्ट्र...
स्वास्थ्य संकटकाल : मिलेर सामना गरौँ [विशेष सम्पादकीय]
यो संकटोन्मुख घडीमा गर्न सकिने न्यूनतम जिम्मेवारी पनि पूरा नगर्दा आज फेरि एक पटक राज्यका न...
कोरोना सन्त्रासबीच अभिभावक-राज्यको खोजी
संकटको मौका छोपेर उपभोक्ता लुट्ने कार्य सर्वथा निन्दनीय छ । उनीहरूमाथि सरकारले तत्काल कार...
कोरोनाको नाममा कालाबजारियाको संक्रमण
निश्चित व्यक्तिको इच्छापूर्तिका लागि सिंगो प्रक्रिया बन्धक बनाउने कृत्य अब रोकिनुपर्छ ।...
प्रधानमन्त्रीले सरकारको बदनाम गरे, नेकपा सचिवालयले आफ्नै पार्टीको
भ्रष्टाचार आफू पनि नगर्ने, अरूलाई पनि गर्न नदिने प्रधानमन्त्री ओलीको प्रतिबद्धताको वास्तवि...