कलात्मक शैलीको सरुवा
दक्षिण अमेरिकीले हराएको लय युरोपतिर
र
प्रत्येक प्रतियोगितामा बलियो मानिन्छ जर्मन टिम । उसको खेल पनि जबरजस्त हुन्छ । कुनै पनि टिमलाई जर्मनी भारी पर्न सक्छ । दशकअघिसम्म उसले लामो पास खेल्दै गोलपोस्टमा आक्रमण गर्ने ट्याक्टिस अपनाएको थियो । तर, युरो २०१६ को समूह चरणमा उत्तरी आयरल्यान्डविरुद्ध जर्मन टिमको खेल हेर्ने हो भने त्यस्तो लाग्दैन ।
पेरिसमा भएको खेलमा जर्मनीले उत्तरी आयरल्यान्डलाई १–० ले हरायो । उत्तरी आयरल्यान्ड कति भाग्यमानी टिम हो भन्ने त्यस खेलले देखाएको थियो । त्यसमा कम गोल अन्तरले हारेकाले नै उत्तरी आयरल्यान्डले नकआउट चरणमा प्रवेश पाएको हो । खेलमा उसका खेलाडीले आक्रमण गर्ने त के बल छुने अवसर पनि कमै मात्र पाएका थिए । जर्मन टिमका गोलकिपर म्यानुएल नोय गोलपोस्टअगाडि थिए, बाँकी १० खेलाडी आक्रमणका लागि अनुकूलता हेर्दै उत्तरी आयरल्यान्डको क्षेत्रमा एकअर्कालाई बल पास दिइरहेका थिए ।
जर्मन मिडफिल्डर टोनी क्रुज र मेसुट ओजिलले जति पास दिए, उत्तरी आयरल्यान्डको पूरा टिमले पनि त्यतिपल्ट बल पास गर्न सकेको थिएन । भलै एक गोल मात्र गरे पनि जर्मन टिमले दर्जनभन्दा बढी अवसर सिर्जना गरेको थियो । उसले यति लोभलाग्दो खेल पस्किएको थियो कि डिफेन्डिङ च्याम्पियन स्पेनलाई पनि बिर्साउने खालको थियो ।
जसरी भए पनि खेल जित्ने परम्परागत रणनीतिलाई पहिलोपल्ट जोचिम लोले सुन्दर फुटबलमा रूपान्तरण गरेका हुन् । ‘नतिजा हाम्रै पक्षमा हुन्छ भनेर ग्यारेन्टी गर्दैनौँ तर हामी सुन्दर खेल खेल्नेछौँ,’ यसपल्ट सुरुआती दुई खेलमा गतिलो प्रदर्शन गर्न नसक्दा आलोचित जर्मन टिमका आक्रामक मिडफिल्डर थोमस मुलरले भनेका थिए ।
अर्को कुरा, जर्मनीले दुई वर्षअघि भएको विश्वकप फुटबलको सेमिफाइनलमा ब्राजिलमाथि ७–१ को अविश्वसनीय जित निकालेको थियो । सर्वाधिक पाँचपल्ट विश्वकप जितेको टिममाथि यति ठूलो जित कल्पनाबाहिरको नतिजा थियो । ब्राजिलमै भएको त्यस विश्वकप जितेयता जर्मनीलाई उस्तै खेललाई निरन्तरता दिने दबाब छ । तर, उक्त खेल एक जुगमा एकपल्ट हुने किसिमको थियो । त्यस नतिजाले ब्राजिली फुटबललाई भने ध्वस्त बनाइदियो ।
खासमा ब्राजिल उत्कृष्ट फुटबलका लागि चिनिएको देश हो । ‘अरू टिमले फुटबल खेल्छ, ब्राजिलले त्यही खेलभित्र कला देखाउँछ’ भन्ने गरिन्छ । तर, ब्राजिली फुटबलले यही सौन्दर्य गुमाएको छ । सन् १९९४ को विश्वकप विजेता कप्तान डुंगालाई जब प्रशिक्षकको जिम्मेवारी दिइयो, तब ब्राजिलले कलात्मक फुटबलको लय गुमाउन थालेको थियो । डुंगाको रणनीति जसरी भए पनि खेल जित्ने हो । यसका लागि उनले काउन्टर अट्याकको शैली अँगाले । त्यसले ब्राजिल जुन शैलीको फुटबलका लागि चिनिन्थ्यो, त्यो रहेन । सँगसँगै नतिजा झन् खराब बन्दै गयो ।
विश्वकप २०१० को क्वाटरफाइनलमा नेदरल्यान्ड्ससँग हारेपछि मानो मेनेजेजले ब्राजिली टिम सम्हाले । उनले पनि ब्राजिलको छविलाई फर्काउन सकेनन् । फेरि लुइज फिलिप स्कोलारीलाई जिम्मा दिइयो । उनको नेतृत्वमा रोनाल्डो, रिभाल्डो, रोनाल्डिन्हो, काफु, रोबर्टो कोर्लोससहितको ब्राजिली टिमले उत्कृष्ट खेल पस्कदै विश्वकप २००२ को उपाधि जितेको थियो । जिको, सोक्रेटसको सुन्दर खेलसँग अझै उनीहरूलाई तुलना गर्न मिल्दैन । तर, सेमिफाइनलमा जर्मनीसँगको हार स्कोलारीलाई करिअरको कालो धब्बा बन्यो ।
फेरि डुंगाले मौका पाए । उनको दर्शन त्यही थियो । तर, त्यसले कोपा अमेरिका शतवार्षिकीमा काम गरेन । तीन दशकपछि ब्राजिल समूह चरणबाटै बिदा भयो र सँगै डुंगा पनि । अहिले लियोनार्दो बाछलाई ल्याएको छ । विश्वकप २०१८ मा छनोट र सुन्दर फुटबल फर्काउनु नै उनका मुख्य चुनौती हुन् ।
युरोपेली जित र धनका लागि जबरजस्त फुटबल खेल्छन् भने दक्षिण अमेरिकी सन्तुष्टि र सफलताका लागि मनदेखि खेल्छन् । त्यसैले दक्षिण अमेरिकी फुटबल मन लोभ्याउने खालको हुन्छ । तर, ब्राजिल ओरालो लागेसँगै दक्षिण अमेरिकाले कलात्मक खेल छाड्दै गएको छ ।
उरुग्वे पहिलेजस्तो बलियो रहेन । अर्जेन्टिनाको खेल पनि पहिलेजस्तै आँखामा बस्ने खालको हुन छाडेको छ । तर, चिली, कोलम्बिया, उत्तर अमेरिकी टिम मेक्सिकोका खेलमा भने उत्कृष्ट फुटबल शैली कायमै छ ।
युरोपेली टिमले पछिल्ला पाँचमध्ये चार विश्वकप जितेको छ । विश्वकपको उपाधिमा युरोपले दक्षिण अमेरिकामाथि ११–९ को अग्रता लियो । यससँगै उसले कलात्मक खेललाई पनि युरोप सारेको छ । ब्राजिलमा सन् १९५० का बेला खेलिने टोटल फुटबललाई राइनस मिचेलले सन् १९६५ मा डच क्लब आयक्समा सुरु गरे । यो रणनीतिमा सबै खेलाडी डिफेन्स र आक्रमणमा खट्छन् । यसैमा अभ्यस्त नेदरल्यान्ड्स १९७४ र १९७८ को विश्वकपमा फाइनल पुगेको थियो । त्यसबेलाका मुख्य खेलाडी योहान क्रुफले टोटल फुटबललाई बार्सिलोनामा सारे । १९८८–१९९६ मा क्याम्पनुमा रहँदा उनले बार्सिलोनालाई युरोपकै सफल टिम बनाएका थिए ।
टोटल फुटबललाई नै परिमार्जित गर्दै पेप ग्वार्डिओलाले टिकी–टाका ल्याएका थिए । यसमा बार्सिलोना खुबै सफल भयो । त्यसलाई टपक्क टिपेको स्पेन पनि विश्वकप २०१० र युरोपियन च्याम्पियनसिप (२००८ र २०१२) मा च्याम्पियन भयो । टोटल फुटबल वास्तवमै आँखा नबिझाउने किसिमको हुन्छ । आक्रामक फुटबल र टोटल फुटबललाई एउटै तराजुमा राख्न भने मिल्दैन । डिएगो सिमोनीले एट्लेटिको म्याड्रिडमा भित्र्याएको काउन्टर अट्याकको शैली पनि आकर्षक छ तर टोटल फुटबलजति लोभलाग्दो भने छैन ।
युरोपेली लिग धनाढ्यहरूको खेल हो । यसले दक्षिण अमेरिकीलगायत अरू क्षेत्रका उत्कृष्ट खेलाडीहरूलाई आकर्षित गर्छ । डिएगो म्याराडोना, रोनाल्डो, रोनाल्डिन्हो, लियोनल मेसीदेखि नेयमारको गन्तव्य युरोप हुनुको एउटै कारण त्यही हो ।
सबैतिरका उत्कृष्ट खेलाडी जम्मा गरेपछि युरोपेली फुटबल आकर्षक हुने नै भयो । यी कलात्मक खेलाडीहरू सधैँ युरोपको मैदानमा हुन्छन् । उनीहरूबाट स्थानीय खेलाडीले पनि केही कला सिक्छन् नै । यसले पनि युरोपको फुटबललाई झनै आकर्षक बनाउँदै लगेको छ ।
सम्बन्धित
कोभिड १९ पछि नेपाली खेलकुदलाई पुरानै लयमा फर्काउने चुनौती ...
खेलकुदमा वर्ष ०७६ लाई फर्केर हेर्दा
१ सय २४ वर्षभन्दा लामो इतिहास बोकेको आधुनिक ओलम्पिकमा प्रतियोगिता स्थगित भएको यो दोस्रो घट...
कोरोना संक्रमणको असरले खेल गतिविधिमा कस्तो असर ?
दुई महान् पिताका पुत्रहरू पनि फुटबलप्रति उति नै रुचि राख्ने भएका छन् । रोनाल्डोका छोरा क्र...
रोनाल्डोका छोराका आदर्श मेसी, मेसीका छोरा रोनाल्डोका प्रशंसक
नेपालको थाइल्यान्ड यात्रा नमीठो सम्झना...
एसिया कप खेल्ने सपनामा यसरी लाग्यो तगारो
एक महिना महत्त्वपूर्ण प्रतियोगिता खेल्न नसक्ने स्थितिमा नेपाल ...
महिला भलिबलका तीन हस्ती नै चोटग्रस्त
आर्मीको खेल साँच्चै नै उम्दा थियो, यो सिजनको लिगमा । डिफेन्स र गोलरक्षणमा निकै बलियो । आर्...