[झटारो] तरकारीमाथि सरकारी अनुगमन
यसपालि गाईजात्रा कार्यक्रम गरेनन् कलाकारहरूले । तर, केही छैन । हामीलाई रमिताको खाँचो पनि छैन । सरकार र व्यवसायीहरूको संयुक्त प्रस्तुतिमा अनेकन अनौठा नाटक चलिरहेका छन् बजारमा ।
यसपालि गाईजात्रा कार्यक्रम गरेनन् कलाकारहरूले । तर, केही छैन । हामीलाई रमिताको खाँचो पनि छैन । सरकार र व्यवसायीहरूको संयुक्त प्रस्तुतिमा अनेकन अनौठा नाटक चलिरहेका छन् बजारमा । अनौठा यसकारण कि सबै नाटकका विशेषता एकैखाले छन्, नाटक नसकिँदै दृश्य तथा पात्रहरू दिशाहीन हुने, हराउने, घटनाहरू नेपथ्यमा बिलाउने र नाटक अधूरै रहने । भर्खरै पनि ‘तरकारीमाथि सरकारी अनुगमन’ भन्ने पुरानो नाटक दोहोर्याएर हेर्न पाइयो । कालीमाटी तरकारी बजारमा प्रदर्शित नाटक यस्तो थियो–
सरकारी टोली (सटो) : यो ट्रकको तरकारी कसको हो ? यसको बिल बिजक छ ?
तरकारी टोली (तटो) : छ । किन चाहियो ?
सटो : हामी सरकारी अनुगमन टोलीका सदस्य हौँ । कागजपत्र निकाल ।
तटो : ए सरकारी टोली पो ! उसो भए त छैन कागजसागज ।
सटो : खुरुक्क कागजपत्र देखाउने कि समातौँ यी ट्रक ?
तटो : ल ! सरकारी टोली भएर पनि कत्रो ठूलो स्वर ! ठूलो स्वर निकाल्ने सरलाई त चिनेचिनेजस्तो पनि लाग्छ । पोहोर साल घिराँैलाले लागेर नाथ्री फुटेको सरकै होइन ? ए साथीहरू हो, सबैले दुई–चार मुठा साग, एक–दुई किलो इस्कुस, एक–दुई पाउ अकबरे खुर्सानी, फर्सी, लौका जम्मा गरेर सरहरूको गाडीमा हाल्देओ !
सटो : बासी तरकारीले बुजो लाग्ने टोली होइन यो । दुई तिहाईवाला शक्तिशाली सरकारका प्रतिनिधि हौँ हामी । हामी बजारबाट बिचौलियाहरूलाई निमिट्यान्न नपारी जाँदैनौँ अब ।
तटो : कसलाई बिचौलिया भनेको ? बिजनेस गरेर खानेलाई बिचौलिया भन्ने ? हाम्रो इलाकामा आएर हामीलाई नै गाली गर्ने ? तुरुन्त कालीमाटी एरिया छाडेर जाने कि ठोकठाक गर्नुपर्छ ?
सटो : धेरै दादागिरी नदेखाओ । बाटो छाड, हामी अनुगमन गर्छौं ।
तटो : जाने कि थुनिदिऊँ सटरमा ?
सटो : ल थुनेर हेर त ! कारबाहीमा परौला । होस गर !
तटो : कारबाही ? नहँसाउँनोस् न सरहरू ! त्यो यातायात सिन्डिकेटको कारबाही हामीले नदेख्या हो र † ठेकेदारलाई थुन्ने भनेर गरेको कारबाही पनि देखेकै हो । सुनकाण्डका भरियाहरूलाई थुनेर नाइकेहरूलाई गायब गरेको कारबाही पनि देखियो । त्यस्ता कारबाहीका धम्कीले हामी डराउँछौँ ? हामीलाई छोऊ मात्रै, मुलुकै ठप्प पारिदिन्छौँ ।
सटो : हामीलाई अरू कुरा थाहा छैन । सरकारको कडा निर्देशन छ, तिमीहरूलाई त्यसै छाड्न मिल्दैन ।
तटो : ए साथी हो, त्यो गेट बन्द गर ! लातको भूत बातले मान्दैन भनेको हो रहेछ । सरकारी टोली उठबस गर्न थाल । (सरकारी टोली डरले काम्न थाल्छ) उठबस गर्छौ कि इस्कुसले हानौँ ? (भीडबाट चर्को स्वरमा ‘ठोक ठोक’, ‘हान हान’ भन्ने आवाज आउँछ । सरकारी टोली उठबस गर्न थाल्छ ।) एक, दुई, तीन, चार ...दस, एघार....।
(एक्कासि त्यहाँ हूलका हूल प्रहरी आएर रमितेहरूलाई ठेल्दै भित्र पस्छन् र सरकारी टोलीको उद्धार गरेर लैजान्छन् । तरकारी टोली भने सिंहदरबारसम्मै आवाज पुग्ने गरी नाराबाजी गर्दै मञ्चमै उफ्रिरहन्छ । एकछिनपछि ‘क्रमश:’ लेखेको ब्यानर देखिन्छ । पर्दा बन्द हुन्छ ।)
सम्बन्धित
अब हामी त्यता वरपर गस्ती गर्छौं । ढुंगाहरूमा लठ्ठीले हानेर आवाजहरू निकाल्छौँ, सुसेल्छौँ । ...
सुत्न दे इन्डिया !
स्रोतले कति पटक बिहान माधव नेपाललाई र दिउँसो प्रचण्डलाई प्रधानमन्त्री बनाइसक्यो । साँझमा प...
यस्ता अद्भुत समाचार मित्रहरूले कहाँबाट ल्याउँछन् ?
हामीले पूरा नहुने आशा गरेर आफ्नो स्वास्थ्य बिगार्नुभन्दा पूरा हुने सम्भावना भएका अपेक्षा ग...
नयाँ वर्ष नयाँ आइडिया
नेपालमा भने कोरोना नियन्त्रणको जिम्मा स्वास्थ्य मन्त्रालयले होइन, गृह मन्त्रालयले लिएजस्तो...
प्रहरी लगाऊ, कोरोना भगाऊ !
यो समय त नाकमा मास्क, आँखामा कालो चस्मा र कानमा ठेडी लगाएर चुपचाप घरमा बस्ने समय हो ।...
त्यत्तिकै भ्रष्टाचार भयो भन्ने ?
बाइकवालाले फुऽ गरेको त मापसे पोजिटिभ देखियो । ट्राफिकले समाइहाले । तर बाइकवालाले भने, ‘माप...