पिताकै पथ

- राजु घिसिङ

पोर्चुगलका क्रिस्टियानो रोनाल्डो र अर्जेन्टिनी लियोनल मेसी आफ्नो पुस्ताका सर्वोत्कृष्ट फुटबल खेलाडी हुन् । यी दुईमा को उत्कृष्ट भन्नेमा ठूलै बहस हुने गरेको छ । रोनाल्डो ३४ र मेसी ३२ वर्षका भए । उमेरसँगै दुवैको करिअर संन्यासतर्फ मोडिँदै छ । प्रदर्शन र उपलब्धिको आधारमा विश्व फुटबलमा सर्वकालीन महान खेलाडी मानिएका यी दुईपछि बन्ने सुपरस्टारबारे पनि धेरैखाले अनुमान हुने गरेका छन् ।

अबको २० वर्षतिर प्रतियोगिताको उपाधि र अवार्डमा फेरि रोनाल्डो र मेसीकै प्रतिस्पर्धा भयो भने त्यो आश्चर्य नहुन पनि सक्छ । किनभने दुवैका छोरा सानै उमेरमा फुटबल क्रेजी देखिएका छन् । दुवै सुपरस्टारले आफू सानो छँदा जस्तो खेलाडी थिए, अहिले छोरा पनि उस्तै भएको बताइसकेका छन् । मिडिया रिपोर्ट र युट्युब तथा इन्स्टाग्राममा आइरहेका भिडियोले पनि रोनाल्डो र मेसीका सन्तान फुटबलमा उमेरअनुसार कुशल भएको देखाउँछ ।

रोनाल्डोका छोरा क्रिस्टियानो जुनियर ८ वर्षका छन् ।

रोनाल्डो जुनियर युभेन्ट्सको एकेडेमीमा ट्रेनिङ गर्छन् । उनले हालै बुबाले जस्तै 'ओभरहेड किक' मा गरेको गोल युट्युबमा भाइरल नै बन्यो । बुबाले जस्तै ७ नम्बरको जर्सी लगाउने उनले यू-९ को डेब्युमै चार गोल गरेका थिए । रोनाल्डो कहिलेकाहीँ छोरासँगै अभ्यास गर्छन् । फुटबल कौशल सिकाउँछन् ।

मेसीका छोरा थियागो भने एकेडेमीमा भर्ना भएका छैनन् । 'थियागो पहिले खेल मन पराउँदैनथे,' मेसीको भनाइ स्पेनी पत्रिका मार्काले लेखेको छ, 'अहिले सबै खेल हेर्ने, मन पराउने भएका छन् । खेलको प्राविधिक पक्षबारे कुरा गर्छन् । पहिला मजस्तो थिएँ, छोरा त्यस्तै क्रेजी छन् ।'

जेठा छोराले खेलको राम्रो-नराम्रो पक्ष केलाइरहँदा ४ वर्षे माटेओ भने मैदानमै उत्रिएर बुबाले जस्तै बल हान्न थालेका छन् । उनकी आमाले केही अघि इन्स्टाग्राममा अपलोड गरेको भिडियो लाखौँले हेरे, जहाँ माटेओले बुबाले जस्तै बल अगाडि बढाएर गोल गर्दै खुसियाली मनाएका छन् । फुच्चे केटोले मैदानको मध्यभागबाट डि्रब्लिङ गर्दै पोस्टनजिक पुर्‍याएर हानेको गोलले मेसीको खेलको झल्को दिन्छ ।

मेसी र रोनाल्डोको उमेरमा जति अन्तर छ, संयोगले दुवैका जेठा सन्तानको उमेरमा पनि उति नै फरक छ । मेसीले १७ वर्ष र रोनाल्डोले १६ वर्षको उमेरमा व्यावसायिक फुटबलमा करिअर सुरु गरेका थिए । मेसीले क्लब फुटबलमा निरन्तर बार्साबाटै खेलिरहेका छन् । रोनाल्डोको चौथो क्लब हो, युभेन्ट्स । मेसीले ३४ र रोनाल्डोले २९ उपाधि जितेका छन् । दुवै सुपरस्टारले देश र क्लबका लागि ६ सयभन्दा बढी गोल गरेका छन् । वर्षको उत्कृष्ट खेलाडीको अवार्ड बालोन डि'अर ५-५ पल्ट जितेका कीर्तिमानी रोनाल्डो र मेसीकै पथमा छोराहरु आउँछन् भन्ने अहिले अनुमान मात्रै गर्न सकिन्छ ।

प्रकाशित: आश्विन ७, २०७६

ट्याग: कोलाज
×