कोइरालालाई पन्छाएर त्रिविमा बाँस्कोटालाई यसरी बनाइयो उपकुलपति
कोइरालालाई काउन्सिलमा लैजानुको भित्री उद्देश्य चाँहि राष्ट्रपति विद्यादेवी भण्डारीका निजी चिकित्सक समेत रहेका धर्मकान्त बाँस्कोटालाई त्रिविको उपकुलपति नियुक्त गर्नुसँग जोडिएको थियो ।
१७ कात्तिक ०७६ दिउँसो नेपाल मेडिकल काउन्सिलको अध्यक्षमा डा. भगवान कोइराला नियुक्त भएको खबर एक्कासी बाहिरियो । त्रिभुवन विश्वविद्यालयको उपकुलपतिका लागि अपेक्षित व्यक्ति काउन्सिलको अध्यक्ष नियुक्त भएको खबर आउँदा धेरैलाई आश्चर्य लागेको थियो ।
अर्कातिर, समग्र चिकित्सा क्षेत्रलाई नियमन गर्ने काउन्सिलको अध्यक्षमा कोइरालाको नियुक्तिलाई सराहना पनि गरिएको थियो । तर, कोइरालालाई त्यसरी काउन्सिलमा लैजानुको भित्री उद्देश्य चाँहि राष्ट्रपति विद्यादेवी भण्डारी निकटस्थ धर्मकान्त बाँस्कोटालाई त्रिविको उपकुलपति नियुक्त गर्नुसँग जोडिएको थियो । बाँस्कोटा त्रिविको उपकुलपतिका लागि सम्भावितमध्ये दोस्रो नम्बरमा सिफारिस भएका थिए ।
२० साउन ०७६ मा शिक्षा, विज्ञान तथा प्रविधिमन्त्री गिरिराजमणि पोखरेलको नेतृत्वमा सर्च कमिटी गठन भएको थियो । ५ भदौमा ७ वटा विश्वविद्यालयको उपकुलपति खाली हुँदै थिए । त्यसकारण १५ दिन पहिला नै सर्च कमिटी गठन भएको थियो तर समयमा नाम सिफारिस गर्न अक्षम भइदियो । र, दुई महिनापछि असोज पहिलो साता तीन जनाको नाम सिफारिस गर्यो, भगवान कोइराला, धर्मकान्त बाँस्कोटा र चन्द्रमणि पौडेल ।
कोइरालालाई अन्यत्र व्यवस्थापन गरेपछिमात्रै बाँस्कोटाको लागि बाटो खुल्ने थियो । त्यति कुरा बुझेर नै सरकारले कोइरालालाई काउन्सिलमा लैजान मनाएको थियो । बाँस्कोटाको नाम चर्चामा आउनुभन्दा पहिला नै कोइरालालाई प्रधानमन्त्री ओलीले त्रिविको उपकुलपतिका लागि प्रस्ताव गरेका थिए ।
कोइरालाले जवाफमा रेक्टर र रजिस्ट्रार आफूले सिफारिस गरेको नियुक्त गर्नुपर्ने सर्त राखेका थिए । त्यही बीचमा सर्च कमिटीले कोइराला, बाँस्कोटा र चन्द्रमणि पौडेलको नाम कुलपति तथा प्रधानमन्त्री ओलीसमक्ष सिफारिस गरेका थिए ।
बाँस्कोटा राष्ट्रपति विद्यादेवी भण्डारीका निजी चिकित्सक समेत हुन् उनी । उनी नाक, कान, घाँटी (ईएनटी) का विशेषज्ञ हुन् ।
नियुक्तिमा राष्ट्रपतिको चासो
पछिल्ला दिनमा राष्ट्रपति भण्डारीले राजनीतिक नियुक्तिमा भागबण्डा खोजिरहेकी छन् । त्यही कोटाबाट बाँस्कोटा त्रिविको उपकुलपति हुने सौभाग्य पाए । राष्ट्रपति भण्डारीको म्यानमार र जापान भ्रमण टोलीमा जानु अगावै डा. बाँस्कोटा उपकुलपतिका लागि सिफारिस भइसकेका थिए । त्यसअर्थमा नियुक्तिको दौडमा रहेका व्यक्ति राष्ट्रपतिको भ्रमण दलमा सहभागी हुनु अनैतिक हुन्थ्यो ।
तर, बाँस्कोटा निजी चिकित्सकको हैसियतमा भ्रमणमा गएको दावी गर्छन् । ‘बाहिर के के भन्छन् सबै कुराको जवाफ दिन सम्भव हुँदैन, म निजी चिकित्सक भएकोले गएको हुँ’ बाँस्कोटाले नेपालसँग भने ।
बाँस्कोटाको जीवनकालमा एउटा ‘दु:खद’ घटना पनि छ । ०६९ मा त्रिविका तत्कालीन उपकुपति हिराबहादुर महर्जनले चिकित्साशास्त्र अध्ययन संस्थानमा ३ महिनाका लागि निमित्त डिन नियुक्त गरेका थिए । तर, वरिष्ठता मिचेर बाँस्कोटालाई नियुक्त गरेको भन्दै गोविन्द केसी अनशन बसे । अनि, ४ दिनमै बाँस्कोटाको डिन पद खुस्कियो । र, वरिष्ठतामा ५ औँ नम्बरमा रहेका प्रकाश सायमीलाई डिन नियुक्त गरियो ।
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...