कुहिरोले पनि छेक्न नसकेको शुक
चर्चित लोक रक ब्यान्ड नेपथ्यको छेक्यो छेक्यो देउराली डाँडा हुस्सु र कुहिरोले, आँखैमा झल्झली जस्ता गीतका सर्जक गुरुङको निधन भएको छ ।
गीतकार एवं संगीतकार शुक गुरुङ, ५७, लामो समयदेखि मिर्गौलासँग सम्बन्धित रोगसँग लड्दा लड्दै अन्तत: ६ पुसमा बिहान ६:३० बजे संसारबाट बिदा भएका छन् ।*
दिग्गज कलाकार अरुण थापादेखि पप गायक राजु लामासहित १२ वटा एल्बममा गुरुङले शब्द संगीत रचेका छन् । नेपथ्य (चर्चित लोक रक ब्यान्ड) को छेक्यो, छेक्यो देउराली डाँडा हुस्सु र कुहिरोले, आँखैमा झल्झली जस्ता गीतका सर्जक गुरुङ हुन् । ती गीतका गीतकार एवं संगीतकार समेत रहेका गुरुङलाई सम्झदै नेपथ्यका प्रमुख गायक अमृत गुरुङले ट्वीट गरेका छन् ।
उनले ट्वीटमा नेपथ्यको सिग्नेचर गीत छेक्यो छेक्यो शुक गुरुङले दिएर ठूलो गुण लगाएको बताएका छन् । २६ अगस्टको भेट नै अन्तिम रहेको भन्दै अमृतले शुक गुरुङलाई सामाजिक सञ्जालमार्फत् श्रद्धाञ्जलि दिएका छन् । अहिले नेपथ्यको टोली अस्ट्रेलियामा कन्सर्ट गरिरहेको छ ।
अमृतले ट्वीटरमा लेखे- 'हार्दिक श्रद्धान्जली - शुक गुरुङ । गत अगस्त २६, मा संगीतकार शुक गुरुङसँग भएको भेट नै हामीबीचको अन्तिम भेट लेखिएको रहेछ। शुकजीले नेपथ्यको प्रारम्भकालमा ‘छेक्यो छेक्यो’ गीत दिएर हामीलाई ठुलो गुण लगाएका थिए। उनको मृत्युको खबरले म दुखी छु । उनको आत्माको चीर शान्तिको कामना गर्दछु ।'
अरुण थापाको ०४९ मा जिन्दगीको यात्रा एल्बममा रहेको गीत दोष कसैलाई दिन चाहन्न गुरुङको पहिलो चर्चित गीत थियो ।
रचनाकार रमेश कश्यप गुरुङलाई मिजासिलो व्यक्तित्वको रुपमा सम्झन्छन् । गुरुङ नेपथ्य र पोखराको बसाइँ छोडेर स्वतन्त्र परिचय बनाउन करिब ०५२ सालतिर काठमाडौँ आएको कश्यप सुनाउँछन् । भन्छन्, “त्यहीबेला हो उहाँसँग पहिलो भेट भएको । संगीतका बारेमा कुरा हुन्थ्यो । स्टुडियोमा भेटघाट हुन्थ्यो । शब्दसँग मज्जाले खेल्न सक्ने ।”
कश्यपका अनुसार उनले कयौँ शब्द र संगीत विदेशमा रहेका नेपाली गायकहरुका लागि समेत रचेका थिए ।
संगीतकार बीबी अनुरागी गुरुङको योगदान नेपाली संगीत क्षेत्रमा अतुलनीय ठान्छन् । करिब १० वर्ष अगाडि पोखरामा सम्पन्न सांगीतिक कार्यक्रममा भेट भएको सम्झदै अनुरागी भन्छन्, “नेपथ्य भनेको लोकरक धार । लोकरक संगीत सिर्जना गर्ने भनेपछि गेटअप पनि आधुनिक होला भनेको उहाँलाई भेट्दा छक्क परेँ । अति साधारण र सरल व्यक्तित्व ।” अनुरागीका अनुसार गुरुङको आफ्नै सांगीतिक धार थियो । उनका अधिकांश रचना लोकसंगीतमा आधारित आधुनिक गीत थिए । ती आधुनिक सुगम संगीत र रक गीत भन्दा भिन्न शैलीका छन् ।
नेपथ्यका लागि थुप्रै चर्चित गीतहरू सिर्जना गरेका शुक नेपथ्यमा कसरी सम्मिलित भए र छुट्टिए भन्ने कसैलाई थाहा छैन । यसबारेमा बताउन सक्ने नेपथ्यका अमृत यतिबेला अस्ट्रेलियामा छन् ।
दुई छोरा र पत्नी जुना गुरुङका साथमा पछिल्लो समय पोखराको बुढीबजार बस्दै आएका गुरुङ लामो समयदेखि मधुमेह रोगबाट पीडित थिए । पछि दुवै मिर्गौला बिग्रिएपछि उपचारका लागि ०७३ मा पोखरामा ‘शुक गुरुङ उपचार सहयोग समिति’ गठन भएको थियो ।
रचनाकार सुमन श्रापित गुरुङले राज्यबाट भोगेको उपेक्षाबाट निराश भएको बताउँछन् । उनीसँग गुरुङ भन्ने गर्थे, 'म एउटा गुरुङको छोरा । पैसा कमाउन विदेश लागिनँ । गीत संगीतमा लागे । समस्या पर्दा राज्यले चासो नदिने, टुलुटुलु हेर्ने, यो समस्या अरुलाई नपरोस् ।'
गुरुङका रचनाहरू संकलित यी मेरा अन्तर बेदनाहरु ०७२ मा प्रकाशित भएको थियो । रचनाकार बसन्त वित्यासीले १० वर्षअगाडि गुरुङको एकल शब्द र संगीतमा सूचना एल्बम निकालेका थिए । वित्यासीको भेट गुरुङले काठमाडौँको सुन्धारामा रेस्टुराँ व्यावसाय गर्ने क्रममा भएको थियो ।
गुरुङ गीत मात्र होइन, कथा पनि लेख्थे । करिब दुई वर्षअगाडि गुरुङ भन्थे, ‘कथा लेखेर आफैं चलचित्र निर्देशन गर्ने हो भाइ’, वित्यासीले सम्झिए ।
दुई दशक लामो सांगीतिक क्षेत्रमा साधना गरेका गुरुङको आइतबार नै गुरुङ संस्कृति अनुसार पोखरा रिठ्ठेपानी आर्यघाटमा अन्तिम संस्कार भएको छ । उनी नरहेपनि उनले सिर्जना गरेका भाइटिकामा भेट्न आउला... लगायतका गीत कालजयी छन् । आउने पुस्ताले पनि यी गीतहरू निरन्तर गुनगुनाइरहने छन् ।
*पुस हुनुपर्नेमा मंसिर भएकोले सच्याइएको । -सम्पादक
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...