उस्ताद उवाच
यी हुन् नेपाली शब्दकोष र जनजीवनमा फरक–फरक अर्थ लाग्ने केही प्रचलित शब्द र शब्दार्थ ।
नयाँ शब्दार्थ
नेपाली शब्दकोष र जनजीवनमा फरक–फरक अर्थ लाग्ने केही प्रचलित शब्द र शब्दार्थ :
सहमति : नयाँ विवादको तयारी गर्नु । अब के विषयमा विवाद गर्ने भनेर टुंगो गर्नुलाई सहमति भनिन्छ ।
संयमित : अरूले आक्रमण गर्दा चुपचाप सहनु, प्रत्याक्रमण नगर्नु । खासगरी नेपाली सुरक्षाकर्मीबाट अधिकारकर्मी र विदेशीले गर्ने अपेक्षा ।
नाका : स्वदेशी तथा विदेशी मिसिएर धर्ना बस्ने ठाउँ ।
भिडन्त : फरक समुदाय या सुरक्षाकर्मीलाई आक्रमण गर्ने कार्य ।
सम्बोधन : नाजायज माग पूरा गर भन्नलाई प्रयोग गरिने घुमाउरो शब्द ।
नाकाबन्दी : जनता सताएर मानवताविरुद्ध अपराध गर्ने कार्य । नेपाल र भारत सरकारले उच्चारण गर्न नमिल्ने शब्द ।
घर झगडा : अरूले लगाइदिएको आगो ।
अधिकार : के माग्दैछु भन्ने आफैँलाई थाहा छैन भने प्रयोग गर्ने सजिलो शब्द ।
रमिता : सरकारले देशको हालत हेर्ने कार्य या तरिका ।
डिजेल–पेट्रोल : रगत
ग्यास : अक्सिजन
मेड इन नेपाल ?
टोपी कोरियामा, सर्ट थाइल्यान्डमा बनेको । पाइन्ट इटालीमा, गन्जी भारतमा बनेको । जुत्ता नेपालमै बनेको तर तलुवामा ‘मेड इन चाइना’ लेखेको । हातमा बोकेको फोन हेर्नूस्– चीनमै बनेको । अहा, क्या मजाले नेपाली हिँडेको ।
बिहान उठ्छ, चिया खान्छ । दूध नेपाली तर चिया–चिनी भारतको । पकाउने ग्यास अरबको त्यही पनि भारतले नेपाल आउन रोकेको । पकाउने भाँडा विदेशको, चामल, तरकारी नेपालको (कहिलेकाहीँ भारतको पनि) तर त्यसलाई फलाउने मलखादचाहिँ भारतकै । अनि, यो सबै किन्ने दाम छोराले खाडीबाट पठाको ।
दिउँसो श्रीमान् जान्छ पेट्रोलको लाइनमा, श्रीमती जान्छे ग्यासको लाइनमा । अहा, क्या मिलेर लाइन लागेका, घाम तापेका । सुख कि दु:ख पाएका ? पाए ग्यास, पेट्रोल ल्याउँछन्, नपाए सरकारलाई गाली गर्छन् । तर, के गर्नु, गालीमा ‘मेड इन नेपाल’ लेखेको हुँदैन, गालीले समाधान दिँदैन । चाउचाउ खाजा खान्छन् । थाई प्रविधिमा बनेको चाउचाउमा मैदा उतैको, मेसिन उतैको, खोल भारतले छापेको, बाहिरपट्टि क्या मजाले मेड इन नेपाल लेखेको ।
आगो नबाली भान्सा चल्दैन, आन्दोलन नगरी देश चल्दैन । आन्दोलन छ र त देश छ । पहिले नेपाल बन्द हुन्थ्यो, देश चलेकै थियो, अचेल नाका बन्द हुन्छ तैपनि देश चलेकै छ । आन्दोलनमय छ नेपाल, आन्दोलन स्वदेशी, आन्दोलनकारी विदेशी, गोली हान्ने नेपाली, गोली खाने विदेशी । गोली पनि विदेशमै बनेको, बन्दुकमा लेख्या होला तर गोलीमा मेड इन.... हुँदैन लेखेको । सितिमिति देख्न पाइन्न मेड इन नेपाल लेखेको । अचम्मै छ, परनिर्भर भएर पनि यतिका समय कसरी नेपाल चलेको ?
मन्त्री छान्ने लमी
लमी पेसा सुन्नु’भा छ ? लमीसँग गजब क्षमता हुन्छ, यिनले मान्छे छान्न सघाउँछन् । बिहे गराइदिन्छन् । जीवनभरिलाई मान्छे छान्न सघाउने लमीले दुई–चार महिना या एक–दुई वर्षका लागि झन् सजिलै मान्छे छानी देलान् । अब एमाले नेताहरू, खास गरी प्रधानमन्त्री केपी ओलीले लमीहरूसँग सम्पर्क राख्नुपर्यो । र, मन्त्री छान्न सहयोग गर्न भन्नुपर्यो ।
मन्त्री बन्नेको योग्यता र गुण के के हुनुपर्छ भन्ने लमीलाई बताउने अनि भने अनुसारको गुणका सभासद् ट्वाक्क छानेर लमीले प्रधानमन्त्रीका सामु पेस गर्छन् । त्यसपछि ती सभासद्ले प्रधानमन्त्रीको सात फन्को प्रदक्षिणा गरेर सरकार टिकेसम्म साथ रहने, मौका नपरेसम्म धोका नदिने कसम खानेछन् ।
यति सजिलै मन्त्री छान्ने उपाय छाडेर एमाले नेताहरू बेकारमा किन गलफती गरेका होलान् ? अहिले त जसोतसो छान्न पनि सक्लान् तर मन्त्री छान्न जुनसुकै पार्टीलाई यस्तै सकस हुन्छ । त्यसैले
यस्तो सकसको समाधान नै लमीलाई जिम्मा दिने हो ।
सम्बन्धित
अब हामी त्यता वरपर गस्ती गर्छौं । ढुंगाहरूमा लठ्ठीले हानेर आवाजहरू निकाल्छौँ, सुसेल्छौँ । ...
सुत्न दे इन्डिया !
स्रोतले कति पटक बिहान माधव नेपाललाई र दिउँसो प्रचण्डलाई प्रधानमन्त्री बनाइसक्यो । साँझमा प...
यस्ता अद्भुत समाचार मित्रहरूले कहाँबाट ल्याउँछन् ?
हामीले पूरा नहुने आशा गरेर आफ्नो स्वास्थ्य बिगार्नुभन्दा पूरा हुने सम्भावना भएका अपेक्षा ग...
नयाँ वर्ष नयाँ आइडिया
नेपालमा भने कोरोना नियन्त्रणको जिम्मा स्वास्थ्य मन्त्रालयले होइन, गृह मन्त्रालयले लिएजस्तो...
प्रहरी लगाऊ, कोरोना भगाऊ !
यो समय त नाकमा मास्क, आँखामा कालो चस्मा र कानमा ठेडी लगाएर चुपचाप घरमा बस्ने समय हो ।...
त्यत्तिकै भ्रष्टाचार भयो भन्ने ?
बाइकवालाले फुऽ गरेको त मापसे पोजिटिभ देखियो । ट्राफिकले समाइहाले । तर बाइकवालाले भने, ‘माप...