उस्ताद उवाच

व्यंग्य

उस्ताद उवाच

लरतरो होइन, गुगुलबाबु पो त, उनले भनेको कुरा कानधनीबाहेक अरूले सुन्न सक्दैन ।

राजकुमार रेग्मी

१४ श्रावण २०७३ शुक्रबार

काठमाडौं

देशको माल, तीन जनाको कमाल

छुनुमुनु छुनुमुनु गर्दै बाबु आयो । केपी ओलीले च्याप्प समातेर म्वाइँ खाए । त्यसपछि प्रचण्डले बाबु बोक्छु भने, शेरबहादुर देउवाले पनि त्यसै भने । ओलीको हातबाट बाबु खोसाखोस भयो । ओलीले ‘पालैपालो बोके भइहाल्यो नि’ भने ।

पहिले देउवाले बोके अनि ‘अहा, कति राम्रो बाबु’ भने । उनले खुसुक्क सोधे, ‘बाबु, प्रधानमन्त्री बन्ने मेरो पालो कहिले आउँछ ?’ बाबुले पनि खुसुक्क कानमा केही भन्यो, अरूले सुनेनन् । लरतरो होइन, गुगुलबाबु पो त, उनले भनेको कुरा कानधनीबाहेक अरूले सुन्न सक्दैन । बाबुको वाणीबाट दंग परे देउवा ।

त्यसपछि ‘आऊ मेरो बाबु’ भन्दै प्रचण्डले बोके । बाबुलाई कानमा खुसुक्क सोधे, ‘मेरो पालो आएकै हो त ?’ बाबुले जवाफमा प्रचण्डको कानमा केही भन्यो । कुरा सुनेर ‘म त खुसीले नै मर्छु कि क्या हो’ भन्दै प्रचण्ड चिच्याए ।

ओलीले सोधे, ‘बाबु, के खाने ? पापा खाने ?’ बाबुले ‘केही खान्नँ’ भन्यो । देउवा कराए, ‘केही खानैपर्छ ! नखाने भए खाजाखर्च दिन्छम् ।’ देउवाले कोटको खल्तीमा हात हाले । उनलाई उछिन्दै प्रचण्ड कराए, ‘मने, बाबुलाई म दिन्छु ।’ यिनको कुरा सुनेर ओली खित्का छाडेर हाँसे अनि भने, ‘बाबुजस्तो मानिसलाई कोटको खल्तीबाट दिएर पुग्छ ? देशको खल्तीबाट दिनुपर्छ ।’ त्यसपछि ओलीले देशको खल्तीमा हात लम्काए, फुत्त निकाले । बाबुको हातमा दिन लाग्दा देउवा र प्रचण्ड कराए, ‘आफ्नो खल्तीको हो र एक्लै दिने ? देशको खल्तीको हामीले मिलेर दिनुपर्छ ।’ त्यसपछि तीनै जना मिलेर बाबुको हातमा दिएर ‘देशको माल तीन जनाको कमाल’ गरे ।

कालो, सेतो र खैरो कोट

आफ्नो त सानैदेखि टलक्क पारेर कोट लाउने बानी ! कालो कोट लगाएर हिँडेको, बाटोमा रोकेर मानिसहरू सोध्छन्, नयाँ सरकार कुन धाराबाट बन्छ ? जुनसुकै धाराबाट बनोस्, धाराबाट बनोस् कि कुवाबाट बनोस्, ट्यांकरमा पानी ल्याएर बनोस् कि, आकाशबाट परेको पानीबाट बनोस् कि, मलाई के मतलब ? यसो भनेर हिँड्दा पनि जस छैन । सन्किएर भन्छन्, जाबो यति जवाफ दिन पनि फिलिउँलाजस्तो गर्छन् । कालो कोट लगाएर हिँड्दा दु:ख पाइयो । त्यसपछि सेतो कोट लगाएर हिँडियो । हरे, सेतो कोटमा पनि समस्या उही, प्रश्नचाहिँ फरक । सडकमा मानिसहरू सोध्छन्, ‘तपाईं नक्कली डाक्टर कि सक्कली ?’ प्रश्न यति मात्र हो र ? सोध्छन्, ‘तपाईं डा केसीको अनशनको पक्षमा कि मेडिकल माफियाको पक्षमा ?’

लौ, भएन यसरी भनेर खरानी रङको कोट लगाएर हिँडेको झन् आपतै पर्‍यो । मानिसहरू भन्छन्, हेर न, लोगो लुकाएर हिँडेको † कुन लोगो ? केको लोगो ? अहँ, केही बुझ्न सकिएन । जो पनि सोध्छन्, किन लोगो नलगाई हिँडेको ? तत्त्व बुझियो । खरानी रंगको कोट लगाएको देखेर सांसद ठानेछन् । सोध्न थाले, ‘ अविश्वासको प्रस्ताव पारित हुन्छ कि हुन्न ?’ कालो कोट लगाएर हिँड्दाको प्रश्न खराने कोट लाउँदा पनि बर्सियो, ‘नयाँ सरकार कुन धाराबाट बन्छ ?’

हामी कोट लगाउनेहरूको यस्तो दु:ख हटाउन सरकारले तत्काल कदम चालोस् !

अनशन कि एक्सरे ?

आम्मै ! डा गोविन्द केसी कस्तो बेइमान रै’छन् । अनशन भन्दै एक्सरे पो गर्दैछन् । अनशनको बहानामा यिनले धेरैको एक्सरे गरेर भटाभट प्रदर्शन गरिरहेछन् । हेरौँ, केसीले गरेका केही एक्सरेका रिपोर्ट :

डा फलानाले एउटा मेडिकल कलेज खोल्ने अनि कमाएर त्यसको छतमा नोट सुकाउने योजना बुनेछन् । हावाले छतबाट नोट उडाएर लैजान के बेर ? त्यसका लागि अख्तियार नामक जाली हाल्ने भएछन् । उनको यो अद्भुत योजना एक्सरेमा छर्लंग देखियो ।

भोलानाथ कसरी द्रव्यनाथमा परिणत भए ? कलेज खोलेर ! एक्सरेले कुरा खुलाएपछि द्रव्यनाथले केसीविरुद्ध जुलुस निकाले । द्रव्यको भव्य जुलसको पनि केसीले एक्सरे गरेका छन् रे तर रिपोर्टचाहिँ आइसकेको छैन ।

बुरुक्क उफ्रन्छ, पाखुरा सुर्कन्छ, महाभियोग लाउनहुन्न भन्छ, मनमाफिक मेडिकल कलेज खोल्न र लुट्न पाउनुपर्छ भन्छ । होइन, को रै’छ यो मानिस ? एक्सरेले ती मानिसको सालनाल लोख्तियारसँग जोडिएको पत्ता लगाएछ ।

अस्तिसम्म इमान र नैतिकताबाहेक अरू विषयमा कुरा नगर्ने एक नेताजी अचानक थर्थर काँप्न र बोल्न डराउन थाले । एक्सरेमा देखियो, उनलाई ‘अख्तियार’ नामक रोग लागेछ । यो रोगको उपचार नैतिक शक्तिबाहेक अरू कुनै औषधिले हुँदैन रे !

नेपालको स्वास्थ्य क्षेत्र ‘मेडिकल माफिया’ रोगले सिकिस्त भएको एक्सरेले खुट्याएको छ । यो रोग ठूलाबडालाई मात्र लाग्छ, अरूलाई लाग्दैन ! उपचार गर्न खोज्दा रोगीहरुले मिलेर प्रतिकार गर्छन् रे ! रोग नलागेका स्वस्थ मानिस एक ठाउँ उभिए भनेचाहिँ यो रोग निर्मूल हुन्छ रे !

यस्तो एक्सरे मानव अधिकार र खाने अधिकारविरुद्ध छ । त्यसैले माग गरौँ, एक्सरे गर्न पाइँदैन, अनशन बस्न त झन् पाइँदै पाइँदैन !

हेल्लो सरकार !