उस्ताद उवाच
वार्ता ट्याब्लेट : यो ट्याब्लेट खाएर वार्ता गर्न बसेपछि एकैछिनमा सहमति हुन्छ । जस्तै विवादको विषय किन नहोस्, समाधान निस्कन्छ ।
केही चमत्कारी वस्तु र तिनका काम
अहँ, यो पाराले सरकार चलाएर हुन्न । यसरी विश्वको नम्बर एक देश कहिले
बन्ने ? त्यसैले अब हाम्रो पार्टीले केही विलक्षण जिनिस उत्पादन गर्ने सोच बनाएको छ । त्यस्ता केही जिनिस र त्यसले गर्ने कामको एक झलक :
सेन्सरयुक्त मास्क : सारा मन्त्री/सभासद् तथा कर्मचारीको मुखमा लगाइने यो मास्कमा जडित सेन्सरले खाने र नखाने कुरा तत्काल चिन्छ । खानेकुरा मुखभित्र पस्न दिन्छ तर घूस, कमिसन तथा उपहारजस्ता जिनिस पस्न दिँदैन ।
वार्ता ट्याब्लेट : यो ट्याब्लेट खाएर वार्ता गर्न बसेपछि एकैछिनमा सहमति हुन्छ । जस्तै विवादको विषय किन नहोस्, समाधान निस्कन्छ ।
विकास बुटी : यो बुटी लगाएपछि सरकारी कर्मचारीले विकास निर्माणको काम फटाफट गर्नेछन् । काम मात्र गर्न मन लाग्छ । नीति निर्माताले समेत यो बुटी लगाए भने काठमाडौँ–निजगढ फास्टट्रयाक समेत एकै वर्षमा बन्नेछ ।
उज्यालो चस्मा : यो चस्मा लगाएपछि रात पनि दिन हुन्छ, बिजुली चाहिन्न । बिजुली नै नचाहिएपछि केको लोडसेडिङ ? हरेक नागरिकलाई यो चस्मा वितरण गरिनेछ ।
मनचिन्ते कुर्सी : यो कुर्सीमा बसेपछि बस्नेले जुन पद चितायो, त्यही पद बितायो । कुर्सीमा बसेपछि राष्ट्रपति, प्रधानमन्त्री, मन्त्री जे पनि बन्न सकिन्छ । घरमै यो कुर्सीमा बसेर विभिन्न पदको तिर्सना मनमनै मेट्न सकिन्छ । अनि, कसरी हुन्छ राजनीतिक झगडा र लफडा ?
गणेश चक्की : गणेशजीले खाएर कुबेरको विशाल भोजन भण्डार रित्ताइदिएको सम्मानमा यो चक्कीको नाम गणेश चक्की राखिएको हो । यो एकपटक खाएपछि दुई–चार महिना खाना खान पर्दैन । ‘एक चक्की खानूस्, दुई–चार महिना अघाउनूस्’ नारासाथ घरघरमा बाँड्ने ।
आउँदो चुनाव जित्नासाथ हाम्रो पार्टीले यी जिनिस उत्पादन थालिहाल्ने योजना छ ।
खुट्टा काट्ने खेल
एउटाले अर्काेको खुट्टा तान्ने खेल खेल्न जति मजा, हेर्न त्यसभन्दा धेरै मजा ! नेताहरू खुट्टा तानातान गर्छन्, संघसंस्था र संगठनमा अधिकारी–पदाधिकारी र कर्मचारी पनि खुट्टा तानातान गर्छन् । यत्रतत्र सर्वत्र खुट्टा तान्ने खेल चलिरहेको छ । तर, यो खेल पुरानो भो । पुरानो खेलको सट्टा खुट्टा काट्ने नयाँ खेल चलाएका छन् । दायाँबायाँ नहेर्ने, च्वाट्टै खुट्टा काट्ने, कसैले कसैलाई बाँकी नराख्ने, खुट्टा काटिहाल्ने खेल । र, यो खेलको मैदान भएको छ, नेपाली भाषा । अब नेपाली भाषामा च्वाट्टै खुट्टा काट्न पाइने भएको छ । जति काटे पनि भो, कुनै बात लाग्दैन, कुनै सजाय हुँदैन । मान्छेको खुट्टा काटेको होइन, जाबो थोत्रो पुरानो नेपाली भाषाको शब्द र अक्षरको खुट्टा काट्ने हो । यसमा विरोध किन ?
यो खेलमा अरूको त कुरै छाडौँ, राष्ट्रपति, प्रधानमन्त्रीको समेत खुट्टा काट्न पाइन्छ । खुट्टा काटेपछि राष्टर्पति र पर्धानमन्त्री बन्छन् । एकथरी मानिस खुट्टा काट्न पाइन्न भन्दै छन् । टाउको काट्दा समेत माफ पाइने देशमा शब्दको खुट्टा काट्न किन नपाइने ? जति काटे पनि हुन्छ तर एउटा समस्या छ । काटेका खुट्टा कहाँ थुपार्ने ? नेपाली भाषामै थुपार्ने ? यदि त्यसै हो भने नेपाली भाषालाई खुट्टाको चिहान भनिन सक्छ । बरू यसो गरौँ, नेपाली भाषामा खुट्टा काट्ने खेल बन्द गरौँ, भाषाको घाँटी नै काटौँ, त्यसपछि टन्टैसाफ हुन्छ ।
म उत्तम, देश खत्तम
हेर्नूस्, यो देश खत्तम छ, केही ठीक छैन । अस्ति सिंगापुर गएको थिएँ, त्यहाँ कस्तो सफा, यहाँ फोहोर नै फोहोर छ । घरको फोहोर लिने गाडी टाइममा आउँदैन, बाध्य भएर राती सडकमा लगेर फाल्छु । जापानमा सरकारी कर्मचारीले काम गरेको देखेर म चकित भएँ । नेपालका सबै कर्मचारी कामचोर, हिजो एउटा अफिसमा चार घन्टा लाइन लाग्नुपर्ने भयो । कर्मचारीलाई आफ्नो परिचय दिएँ, ‘ हजुर जस्तो हस्तीको काम एकै छिनमा गर्दिन्छु’ भन्दै अरूको काम छाडेर मेरो गरिदियो । कोहीकोही कर्मचारी यस्ता असल पनि छन् । तर, यहाँ केही पनि ठीक छैन क्या ! बेलायतमा छाती जचाउँदा सबै ठीक थियो, काठमाडौँ आएर जचाउँदा समस्या देखायो । युरोपमा प्रदूषण थोरै छ, नेपालमा धेरै छ । पानी त झन् खत्तमै छ ।
त्यही भएर घरमा धाराको पानी एकथोपा चलाउँदिनँ, ट्वाइलेटमा पनि मिनरल वाटर नै प्रयोग गर्छु । यहाँका मानिस पनि ठीक छैनन् । मेरो संस्थामा कति कर्मचारी राखेँ, राम्रो काम कसैले गर्दैनन् तर तलबचाहिँ महिना मर्नासाथ माग्छन् । त्यसैले सालासाली र भान्जाभान्जीलाई राखेको छु, अहिले ढुक्क छ । देशको अवस्था सुधार्न मेरो संस्थाले रातोदिन गोष्ठी/सेमिनार गरिरहेछ तर कसैले सुन्दैन । गत महिना एउटा गाउँमा साबुनपानीले हात धुने विषयमा मेरो संस्थाले जनचेतनामूलक कार्यक्रम गर्यो तर त्यहाँका मानिस पहिला धारा ल्याइदेऊ अनि हात धुन्छौँ भन्छन् । यस्ता खत्तम छन् जनता ! नेपालका जनता पनि काम नलाग्ने, नेता झन् काम नलाग्ने ।
बुझनुभो ! म उत्तम, यो देश खत्तम !
सम्बन्धित
अब हामी त्यता वरपर गस्ती गर्छौं । ढुंगाहरूमा लठ्ठीले हानेर आवाजहरू निकाल्छौँ, सुसेल्छौँ । ...
सुत्न दे इन्डिया !
स्रोतले कति पटक बिहान माधव नेपाललाई र दिउँसो प्रचण्डलाई प्रधानमन्त्री बनाइसक्यो । साँझमा प...
यस्ता अद्भुत समाचार मित्रहरूले कहाँबाट ल्याउँछन् ?
हामीले पूरा नहुने आशा गरेर आफ्नो स्वास्थ्य बिगार्नुभन्दा पूरा हुने सम्भावना भएका अपेक्षा ग...
नयाँ वर्ष नयाँ आइडिया
नेपालमा भने कोरोना नियन्त्रणको जिम्मा स्वास्थ्य मन्त्रालयले होइन, गृह मन्त्रालयले लिएजस्तो...
प्रहरी लगाऊ, कोरोना भगाऊ !
यो समय त नाकमा मास्क, आँखामा कालो चस्मा र कानमा ठेडी लगाएर चुपचाप घरमा बस्ने समय हो ।...
त्यत्तिकै भ्रष्टाचार भयो भन्ने ?
बाइकवालाले फुऽ गरेको त मापसे पोजिटिभ देखियो । ट्राफिकले समाइहाले । तर बाइकवालाले भने, ‘माप...