उस्ताद उवाच
कोही मरेपछि बन्द–हडताल भयो भने उसलाई सहिद घोषणा गरिने हाम्रो गौरवशाली परम्परा छ । चरा मरेपछि डेढ घन्टा विमानस्थल बन्द भयो । जसरी भएको होस्, बन्द त भयो नि ! अनि, चरालाई सहिद घोषणा नगरी भो ?
प्रथम चरा सहिद
त्रिभुवन विमानस्थलको धावनमार्गमा चरा मरेको फेला पर्यो । कसरी मर्यो चरा ? जसरी मरेको होस्, यो स्वाभाविक मरण होइन । त्यसैले चरालाई सहिद घोषणा गर्नुपर्छ । किनभने, यो चरालाई सहिद घोषणा गर्न सकिने अनेक आधार छन् । कोही मरेपछि बन्द–हडताल भयो भने उसलाई सहिद घोषणा गरिने हाम्रो गौरवशाली परम्परा छ । चरा मरेपछि डेढ घन्टा विमानस्थल बन्द भयो । जसरी भएको होस्, बन्द त भयो नि ! अनि, चरालाई सहिद घोषणा नगरी भो ? यति कारणले मात्र सहिद घोषणा गर्न मिल्दैन भन्ने हो भने अरू कारण पनि हाजिर छन् । चरा मरेको विमानस्थल कसको ? सरकारको !
सरकारी क्षेत्रमा चरा मरेको छ । उसलाई बचाउने काम सरकारले किन गरेन ? सरकारले बचाउन नसकेपछि सहिद घोषणा नगरी सुख ? त्यो चरा बाँच्न पनि सक्थ्यो, सरकारी लापरबाहीले मरेको हो । धावनमार्गमा चरा ज्यूँदै लडिरहेको थियो कि ? अहँ, कसैले हेरेन, मरेको चरा मात्र देखे । सफाइ कर्मचारी विमानस्थलमा भएका भए तत्कालै चरा उठाउने काम हुन्थ्यो, ज्यूँदै थियो भने उपचार हुन्थ्यो र ऊ बाँच्थ्यो । तर, डेढ घन्टासम्म सफाइ कर्मचारी भेटिएनन् । विमानस्थलमा सफाइ कर्मचारी नहुनाले पनि चरा मर्यो । ती कर्मचारीलाई महाभियोग लगाएर हटाउनुपर्छ र चरालाई सहिद घोषणा गर्नुपर्छ । चरालाई पनि सहिदको दर्जा दिएर सहिद उपाधिलाई व्यापक स्तरको समावेशी बनाउनुपर्छ ।
प्रथम चरा सहिद जिन्दावाद !
लम्पसार पार्टी
यसो पार्टी खोलौँ भनेको, कार्यकर्ता पाइएन । पार्टी खोल्न सबैभन्दा समस्या कार्यकर्ताको हुन्छ । कार्यकर्ता नभए के पार्टी ? त्यो त प्रालि भइहाल्यो नि ! प्रालिजस्तो पार्टी खोल्न पनि समस्या नै छ । समस्या के भने नामको ! पार्टी खोल्न नाम नै पाइँदैन ।
‘जनता’ शब्द जोडिएका पार्टी छन्, देशको नाम गाँसिएको पार्टी कति हो कति छन् । विकास नामको पनि पार्टी छ । दामीदामी शब्द भएका पार्टी कति छन् कति ! पार्टी खोल्न नाम कसै गरे पाइएन । यसो विचारेर ल्याउँदा अहिलेको चर्चित शब्द टिपेर त्यही नाममा पार्टी खोलौँ जस्तो लाग्यो । ‘लम्पसार’ नाम कस्तो लाग्यो ? अहा, नाम त यो पो काइदाको लाग्यो । पार्टीको नाम नै लम्पसार । पार्टीलाई कुनै एउटा वाद पनि चाहिन्छ । लम्पसार पार्टीको नाम नै लम्पसार, वाद पनि लम्पसारवाद ! पार्टीको बेग्लै पहिचान दिन कार्यर्तालाई ‘कार्यकर्ता’ नभनेर ‘लम्पसारवादी’ भन्ने । नेतालाई ‘लम्पसारवादी नेता’ भन्ने ! यति चर्चित नामको पार्टीले कामचाहिँ के गर्छ भनेर जनताले सोधे भने जवाफ दिन पनि सजिलो छ । पार्टीको नामै लम्पसार, कामै लम्पसार भनिदिने ।
यस्तो पार्टीले गरिखाला कि नखाला ? रायसुझाव पाऊँ है !
बहानाको खोजी
दसैँ अस्ति नै सकियो । तिहार पनि सकियो । छठ पनि गयो । बर्बादै भयो । किन थाहा छ ? अब बहाना नपाइने भयो । काम टार्न बहाना चाहिन्छ । हामी नेपाली कति इमानदार छौँ भने ढाँट–छल गर्दैनौँ, बिनाकारण काम टार्दैनौँ । दसैँमा काम गर्न भएन । तिहारजस्तो चाडवाडमा काम गर्न मिल्दैन । छठ नसकिई काम गर्न हुँदै हुँदैन । मुख्य चाडवाड सकियो, अब कुन बहानाले काम टार्ने होला ? हामीलाई चाडपर्व सकिएकामा होइन, काम टार्ने बहाना सकिएकामा चिन्ता लाग्छ ।
यी सब काम थाँती राख्न हामीलाई चाडपर्वले बहाना दिएको थियो । अब बहाना के ? काम गर्ने उपाय खोज्ने झन्झट किन गर्ने ? बरू कुनै बहाना खोज्ने । एउटाले अर्काेलाई दोष दिने, अर्काेले अर्काेलाई दोष दिने हाम्रो स्थायी बहाना हो तर यो बहाना अचेल कसैले पत्याउँदैन । काम टार्ने र ढाँटछल गर्ने चाडवाडको बहाना बाँकी रहेन, पत्यारलाग्दो बहाना पाइएन । क्या फसाद पर्यो । कि कामै गर्ने, कि कामै थाल्ने ? अहँ यसो गर्न पनि हुन्न । अलमलमै हामीलाई आनन्द आउँछ । सबै काम त्याग्न सकिन्छ तर अलमलको आनन्द त्याग्न सकिन्न । भनेपछि के बहाना बनाउने त ? कुनै बहाना नपाइएको भन्दै त्यही बहानामा अलमल गरेर बसे कसो होला ? यो बहानाचाहिँ दुनियाँले सजिलै पत्याउँछन् जस्तो लाग्यो, कि कसो हो ?
डाडुमा डुबुल्की
सिक्का माथितिर फ् याँक्नू, तल भुइँमा झरेपछि माथिपट्टि गाई कि त्रिशूल छ, हेर्नू । गाई छ भने कांग्रेसले महाभियोगको पक्षमा लाग्नू, नत्र विपक्षमा लाग्नू । बिहान उठेर पूर्व आकाशमा हेर्नू । उदाउँदा घामलाई बादलले छेकेको छ भने महाभियोगको पक्षमा, नत्र विपक्षमा लाग्नू । झ्याप्प एकमुठी चामल लिनू । एउटा थालमा राखेर गन्नू । सबै गनिसक्दा जोडी अंकमा रैछ भने महाभियोगको पक्षमा, नत्र विपक्षमा लाग्नू ।
यी उपाय उपयुक्त लागेन ? लागेन भने अरू उपाय खोज्नू । जस्तो कि : शेरबहादुर देउवा महाभियोगको पक्षमा, रामचन्द्र पौडेल विपक्षमा लाग्नू । खुमबहादुर खड्का पक्षमा, कृष्ण सिटौला विपक्षमा लाग्नू । अरूले चाहिँ कसरी पक्ष–विपक्ष रोज्ने ? यसका लागि दुई अक्षरको थर भएकाले पक्षमा लाग्नू, तीन अक्षरको थरवालाले विपक्षमा, चार अक्षरको थर हुने पक्षमा लाग्नू । आहा ! यसो गर्यो भने साह्रै सजिलो हुने रैछ कांग्रेसलाई । अरू बेला पनि विवाद भयो भने यही विधिबाट हल गर्नू । तर, महाभियोगको हल यसरी हुन्न । सबैले एकै ठाउँ भोट हाल्नैपर्ने हुन्छ । त्यसो भए इष्टमित्रसँग सल्लाह लिनू । सल्लाहले पार्टीमा सहमति भएन भने छरछिमेकीको आदेश लिनू । आदेशले पनि काम नदिएर कसैले भित्तामा बीपी कोइरालाको फोटो राख्ने, कसैले लोकमानको फोटो राख्ने अवस्था भएमा के गर्ने ? कसै गर्दा पनि भएन भने यसो गर्नू, एउटा डाडु लिनू । डाडुमा पानी हाल्नू । डाडु आगोमा राख्नू । भकभकी उम्लेपछि सिंगो कांग्रेस पार्टीले त्यसमा डुबुल्की मार्नू ।
सम्बन्धित
अब हामी त्यता वरपर गस्ती गर्छौं । ढुंगाहरूमा लठ्ठीले हानेर आवाजहरू निकाल्छौँ, सुसेल्छौँ । ...
सुत्न दे इन्डिया !
स्रोतले कति पटक बिहान माधव नेपाललाई र दिउँसो प्रचण्डलाई प्रधानमन्त्री बनाइसक्यो । साँझमा प...
यस्ता अद्भुत समाचार मित्रहरूले कहाँबाट ल्याउँछन् ?
हामीले पूरा नहुने आशा गरेर आफ्नो स्वास्थ्य बिगार्नुभन्दा पूरा हुने सम्भावना भएका अपेक्षा ग...
नयाँ वर्ष नयाँ आइडिया
नेपालमा भने कोरोना नियन्त्रणको जिम्मा स्वास्थ्य मन्त्रालयले होइन, गृह मन्त्रालयले लिएजस्तो...
प्रहरी लगाऊ, कोरोना भगाऊ !
यो समय त नाकमा मास्क, आँखामा कालो चस्मा र कानमा ठेडी लगाएर चुपचाप घरमा बस्ने समय हो ।...
त्यत्तिकै भ्रष्टाचार भयो भन्ने ?
बाइकवालाले फुऽ गरेको त मापसे पोजिटिभ देखियो । ट्राफिकले समाइहाले । तर बाइकवालाले भने, ‘माप...