[झटारो] ध्यान भंग
समाचार आयो ओशो तपोवनले सरकारी जग्गा अतिक्रमण गर्यो । सरकारी जग्गा ताछेर निजी जग्गाको क्षेत्रफल बढायो ।
धेरैतिर प्रयास गर्दा पनि ध्यान नलागेपछि तपोवनतिर ध्यानतप गर्न जाने विचार गर्दै थिएँ, त्यही बेला समाचार आयो ओशो तपोवनले सरकारी जग्गा अतिक्रमण गर्यो । सरकारी जग्गा ताछेर निजी जग्गाको क्षेत्रफल बढायो । वनमा आफूखुसी सडक पुल बनायो । सन्यासीहरूको संस्थाले सरकारी नियम कानुन उल्लंघन गर्दै व्यापार व्यवसाय गर्यो । यस्तो समाचार आएपछि ध्यानमा जाने विचार त्यागी ओछ्यानमा बसेर सोच्न थालेँ ।
मलाई धेरैले योगी, सन्यासी, माता, बाबाहरूको संगत गरे शरीर र मन दुवैलाई फलीफाप हुन्छ भनेर सल्लाह दिन्छन् । मलाई पनि यो कुरा ठीकै लागेको हो । बेलाबेला विभिन्न थरीका बाबा, साधु सन्त, महात्मा र माताहरूका पार्टी कायकर्ताले भक्त बनाउन तानातान पनि गरिरहन्छन् । केही पटक केही शिविरहरूमा गएर ध्यान गर्ने प्रयास पनि नगरेको होइन । तर, मलाई ध्यान लाग्दै लागेन । ध्यान गराउने गुरु भन्छन् “आँखा चिम्लेर ध्यान गर बालक । आँखा चिम्ले पनि तिमीले केही न केही देख्नेछौँ । रातो, पहेँलो, कालोजस्ता विभिन्न रंग र अनेक आकृतिहरू तिम्रा आँखाअगाडि आउनेछन् । ती भित्री आँखाले देखिएका दृष्यहरू हुन् । हामीले भित्री आँखा खोलेर यो संसारलाई हेर्नुपर्छ ।”
गुरुले यसरी भित्री आँखा खोल्न निर्देशन दिएपछि म बाहिरी आँखा चिम्लन्छु । आँखा चिम्लन पाएको छैन– रातो, सेतो, पहेँलो, गेरु अनेक रंगका वस्त्रधारी र कतिपय लुगै नलगाएकासमेत अनेक ढंगका बाबाहरू, स्वामीहरू, सन्त, महन्तहरूलाई देख्न थाल्छु । लुगा नलगाएका सन्तहरूले मेरो ध्यान तुरुन्तै भंग गरिदिन्छन् ।
फेरि ध्यानमा बस्ने बारेमा सोच्दै गर्दा सञ्चारमाध्यमहरूले मस्तिष्क नै बिथोलिदिन्छन् । हामी सर्वसाधारणभन्दा धेरै माथि पुगेर आचार्य, स्वामी, बाबा, गुरु, माता बनेका सन्त महात्माहरूले देशको महत्त्वपूर्ण सम्पदा वनजंगल, राष्ट्रिय निकुञ्जहरू मासेर आफ्ना निजी आश्रमहरू बनाएका समाचार सञ्चारमाध्यमहरूले प्रकाशन प्रसारण गर्छन् । सार्वजनिक जमिन अतिक्रमण गरेर व्यापार चलाएका समाचारहरू आउँछन् । बलात्कार गर्नेदेखि आफैँले आफैँलाई गोली हानेर झ्यालखाना पर्नेसम्मका आचार्यहरू आफ्नै वरिपरि भेटिन्छन् । सरकारले कानुन पालना गराउन खोज्दा शक्तिकेन्द्रहरूको प्रयोग गरेर सरकारलाई नै उठबस गराउने सामथ्र्य भएका बाबाहरू पनि देखिन्छन् ।
संसारबाट बिरक्त भएर सन्यास ग्रहण गरेका सन्तहरू रेष्टुराँ चलाउँछन्, अस्पताल र स्कुल कलेजहरू सञ्चालन गर्छन् । उद्योगधन्दाहरू खोल्छन् । अथाह सम्पत्ति आर्जन गर्छन् । धनाढ्यहरूका सूचीमा पर्छन् । करोडौँ पर्ने गाडी चढ्छन्, निजी हेलिकप्टर र हवाईजहाज खरिद गर्छन् । कानुन मिच्छन्, कर छल्छन् । सम्पत्ति र शक्ति बढाउन सधैँ लालायित हुन्छन् ।
दुनियाँलाई अर्ती दिन्छन्, बुद्धि बाँड्छन्, घरघरमा फोटो टँसाउँछन्, पाउको पानी चखाउँछन् । संसारिक मायामोहबाट माथि उठेको भन्दै सन्यासी बन्छन्, गेरुवस्त्र लगाउँछन् अनि अर्को कुनै सन्तको वस्त्र उतार्न किन अघि सर्छन् ? अरुअरु समुदाय वा समूहको खोइरो किन खन्छन् ? भक्तहरूलाई काम, क्रोध, लोभ, मोह त्याग भन्छन् अनि आफैँ यौनकाण्डहरूमा किन पर्छन् ? सन्यासीहरू सिरानेमा किन हातहतियार राख्छन् ? राजनीतिक दलहरूभन्दा बढी गुटहरू यस्ता संस्थामा किन जन्मिन्छन् ? यस्ता अनेकअनेक प्रश्न दिमागमा घुम्न थालेपछि कसरी ध्यान लागोस् ! यो जुनीमा ध्यान लाग्ला र ध्यानी, ज्ञानी र स्वस्थ्य बनौँला भन्ने मैले चाहिँ नसोचे पनि हुने भयो ।
सम्बन्धित
अब हामी त्यता वरपर गस्ती गर्छौं । ढुंगाहरूमा लठ्ठीले हानेर आवाजहरू निकाल्छौँ, सुसेल्छौँ । ...
सुत्न दे इन्डिया !
स्रोतले कति पटक बिहान माधव नेपाललाई र दिउँसो प्रचण्डलाई प्रधानमन्त्री बनाइसक्यो । साँझमा प...
यस्ता अद्भुत समाचार मित्रहरूले कहाँबाट ल्याउँछन् ?
हामीले पूरा नहुने आशा गरेर आफ्नो स्वास्थ्य बिगार्नुभन्दा पूरा हुने सम्भावना भएका अपेक्षा ग...
नयाँ वर्ष नयाँ आइडिया
नेपालमा भने कोरोना नियन्त्रणको जिम्मा स्वास्थ्य मन्त्रालयले होइन, गृह मन्त्रालयले लिएजस्तो...
प्रहरी लगाऊ, कोरोना भगाऊ !
यो समय त नाकमा मास्क, आँखामा कालो चस्मा र कानमा ठेडी लगाएर चुपचाप घरमा बस्ने समय हो ।...
त्यत्तिकै भ्रष्टाचार भयो भन्ने ?
बाइकवालाले फुऽ गरेको त मापसे पोजिटिभ देखियो । ट्राफिकले समाइहाले । तर बाइकवालाले भने, ‘माप...