विश्वकप सपना
‘सुपर सिक्स’ पहिलो लक्ष्य
नेपाली क्रिकेटको जिम्बावे यात्रा विश्वकप छनोटलाई हो । प्रतिस्पर्धी अन्य नौ राष्ट्र यही प्रतियोगितालाई टेक्दै एकदिवसीय विश्वकपमा पुग्ने दाउमा छन् । नेपालले अहिलेसम्म ५० ओभरको विश्वकप खेलेको छैन । त्यसैले एक पाइला मात्र नजिक रहेको अवस्थामा विश्वकपमा पुग्ने सपना देख्नु स्वाभाविक हो । सपना पूरा भएमा त्यो नेपाली क्रिकेटको मात्र नभई नेपाली खेलकुदकै सवैभन्दा ठूलो सफलता हुनेछ ।
महत्त्वाकांक्षा भए पनि व्यावहारिक हिसाबमा नेपाललाई विश्वकपमा पुग्न निकै कठिन छ । हालै अर्को अफ्रिकी भूमि नामिबियामा भएको विश्व क्रिकेट लिग डिभिजन २ मा फाइनलमा पुग्दै नेपालको जिम्बावे यात्रा तय भएको हो । उपाधि भिडन्तमा युएईसँग नेपाल ७ रनले पछाडि परेको थियो । त्यसको मतलब जिम्बावेमा नेपाल १० राष्ट्र सहभागी प्रतियोगितामा सबैभन्दा तल्लो वरियता टोलीको रुपमा उत्रने छ ।
विश्वकप छनोटको फाइनलमा पुग्ने टोली अर्को वर्ष इंग्ल्यान्डमा हुने विश्वकपमा पुग्नेछन् । पहिलो पटक छनोटमा टेस्ट मान्यता टोली पनि प्रतिस्पर्धा गर्दैछन् । यसअघिका विश्वकपमा टेस्ट खेल्ने १० राष्ट्र विश्वकपका लागि सोझै छनोट हुन्थे । ८ टोली मात्र सोझै छनोट हुने नयाँ नियममा टेस्ट खेल्ने राष्ट्रले पनि छनोट खेल्नु परेको हो । विश्वकपमा सहभागी हुने १४ राष्ट्रबाट खुम्चाएर १० मा झार्दा एकदिवसीय वरियतामा शीर्ष ७ राष्ट्र सोझै विश्वकप पुगेका थिए । इंग्ल्यान्डलाई आयोजकको हिसाबमा सोझै प्रवेश दिइएको थियो ।
७० को दशकमा पहिलो दुई विश्वकप जितेको वेस्ट इन्डिज र टेस्ट वरियतामा पुछारमा रहेको जिम्बावे शीर्ष ८ मा परेनन् । अफगानिस्तान र आयरल्यान्ड यस वर्षदेखि टेस्ट क्लबमा छिर्दैछन् । एकदिवसीय वरियताबाट यी दुई राष्ट्र पनि सोझै विश्वकप छनोट हुन सकेनन् । पछिल्लो दुई वर्ष नेपालसँगै खेल्दै आएको नेदरल्यान्ड्सले विश्व क्रिकेट लिग च्याम्पियनसिप जितेर एकदिवसीय अन्तर्राष्ट्रिय मान्यता लिइसकेको छ । यिनै वेस्ट इन्डिज, जिम्बावे, अफगानिस्तान, आयरल्यान्ड, नेदरल्यान्ड्स, स्कटल्यान्ड, हङकङ, पपुवा न्यु गिनी, युएईसँग नेपालले विश्वकप छनोटमा प्रतिस्पर्धा गर्दैछ ।
छनोटमा नेदरल्यान्ड्स र नेपालसँग मात्र एकदिवसीय अन्तर्राष्ट्रिय मान्यता हुनेछैन । नेदरल्यान्ड्स यस प्रतियोगितापछि मात्र एकदिवसीय अन्तर्राष्ट्रिय मान्यता प्राप्त राष्ट्रमा सूचीकृत हुनेछ । नेपालले अझै ५० ओभरको मान्यता प्राप्त खेल खेल्न सकेको छैन । खासमा नेपालको जिम्बावे यात्रा त्यही एकदिवसीय अन्तर्राष्ट्रिय मान्यताका लागि हुनेछ । विश्वकपमा नै पुगेमा त्यो बोनस हुनेछ, जसको
कुनै मूल्य नै हुने छैन ।
“विश्वकप छनोट निकै कठिन प्रतियोगिता हो । सबै टोलीको लक्ष्य विश्वकपमा पुग्नु छ । दुई वटा टिम मात्र विश्वकपमा पुग्छन् । हरेक टोली उतिकै राम्रा छन् । चार टेस्ट खेल्ने राष्ट्र र च्याम्पियनसिपका शीर्ष चार राष्ट्र तथा नेपाल र युएई त्यही छन्,” कप्तान पारस खड्काको यही भनाइले नेपाल अहिलेसम्मकै सबैभन्दा कठिन प्रतियोगिता खेल्न गइरहेको प्रस्ट हुन्छ । उनी अगाडि भन्छन्, “विश्वकपमा पुग्न पाए नेपालीलाई त्यो सबैभन्दा ठूलो क्षण हुनेछ । यथार्थमा भन्नुपर्दा हाम्रो पहिलो लक्ष्य सुपर सिक्समा पुग्ने हो । सुपर सिक्समा पुगिसकेपछि विश्वकपको सपना देख्न सक्छौँ । तर, त्यो त्यत्ति सजिलो हुने छैन । कति टिमले त विश्वकपमा पुग्ने भनेर २ वर्षअगाडि नै तयारी सुरु गरिसकेका थिए । त्यसैले अहिलेको लक्ष्य भनेको एकदिवसीय अन्तर्राष्ट्रिय मान्यता पाउनु हो । मैदानमा गएर राम्रो खेल्न सक्नुपर्छ, त्यसभन्दा अगाडि केही भन्न सकिन्न ।”
नेपालले समूह चरणमा आयोजक जिम्बावे, अफगानिस्तान, स्कटल्यान्ड र हङकङसँग प्रतिस्पर्धा गर्नेछ । अर्को समूहमा वेस्ट इन्डिज, आयरल्यान्ड, नेदरल्यान्ड्स, पपुवा न्यु गिनी र युएई छन् । एउटा समूहबाट शीर्ष तीन टोली सुपर लिगमा पुग्ने छ । समूह चरणको अंक सुपर लिगमा पनि जोडिने छ । जस्तो जिम्बावे र आयरल्यान्डमाथि विजय हात पारेमा तथा यी दुई टोलीसँगै समूह चरणमा अगाडि बढेमा नेपालसँग चार अंक हुनेछ । यस्तोमा नेपालले सुपर लिगको तीनमध्येको एक खेल मात्र जितेमा मात्र पनि सेमिफाइनलमा पुग्न सक्छ । एकदिवसीय अन्तर्राष्ट्रिय मान्यता लक्ष्य छुन नेपाललाई सुपर लिगमा पुग्न जरुरी छ । अर्को विकल्प समूह चरणका सवै खेल हारे पनि प्लेअफको पहिलो खेल जितेमा रहने छ ।
विश्वकप छनोटमा नेपाल तेस्रो पटक सहभागी हुँदैछ । विगततर्फ फर्किने हो भने नेपालले यसपटक पनि कठिन चुनौती पाउने निश्चित छ । सन् २००१ मा क्यानाडामा भएको विश्वकप छनोटका लागि आयोजना गरिने आईसीसी ट्रफीमा नेपालले जिब्राल्टार र जर्मनीसँग विजय हात पारे पनि नेपाल समूह चरणबाट माथि जान सकेन । त्यसयता आईसीसी ट्रफी विश्वकप छनोटको नामले आयोजना हुँदैछ । नेपालले क्यानाडापछि एकै पटक २०१४ को विश्वकप छनोटमा सहभागिता जनायो । विश्व क्रिकेट लिग डिभिजन ४ र ३ जित्दै विश्वकप छनोट खेल्न न्युजिल्यान्ड पुगेको थियो । सहभागी १० राष्ट्रमा नवौँ भएपछि नेपाल रेलिगेसनमा पर्दै डिभिजन २ मा झरेको थियो ।
न्युजिल्यान्ड पुग्नुअघि नै पारस, सुवास खकुरेल घाइते भएका थिए । प्रतियोगिता चलेसँगै त्यो सूचीमा जितेन्द्र मुखिया पनि थपिए । सुरुको खेल गुमाएका पारस मैदानमा त फर्किए । तर, उनी पूरा तंग्रिन सकेका थिएनन्, जसको असर उनको प्रदर्शनमा देखिन्थ्यो । पारस त्यो प्रतियोगितालाई अहिलेको टोलीसँग तुलना गर्दै भन्छन्, “पछिल्लो विश्वकप छनोटमा हाम्रो केही सीप लागेन । ३–४ जना प्रमुख खेलाडी घाइते भएपछि हामीलाई पुनरागमन गर्न गाह्रो भयो । हाम्रो टिम त्यो स्तरका लागि अलिकति अपरिपक्व पनि थियो जस्तो लाग्छ । हामीले त्यत्तिखेर पहिलो पटक डिभिजन १ का टोलीसँग प्रतिस्पर्धा गरेका थियौँ । २०११–१२ देखि हामी निरन्तर माथिल्लो स्तरमा पुगेर खेल्दै आएका थियौँ । पारस आगडि भन्छन्, “तर, एक पटक त्यो स्तरमा खेल्दा गाह्रो भएको थियो । बिस्तारै बिस्तारै हामी फेरि त्यो स्तरमा पुगेका छौँ । २–३ वर्ष विश्व क्रिकेट लिग च्याम्पियनसिपमा आफ्नो स्तरको टिमसँग खेल्यौँ । त्यसबाहेक राम्रो स्तरका टिम र राम्रो प्रतियोगिता खेलेकाले पहिलाको भन्दा अहिले हामीलाई एक्सपोजर बढी छ ।”
विश्वकप छनोटबाट रेलिगेसनमा परेकाले नेपालले डिभिजन २ खेल्नु परेको थियो । डिभिजन २ मा चौथो भएसँगै नेपालले विश्व क्रिकेट लिग च्याम्पियनसिप खेल्न पायो । च्याम्पियनसिपको ८ मध्येको शीर्ष ४ टोली विश्वकप छनोटमा पुग्थ्यो । नेपाल नामिबियाभन्दा मात्र अगाडि रहेपछि पुन: रेलिगेसनमा पर्दै डिभिजन २ मा झरेको थियो । डिभिजन २ को फाइनल पुगेपछि नेपाल अहिले फेरि विश्वकप छनोटमा पुगेको हो । पारसको भनाइ नेपालले डिभिजन २ लगत्तै विश्वकप छनोट खेल्नुपर्दा अन्य टोलीले जस्तो तयारी गर्न नपाएको भन्ने पनि छ ।
पारसको भनाइसँग खासै फरक मत छैन प्रशिक्षक जगत टमाटाको । “हाम्रो पहिलो लक्ष्य सुपर सिक्समा जाने छ । त्यसमा सम्भावना पनि छ । हामीलाई केही डर छैन । तर, हाम्रा प्रतिद्वन्द्वीलाई त्योभन्दा बढी डर छ । नेपाल कुनै पनि समयमा क्लिक हुनसक्छ भन्ने उनीहरूलाई छ,” टमाटा भन्छन्, “अहिलेसम्म राम्रो खेल्दै आएका छौँ, अब अझ राम्रो खेल्नु पर्छ नतिजा निकाल्न । राम्रो खेल्न हामीले विश्वकप छनोट जस्तो उत्कृष्ट प्लेटफर्म पाएका छौँ । डिभिजन २ बाट हामी विश्वकप छनोटमा पुगेका पनि छौँ । तर, सजिलो केही छैन । डिभिजन २ को प्रदर्शनले यस्तो प्रतियोगितामा नपुग्न सक्छ । आगामी दिनमा अझ कठिन मिहिनेत गर्नुपर्छ । चुनौती धेरै छन् ।”
एकदिवसीय अन्तर्राष्ट्रिय मान्यता पाउन पनि नेपालले ब्याटिङमा निकै सुधार गर्नुपर्ने हुन्छ । ओपनिङ जोडी ज्ञानेन्द्र मल्ल र दिलिप नाथ अझै जम्न सकेका छैनन् । नेपाली ब्याटिङ कप्तान पारस खड्कामा धेरै भर पर्नुपरेको छ । युवा ब्याट्सम्यानद्वय आरिफ शेख र रोहित पौडेलले डिभिजन २ मा नेपाली ब्याटिङलाई नयाँ आशा दिएका थिए । डिभिजन २ मा नेपालले ४ मध्येको दुई खेल जित्दा वसन्त रेग्मी र करण केसीको ब्याट चम्किएको थियो । जबकि, उनीहरू प्रमुख रूपमा बलर हुन् । वसन्त र सन्दीप लामिछाने नेपालको बलिङको प्रमुख आधार बन्न सक्छन् । सन्दीप १७ विकेट लिँदै डिभिजन २ मा म्यान अफ द सिरिजमा चुनिएका थिए । सोमपाल कामी र करणको तीब्र बलिङ पनि आशा गर्ने ठाउँ हो ।
अनुभवी ब्याट्सम्यानहरू पारस, ज्ञानेन्द्र, शरद भेस्वाकरका साथै युवा जोश दीपेन्द्रसिंह ऐरीले लय लिएमा नेपाल विपक्षीका लागि ठूलो प्रतिद्वन्द्वी बन्नसक्छ । हङकङसँगको अभ्यास खेल वर्षाले बिथोलिए पनि युएईसँगको अभ्यास खेलमा नेपाली ब्याटिङले केही आशा देखाएको छ । त्यसैले नेपाली क्रिकेटका बारेमा केही भन्न सकिन्न । डिभिजन २ मा नेपालले चारमध्येको तीन खेल अन्तिम ओभरमा जितेको थियो । एकदिवसीय अन्तर्राष्ट्रिय मान्यता लक्ष्य भए पनि यस्तै नतिजा आएमा नेपाल विश्वकपमै नपुग्ला भन्न सकिन्न ।
सम्बन्धित
कोभिड १९ पछि नेपाली खेलकुदलाई पुरानै लयमा फर्काउने चुनौती ...
खेलकुदमा वर्ष ०७६ लाई फर्केर हेर्दा
१ सय २४ वर्षभन्दा लामो इतिहास बोकेको आधुनिक ओलम्पिकमा प्रतियोगिता स्थगित भएको यो दोस्रो घट...
कोरोना संक्रमणको असरले खेल गतिविधिमा कस्तो असर ?
दुई महान् पिताका पुत्रहरू पनि फुटबलप्रति उति नै रुचि राख्ने भएका छन् । रोनाल्डोका छोरा क्र...
रोनाल्डोका छोराका आदर्श मेसी, मेसीका छोरा रोनाल्डोका प्रशंसक
नेपालको थाइल्यान्ड यात्रा नमीठो सम्झना...
एसिया कप खेल्ने सपनामा यसरी लाग्यो तगारो
एक महिना महत्त्वपूर्ण प्रतियोगिता खेल्न नसक्ने स्थितिमा नेपाल ...
महिला भलिबलका तीन हस्ती नै चोटग्रस्त
आर्मीको खेल साँच्चै नै उम्दा थियो, यो सिजनको लिगमा । डिफेन्स र गोलरक्षणमा निकै बलियो । आर्...