दाताको चन्दाले चलिरहेका वृद्धाश्रममा आश्रितलाई खाना जुटाउनै सकस
कोरोना भाइरसबाट ज्येष्ठ नागरिक सबैभन्दा असुरक्षित छन् । काठमाडौंका वृद्धाश्रममा सुरक्षा प्रबन्ध के छ ?
आँखामा मोतियाबिन्दु भएपछि उपचारका लागि चन्द्रकुमारी उप्रेती, ७७, नुवाकोटको खरानीटारबाट तीलगंगामा उपचार गर्न आइन् । दुवै आँखाको उपचार र फलोअपमा डाक्टरलाई भेटेपछि घर फर्कने समय हुँदा कोभिड–१९ का कारण देश पूरै लकडाउनमा परिसकेको थियो । नाति प्रवीण लकडाउनका कारण हजुरआमा घर जान नपाएको सुनाउँछन् । भन्छन्, “घर जान पास चाहिन्छ, पासको व्यवस्था गर्न सकेको छैन । गाउँ जान पाएको भए सुरक्षित रहनुहोला कि जस्तो लाग्छ ।”
चन्द्रकुमारीका छोरा–बुहारी गाउँमै बस्छन् तर काठमाडौँ बस्ने ठाउँ पनि छ । नातिनी बुहारी अस्पतालमा काम गर्ने हुँदा ज्येष्ठ नागरिकमा कोरोना भाइरसबाट बढी प्रभावित भएकाले अहिले उनी आफन्तकहाँ बसिरहेकी छन् । पारिवारिकबाहेक राज्यका तर्फबाट कुनै सहयोग नआएको प्रवीण सुनाउँछन् । भन्छन्, “एम्बुलेन्समा लैजान ८– १० हजार माग्छन् । यस्तो संकटमा त्यत्रो पैसा कहाँ हुनु ?” आँखाले देखिन्जेल लकडाउनको पालना, त्यसपछि मनलाग्दी मानिसको चहलपहल देख्दा प्रवीण हजुरआमाको स्वास्थ्यलाई लिएर चिन्तित छन् ।
०६८ को जनगणनाअनुसार देशैभर ६० वर्ष नाघेका नागरिकको संख्या २१ लाख हाराहारी छ । सबै ज्येष्ठ नागरिकले घरपरिवारसँग बस्न पाएका छैनन् । कैयौँ ज्येष्ठ नागरिक वृद्धाश्रम र केन्द्रहरूमा बस्दै आएका छन् । महिला, बालबालिका तथा ज्येष्ठ नागरिक मन्त्रालयका अनुसार देशभर १ सयभन्दा बढी संस्था छन्, जसमा हजारौँ ज्येष्ठ नागरिक आश्रित छन् । सशुल्क र नि:शुल्क दुवै किसिमका यी आश्रम प्राय: दाताहरूबाट सञ्चालित छन् ।
आश्रममा हलचल बन्द
मानवसेवा आश्रम ७ वटै प्रदेशको १८ ठाउँमा स्थापित छ । आश्रममा बालबालिकादेखि ज्येष्ठ नागरिकसहित ११ सय आश्रित छन् । सडक, पाटी–पौवा र मन्दिरबाट उद्धार गरिएका यी नागरिकलाई आश्रमले पालिरहेको छ । विषम परिस्थितिमा सरकारबाट कुनै प्रकारको सहयोग प्राप्त नभएको आश्रमका प्रमुख संरक्षक एवं संस्कृतिविद् गोविन्द टन्डन बताउँछन् । यस्तै गुनासो छ– मातातीर्थ वृद्धाश्रमका कार्यालय प्रमुख रामबहादुर थापाको । भन्छन्, “सामानको लिस्ट दिएर कति पटक ताकेता गरेपछि २० चैतमा मात्र ५–५ लिटर स्यानिटाइजर र हात धुने डिटोल पाइयो ।”
मातातीर्थ आश्रममा डेढ महिनाका लागि रासनको जोहो भइसकेको छ । तर खाना पकाउने इन्धन करिब १५ दिनलाई मात्र पुग्ने हुँदा उनी चिन्तित छन् । मासिक ३ वटा ग्यास खपत हुन्छ, आश्रममा । कोरोनाबारे अन्योल बढेका कारण ग्यास नपाइएला कि भन्ने चिन्ताले उनलाई खाएको छ । सरकारले एकद्वार प्रणालीबाट सामान दिने भनिरहेको छ । थापा भन्छन्, “स्थानीय तह, प्रदेश र संघ मिलेर काम गरे मात्रै आपूर्ति सहज हुनेछ ।”
सरकारले ज्येष्ठ नागरिकलाई नि:शुल्क स्वास्थ्योपचारको व्यवस्था गरेको छ । तर आश्रममा बस्ने आमाहरू लावारिस, सडकबाट उद्धार गरिएकाले उनीहरूसँग नागरिकता छैन । समाज कल्याणसँग यसबारे सहयोग गर्न पटक–पटक ध्यानाकर्षण गराउँदा पनि कुनै सहयोग नपाएको थापा सुनाउँछन् ।
एक मात्र सरकारी वृद्धाश्रमको रूपमा रहेको पशुपति वृद्धाश्रममा १ सय ४० वृद्धवृद्धा बस्छन् । लकडाउन भएपछि वृद्धाश्रममा मानिसको चहलपहल नियन्त्रण गर्न रोक लगाइएको आश्रमका कर्मचारी निरन तामाङ जानकारी दिन्छन् । भन्छन्, “चहलपहल कम गर्न १७ जना स्टाफ पनि यही बस्छन् । बुबाआमालाई पनि बाहिर निस्कन दिएका छैनौँ । ठाउँ–ठाउँमा साबुनपानी राखिदिएका छौँ, हात धुन ।”
मानवसेवा आश्रमले पनि सुरक्षाका लागि आवतजावतमा रोक लगाएको छ । आवश्यक पर्ने मास्क, डिटोल, स्यानिटाइजर, पन्जा व्यवस्था गरेको संरक्षक प्रमुख टन्डनले बताउँछन् । भन्छन्, “आश्रममा ज्येष्ठ नागरिकलाई कोरोनाबारे सुसूचित गराउने काम भइरहेको छ । कतिले जहाँतहीँ थुक्नुहुन्न भनी बुझेका छन् । हात सफा गरिरहन्छन् । कतिचाहिँ यस्तै हो, चल्दै छ, भगवान् भरोसा भनी हेलचेक्र्याइँ गरिरहेका छन् ।”
मातातीर्थ वृद्धाश्रममा २० जना आमाहरू बस्छन् । ५ वर्षदेखि आश्रममा बस्दै आएकी ६६ वर्षीया विन्दु साहको परिवार र आफन्त कोही छैन । कोरोनाबारे सुन्दा डर लागेको उनले टेलिफोनमा बताइन् । भन्छिन्, “अब कस्तो रोग हो, थाहा छैन । यहाँ फोहोरी भएर नबस्नू भन्छन् । हातमुख धोइरहेछौँ ।”
छैन छुट्टै रणनीति
कोरोना भाइरसबाट विश्वमै सबैभन्दा बढी ज्येष्ठ नागरिक असुरक्षित भइरहेका छन् । भाइरसबाट संक्रमित भएकाहरूको तथ्यांक हेर्दा त्यही देखाउँछ । एक तथ्यांकअनुसार कोरोनाबाट ८० भन्दा माथि उमेरका १४.८ प्रतिशत, ७० देखि ७९ मा ८ प्रतिशत, ६० देखि ६९ मा ३.६ प्रतिशत र ५० देखि ५९ मा १.३ प्रतिशतको मृत्यु भएको छ ।
विश्वमै ज्येष्ठ नागरिकको जनसंख्या बढी भएको देश जापान हो भने दोस्रोमा इटाली । इटालीमा कोरोना भाइरसबाट सबैभन्दा पहिले ज्येष्ठ नागरिक संक्रमित भएका थिए । इटालीमा अहिले १ लाख १० हजार ५ सय ७४ संक्रमित भइरहेका छन् भने १३ हजार १ सय ५५ को मृत्यु भइसक्यो । उमेर बढ्दै गएपछि आत्मप्रतिरक्षा पनि कम हुने हुँदा संसारभर नै ज्येष्ठ नागरिकको स्वास्थ्य जोखिममा परेको विज्ञहरूको बुझाइ छ । तसर्थ ज्येष्ठ नागरिकलाई लिएर छुट्टै प्रकारको रणनीति अपनाउनुपर्ने देखिन्छ ।
महिला, बालबालिका र ज्येष्ठ नागरिक हेर्ने समाज कल्याण परिषद्का प्रवक्ता शिवकुमार बस्नेत ज्येष्ठ नागरिकको अवस्थाबारे जानकारी लिइरहेको बताउँछन् । विषम परिस्थितिमा चुस्त काम गर्न परिषद्सँग रणनीति देखिँदैन । राहत वितरण गर्न मन्त्रालयका सबै अधिकृत स्तरका कर्मचारीको समूह बनाएको उनी सुनाउँछन् ।
बस्नेतका अनुसार गैरसरकारी संस्थाहरू वन हार्ट वल्र्डबाट २६ करोड बराबरका औषधी उपकरण र एआईएनबाट २ अर्ब ५० करोडका सामान स्वास्थ्य मन्त्रालयलाई आउँदै छ । भन्छन्, “राहत वितरण एकद्वार नीतिबाटै गर्दै छौँ । नागरिकता, यो वा त्योको बहानामा कसैलाई राहतबाट वञ्चित गर्दैनौँ ।”
महिला, बालबालिका तथा ज्येष्ठ नागरिक मन्त्रालयका सहसचिव ज्ञानेन्द्र पौडेल लकडाउनयता ज्येष्ठ नागरिक मिलन केन्द्रमा भेटघाट कार्यक्रम बन्द गरेको जानकारी दिन्छन् । पौडेलका अनुसार मन्त्रालयले राहत बाँड्ने भन्दा पनि आएको राहत वितरणमा सहजीकरण र समन्वय गरिरहेको छ ।
१७ चैतमा स्वास्थ्य मन्त्रालयले दिएको निर्देशनअनुसार बालबालिका, अपांगता भएका व्यक्ति, महिला र ज्येष्ठ नागरिकको सुरक्षाका लागि विशेष ध्यान दिन पहल भएको सहसचिव पौडेल सुनाउँछन् । भन्छन्, “यी व्यक्तिहरूले न्यूनतम सेवा–सुविधा खाद्यान्न, इन्धन, औषधोपचार, मास्क तथा स्यानिटाइजर पाउनुपर्छ । यसका लागि स्थानीय प्रशासन र आश्रम सञ्चालकबीच समन्वय गरिरहेका छौँ ।” गैरसरकारी संस्थाले सहयोग गरे सामान ढुवानी गर्न भन्सार छुटदेखि मूल्यवृद्धि करमा पनि सहयोग गर्ने उनको भनाइ छ ।
विगतमा पनि विपद्का बेला सरकारले एकद्वार नीति अपनाएको थियो । यसले राहतको सन्तुलनभन्दा पनि भ्रष्टाचार बढी भएपछि सरकारकै बेइज्जत भएको थियो । हेरौँ, यसपालि सरकारले ज्येष्ठ नागरिकका नाममा आएका राहतलाई कसरी परिचालित गर्छ ?
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...