रेड जोनमा सुदूरपश्चिम, प्रदेश ५ र २, कोरोना भाइरसविरुद्ध बन्दोबस्तीका १० तथ्य #Explainer
नेपालको कुन क्षेत्र कोरोनाको रेड जोन ? विदेशबाट कति आए ? स्वास्थ्यकर्मीका लागि कति छ पीपीई ? स्वास्थ्य परीक्षणका लागि कति छ किट ? कोरोना संक्रमणबारे बुझ्नैपर्ने १० तथ्य
‘जुलाई अन्त्यसम्म ३० देखि ५० करोड भारतीय कोरोना भाइरसबाट संक्रमित हुनेछन् र ती १० प्रतिशत अर्थात् करिब ५ करोडमा गम्भीर असर देखिनेछ । अध्ययनबाट प्राप्त प्रक्षेपणमा संक्रमितको संख्या निकै कम अनुमान लगाउँदा पनि भारतमा एक करोड कोरोना भाइरसका सिकिस्त बिरामी हुन्छन् ।’
भारतीय मूलका अमेरिकी अर्थशास्त्री तथा महामारीविज्ञ रामानन लक्ष्मीनारायणले द न्युयोर्क टाइम्समा आलेख लेखेर सचेत गराएको धेरै भएको छैन । सेन्टर अफ डिजिज डाइनामिकका निर्देशकसमेत रहेका लक्ष्मीनारायणको टोलीले भारतको स्वास्थ्य संरचना पनि उदांगो पारिदिएका छन् ।
जस्तो, कोरोनाका कारण भारतमा १ करोड मानिस अस्पताल भर्ना हुनुपर्ने हुन सक्छ तर त्यहाँ १ लाखभन्दा कम इन्टेन्सिभ सेवाका लागि उपयुक्त शैय्या र २० हजार भेन्टिलेटर छन् । भएका पनि सहरकेन्द्रित छन् । त्यस कारण इटालीमा जस्तो महामारी फैलिए चिकित्सकले छानेर मात्रै बिरामीलाई सेवा दिनुपर्ने अवस्था आउने प्रक्षेपण लक्ष्मीनारायणको टोलीले गर्दै गर्दा भारतमा जोखिमको घन्टी बजिसकेको छ ।
यसको संकेत मुम्बईको १० लाखभन्दा बढी बस्ने एक सुकुम्बासी टोल, जहाँ कोरोना संक्रमण देखिएको छ । त्यसको नियन्त्रण भारतका लागि अहिले निकै चुनौतीपूर्ण छ ।
सानोतिनो बेवास्ता र हेलचेक्र्याइँले मात्रै पनि सिंगो देश आक्रान्त बन्नेछ । उनीहरूले भनेका छन्– अहिलेको लकडाउन कडाइपूर्वक लागू भए ७० देखि ८० प्रतिशत संक्रमण रोकिन सक्छ । यद्यपि, अप्रिल अन्तिम साता र मे महिनाको सुरु समय प्रकोपले विकराल रूप लिने प्रक्षेपण गरेको छ ।
महामारी प्रकोपको प्रक्षेपण जेजस्तो भए पनि सतर्क र सचेतना, पूर्वतयारी भने अनिवार्य हुन्छ, जुन भारतले २१ दिने लकडाउनबाट गरिरहेको छ । त्यसबाट हुने आर्थिक क्षतिको पूर्वानुमान गरेर प्रधानमन्त्री, मन्त्री र सांसदको तलब ३० प्रतिशतले कटौती गरेको छ । सांसद विकास कोष निलम्बन गरेको छ ।
भारतको बाछिटाले भिज्ने नेपालको परिस्थिति कस्तो छ त ? अहिलेसम्म गम्भीर अध्ययन भएको छैन तर भारतीय प्रभावले यो अछुतो हुने छैन ।
कामभन्दा हल्ला बढी गर्ने नेपाल सरकारसँग अहिले पनि पर्याप्त स्वास्थ्य सामग्री छैन । अस्पतालमा शैय्याको भर छैन । आईसीयू र भेन्टिलेटर भगवान भरोसामा छन् । चिकित्सकहरूको मनोबल कमजोर छ, उत्प्रेरित गर्ने सरकारी हाकिम उल्टै गाली गरिरहेका हुन्छन् । संक्रमण जोखिममा रहेकाहरूमा सचेतना कमी छ ।
सरकारले मास टेस्ट अर्थात् आम परीक्षणलाई तीव्र पारेको छ, न त कन्ट्याक्ट ट्रेसिङलाई जोड दिएको छ । संघ, प्रदेश र स्थानीय तहका जनप्रतिनिधि नै तयारीभन्दा बढ्ता तर्कमा जोडिएका छन् । एकछिन सोचौँ, १ लाख नेपाली मात्रै संक्रमित भए के हालत होला ? सौभाग्य नै ठान्नुपर्छ, नेपाल महामारीको पहिलो, दोस्रो वा तेस्रो देश भएन, जसले हामीलाई पूर्वतयारीका लागि पर्याप्त समय दिएको छ । सोच्नुपर्यो– हामी कम्तीमा अन्तिम हुन नपरोस् ।
नेपालको बन्दोबस्तीका १० तथ्य यस्ता छन् :
१) कुन क्षेत्र कोरोनाको रेड जोन ?
लकडाउनको आज १५ औँ दिन हो । यसबीच जम्माजम्मी ९ जना कोरोना संक्रमित बिरामी पहिचान भए, जसमध्ये १ जना उपचारपछि घर गइसकेका छन् भने बाँकी ८ जना अस्पतालमा उपचाररत छन् । संक्रमित ९ जनालाई आधार मान्दा दुई क्षेत्रमा संक्रमणको संख्या देखिन्छ । पहिलो– कोरोना संक्रमित देशबाट भर्खर नेपाल आएकाहरू । दोस्रो– सुदूरपश्चिम प्रदेश ।
कैलालीमा विदेशबाट आएका व्यक्तिबाट आफन्त पनि संक्रमित भए । त्यसबाहेक यो क्षेत्रमा अन्य ३ जना पनि संक्रमित देखिए । अर्थात्, अहिले सुदूरपश्चिम प्रदेशमा ४ जना संक्रमित छन् ।
स्वास्थ्य मन्त्रालयका विज्ञ सल्लाहकार खेम कार्कीका अनुसार सुदूरपश्चिम प्रदेश, प्रदेश ५ र प्रदेश २ उच्च जोखिम क्षेत्रमा पर्छन् । जिल्लागत रूपमा अहिले सरकारले कञ्चनपुर, कैलाली र बाग्लुङ मात्र होइन, अछाम, डोटी र जुल्ला पनि जोखिम क्षेत्रमा राखेको छ, जहाँ नेपाली सेनाले स्वाब संकलन तयारी गरेको छ ।
२) विदेशबाट कति आए ?
खाडी मुलुक, भारत र अन्य तेस्रो विश्वबाट नेपाल आउनेको यकिन संख्या छैन । यद्यपि त्यसरी नेपाल आउनेको संख्या ४ लाखभन्दा बढी अनुमान छ । १८ फागुनदेखि १० चैत ०७६ सम्म हवाई मार्गबाट करिब १ लाख नेपाल प्रवेश गरेका छन् । तीमध्ये ३४ हजार विदेशी नागरिक छन् । चैत पहिलो साता मात्रै २० हजारभन्दा बढी नेपाल प्रवेश गरेका छन् ।
सडक मार्गबाट चैत पहिलो साता अर्थात् लकडाउन सुरु भएको दिनसम्म सुदूरपश्चिम प्रदेशको गौरीफन्टा, गड्डाचौकी नाकाबाट मात्रै १ लाख ३२ हजार प्रवेश गरेको तथ्यांक छ । तर ससाना नाकाबाट छिरेका तथा र स्थानीय तहको तथ्यांकमा नआएकाको संख्यासमेत थपिँदा कम्तीमा डेढ लाख नाघ्ने अनुमान छ ।
प्रदेश २ को वीरगन्ज, प्रदेश ५ को सुनौली अनि प्रदेश १ को काँकडभिट्टा, जोगवनीलगायतका पूर्वी नाकाबाट आउनेको संख्या पनि प्रशस्त छ । तर स्थानीय तहले अहिलेसम्म करिब ६५ हजार मात्रै पहिचान गरेका छन् । त्यसमध्ये संघीय मामिला तथा सामान्य प्रशासन मन्त्रालयमा करिब ५८ हजार ८ सयको तथ्यांक आइपुगेको छ, जुन स्थानीय तहको निगरानीमा छन् ।
३) स्वास्थ्यकर्मीका लागि कति छ पीपीई ?
पीपीई अर्थात् पर्सनल प्रोटेक्टेड इक्युपमेन्ट । बिरामीको उपचार क्रममा स्वास्थ्यकर्मीले लगाउने कपडालाई पीपीई भनिन्छ, जुन सरुवा रोग उपचारका क्रममा चिकित्सकका लागि अनिवार्य हुन्छ । कोरोना संक्रमणका बेला त झनै अनिवार्य भयो ।
चीनबाट खरिद गरेको १० हजार थान र अन्य १० हजार गरी २० हजार थान पीपीई ७ वटै प्रदेशका अस्पताललाई वितरण गरिएको छ । त्यसबाहेक स्वास्थ्य मन्त्रालयसँग ३ हजार थान मौज्दात छ । ती आकस्मिक प्रयोगका लागि राखिएको मन्त्रालयका विज्ञ सल्लाहकार खेम कार्की बताउँछन् । २४ चैतमा वसन्त चौधरीले १ हजार पीपीई स्वास्थ्य मन्त्रालयलाई दिएपछि मौज्दातको संख्या ४ हजार पुगेको छ । तर सरकारले चीनबाट खरिद गरेका पीपीईको सेटमा भने समस्या छ । ती पीपीई सेटमा चस्मा र पन्जालगायत सामग्री छैनन् ।
नेपालगन्ज मेडिकल कलेज सञ्चालक सुरेशकुमार कनौडिया स्वास्थ्य मन्त्रालयले दिएका पीपीईको धेरै सेटमा चस्मा र पन्जा नभएकाले स्थानीय सामग्री प्रयोग गरेको बताउँछन् । हरेक प्रदेशमा पठाएको सरकारले ठूला अस्पतालमा २० सेट पनि पुगेको छैन । तर विडम्बना के भने पीपीईसमेत सरकारसँग माग गर्ने निजी अस्पतालको सामाजिक दायित्वमाथि गम्भीर प्रश्न उठ्छ । अहिले महावीर पुनको राष्ट्रिय अनुसन्धान केन्द्रले पीपीई बनाउन सुरु त गरेको छ तर विश्वसनीयता कायम भइसकेको छैन ।
४) कति छ किट ?
कोरोनाका शंकास्पद बिरामीको स्वाब परीक्षण गर्न प्रयोग गरिने पोलिमर चेन रियाक्सन (पीसीआर) अहिले १० हजार जनालाई पुग्ने परिणाममा छ । तर ७५ हजारलाई पुग्ने र्यापिड टेस्ट किटको गुणस्तरमाथि प्रश्न छ । यस्तो टेस्टले धेरै पोजेटिभ र धेरै नेगेटिभ पनि देखाउन सक्छ ।
र्यापिड टेस्टपछि अनिवार्य पीसीआर टेस्ट गरिन्छ, जसले संक्रमित पहिचान गर्न सहज होस् । यस्तो टेस्टले करिब १२ मिनेटमै नतिजा दिन्छ । कैलाली, कञ्चनपुर र बाग्लुङमा र्यापिड टेस्ट गरिँदै छ ।
५) क्वारेनटाइनमा कति छन् ?
अनुमानित ४ लाख व्यक्ति हवाई र स्थलमार्गबाट नेपाल प्रवेश गरे पनि ९ हजार १ सय ६८ जना मात्रै क्वारेन्टाइनमा छन् । स्थानीय तहको बेवास्ता र स्वयं व्यक्तिको चेतना अभावले क्वारेन्टाइनमा बस्नेको संख्या न्यून छ । बरु उल्टै नाचगान, मेलापात मात्र होइन, खेलकुद कार्यक्रमसमेत आयोजना गरेर भीड बटुल्न उनीहरू नै लागेका छन् । सोही कारण संक्रमणलाई मलजल गरिरहेको छ । स्वास्थ्य मन्त्रालयका अनुसार संक्रमण आशंकामा आइसोलेसनमा रहेका १ सय ७ जनाको रिपोर्ट आइसकेको छैन ।
६) अस्पतालमा कति शैय्या छन् ?
सरकारी र निजी अस्पताल तथा मेडिकल कलेजमा करिब २५ हजार शैय्या छन् । त्यसमध्ये काठमाडौँ उपत्यकामा ६ हजार ९ सय ३६ शैय्या छन् । निजी अस्पताल तथा मेडिकल कलेज सञ्चालक एसोसिएसनका पूर्वअध्यक्ष सुरेशकुमार कनौडियाका अनुसार करिब ६० प्रतिशत शैय्या निजी अस्पतालका हुन् । तर कोरोना बिरामीको संख्या बढेको अवस्थामा अस्पतालमा शैय्याको समस्या हुन नदिने कनौडिया दाबी गर्छन् ।
७) आईसीयु कति छन् ?
देशभर आईसीयुको संख्या यकिन छैन । हालै स्वास्थ्य मन्त्रालयले बटुलेको संख्याअनुसार काठमाडौँ उपत्यकामा २ सय ९८ वटा छन् । मन्त्रालयका विज्ञ सल्लाहकार कार्की काठमाडौँमा २ सय ६० वटा थप्न सकिने अवस्था रहेको बताउँछन् । तर उपत्यकाबाहिरको संख्या मन्त्रालयमा आइसकेको छैन ।
अस्पतालसँग जम्मा शैय्या संख्याको ५ प्रतिशत आईसीयु शैय्या हुनुपर्छ । बिर्तामोड, विराटनगर, धरान, जनकपुर, चितवन, हेटौँडा, पोखरा, बुटवल, नेपालगन्ज, धनगढीमा पनि आईसीयूको व्यवस्था छ । थोरै संख्यामा भएकाले देशभर करिब ४ सय आईसीयू शैय्या रहेको अनुमान छ । कार्की भन्छन्, “आवश्यक परेको अवस्थामा आईसीयूको संख्या सहजै थप्न सकिन्छ, जुन ठूलो समस्या होइन ।”
८) भेन्टिलेटर कति छन् ?
अस्पतालमा दुइटा आईसीयू शैय्या भए एउटा भेन्टिलेटर सुविधासहितको शैय्या हुनुपर्छ । सोही आधारमा देशभर करिब २ सय भेन्टिलेटर छन् । काठमाडौँ उपत्यकामा भने २ सय ५७ वटा भेन्टिलेटर सुविधासहितका शैय्या छन् । कोरोना संक्रमितमध्ये २० प्रतिशत बिरामी अस्पताल भर्ना गर्नुपर्ने अवस्थाका हुन्छन् । त्यसमध्ये ५ प्रतिशतलाई भेन्टिलेटर सुविधासहितको शैय्याबाट उपचार गर्नुपर्ने हुन्छ ।
निजी अस्पताल सञ्चालक कनौडिया साधारण शैय्या, आईसीयू शैय्याभन्दा पनि समस्या भेन्टिलेटर सुविधासहितको शैय्याको ठान्छन् । अहिले भेन्टिलेटर खरिद गर्न सहज पनि छैन, जसले त्यसमा राखेर उपचार गर्नुपर्ने बिरामीको संख्या थपिँदा झन् जटिल बन्छ ।
त्यसै पनि फोक्सो, मुटु तथा टाउकोको समस्यासहित विभिन्न रोगले थलिएका बिरामीमध्ये केहीलाई भेन्टिलेटरमा राख्नुपर्ने हुन्छ । कनौडिया भन्छन्, “त्यस्ता बिरामीले करिब २ सयजति भेन्टिलेटर ओगट्न सक्छन् ।”
९) जनशक्ति कति छन् ?
निजी अस्पतालहरूले कोरोना आशंकित बिरामीको उपचार गर्न छाडेको एक महिना हुन लाग्यो । ती अस्पतालमा सरकारको कारबाही त परको कुरा, निगरानीसमेत छैन । त्यस कारण निजी अस्पतालमा कार्यरत स्वास्थ्यकर्मी कोरोना संक्रमणको बेला प्रभावकारी हुन सक्छन् भन्ने ग्यारेन्टी छैन । यसरी हेर्दा सरकारसँग पर्याप्त स्वास्थ्यकर्मी छन् त ?
अहिले सरकारले ५१ हजार स्वास्थ्य स्वयंसेविका परिचालन गर्ने निर्णय गरेको छ, जसको काम क्वारेन्टाइनमा बसेका छन् कि छैनन् भन्ने र कोरोनाबाट बच्न सन्देश प्रवाहित गर्ने भूमिकामा सीमित छ । देशभरका स्वास्थ्य चौकीमा भएका अहेव र एचएहरू पनि कोरोना उपचारमा संलग्न हुन सक्दैनन् ।
दन्त चिकित्सकसहित २६ हजार ३ सय २४ चिकित्सक नेपाल मेडिकल परिषद्मा दर्ता छन् । त्यसमध्ये एमबीबीएस २३ हजार १ सय ४६ जना । एमडी गरेका चिकित्सक ७ हजार १ सय ८५ जना छन् तर यीमध्ये नेपालमा कार्यरत चिकित्सकको संख्या भने यकिन छैन । स्वास्थ्य मन्त्रालयअन्तर्गत सरकारसँग चिकित्सकको दरबन्दी करिब १२ सय हो । त्यसमध्ये ८ सय चिकित्सक मात्रै कार्यरत छन् । करिब ४ सयजति दरबन्दी अध्ययन बिदा वा अन्य कारणले रिक्त छ ।
सरकारी अस्पताल सञ्चालक समिति अर्थात् विकास समितिले आफ्नो स्रोतमा समेत चिकित्सकहरू नियुक्त गर्ने गरेका कारण देशभर सरकारी अस्पतालमा करिब २५ सय चिकित्सक कार्यरत रहेको विज्ञ कार्की बताउँछन् । कोरोना संक्रमण विस्तार भएको अवस्थामा यो जनशक्ति निकै कम हो ।
अहिलेसम्मको संकेत हेर्दा कोरोना सुदूरपश्चिम प्रदेशमा विस्तार हुन सक्ने सम्भावना छ । त्यो क्षेत्रमा अझ सरकारी चिकित्सकको संख्या न्यून छ, जसले सरकारको पूर्वतयारीसहित जनशक्ति व्यवस्थापनमा ध्यान नपुगेको प्रस्टै देखिन्छ ।
नेपाल मेडिकल परिषद्का रजिस्ट्रार कृष्ण अधिकारी भने पर्याप्त जनशक्ति रहेको दाबी गर्छन् । अधिकारीको दाबी निजी अस्पतालमा कार्यरत डाक्टरको समेत संख्यासँग जोडिन्छ । तर निजी अस्पताल अहिले दायित्वबाट पन्छिन थालेका छन्, जसले गर्दा अहिले उपचारको भार सरकारी अस्पतालमा परेको छ । त्यस कारण अहिले सरकारी अस्पतालमा कार्यरत जम्माजम्मी २ हजार ५ सय चिकित्सकले सुविधा पुर्याउन कठिन छ ।
१०) प्रयोगशाला कति, एम्बुलेन्स कति ?
धरान, जनकपुर, काठमाडौँ, हेटौँडा, चितवन, पोखरा, बुटवल, नेपालगन्ज, वीरेन्द्रनगर र धनगढीमा प्रयोगशाला स्थापना गरियो । तर ती प्रयोगशालाले पर्याप्त परीक्षण गर्न सकेका छैनन् । त्यसबाहेक स्वास्थ्य मन्त्रालयले १० वटा एम्बुलेन्स आकस्मिक सेवाका लागि तयारी हालतमा राखेको बताएको छ । तर ती बढीजसो काठमाडौँकेन्द्रित छन् ।
सम्बन्धित
अमेरिकाले बर्सेनि निकाल्ने आतंकवादसम्बन्धी प्रतिवेदन नेपालबारे फेरिएको धारणा...
नेपाललाई 'आतंकवादको हब' मान्ने अमेरिकी धारणा कसरी परिवर्तन भयो ?
लकडाउनपछि आफ्नो मुलुक फर्किएका भारतीय मजदुर सम्पर्कमै आएनन्, रेडजोनमा परेका स्वदेशकैलाई ल्...
उद्योग चलाउनै मुस्किल
सात दशकयताको दलीय तानातानको शिकार बन्दै आएको नागरिकता मुद्दामा यसपल्ट पनि विगतकै राजनीतिक ...
नागरिकतामा किन सधैँ किचलो ?
केन्द्रीय अनुसन्धान ब्युरो, बाग्मती प्रदेशसहितको सिन्धुपाल्चोक, काभ्रे र प्रदेश २ सर्लाहीब...
आश्रममै रहे पनि किन पक्राउ पर्दैनन् बमजन ?
मुख्यमन्त्री शंकर पोखरेललाई प्रदेशमा आएर केन्द्रीय भूमिका गुम्ने भय, पार्टी इन्चार्ज र अर्...
ओलीका ‘अलराउन्डर’ विश्वासपात्र
कोरोना महामारीले खर्च घटाउन र प्रशासनलाई चुस्त राख्न सबक सिकाए पनि अनावश्यक खर्च कटौतीमा भ...