[स्मरण] थाहै नपाई तिलविक्रम
“बोलाउने मेरो नाम त काइँला थियो । फुपू र बज्यूहरूले ओझाहाङ भन्थे । घरमा त...,” मैले डराउँदै जवाफ दिएँ । “अबदेखि तेरो नाम तिलविक्रम भयो बुझिस् ?,” कान्छा गुरुले फैसला सुनाए । यसरी म तिलविक्रम भएँ ।
गाईवस्तु चराउन बाँसका दुइटा चोंगेभरि नुन बोकेर गोठतिर हिँडेको म अन्तत: इलाम पुगेँ । कुरा विसं ००५ दसैँलगत्तैको हो । मेरा दाजुहरू दसैँ बिदामा इलामबाट घर पौवा आएका थिए । उनीहरूका हात्तीमार्का खाताहरू देखेर म पनि के–के कोरिदिन्थेँ । तर, एउटा कुराले मलाई खुबै आकृष्ट गर्यो, दाजुहरूका खुट्टाका कालाकाला छालाका जुत्ताहरूले । फुकालेर राखिछाडेका बेला ती जुत्ता म लाउँथेँ र वरपर कुद्थेँ ।
दसैँ सकिएर दाजुहरू इलामतिर जाने बेला आयो । यस वर्ष आधाभन्दा बढी पढाइ भइसकेकाले होला, लाठे भइसकेको ९ वर्ष पुगिसकेको मलाई इलाम जान नदिने भन्ने छनक अघिल्लै दिन थाहा भइसकेको थियो । साइँला दाजु भुवानी विक्रमसँगको गुपचुप सल्लाह अनुसार मैले भाग्ने निधो गरेँ ।
घरमा बुबा–मुमाले थाहा पाएछन् क्यार । बिहानै घरदेखि झन्डै दुई किलोमिटर टाढा निभु खोला किनारमा भएको गोठमा गाईवस्तुका लागि नुन बोकाई खेदे । संयोगकै कुरा हो, निभु खोला किनारको गोठ पनि उही दिशातिर नै पर्दथ्यो । म गोठ पुगेर चिम्फुला गाउँ उकालैउकालो हुँदै महाभारत डाँडा राँकेभन्ज्याङमा दाजुहरूभन्दा अघि नै पुगेँ ।
त्यस डाँडामा उभिएर पूर्वपट्टि निकै बेर अन्यमनस्क र अत्यधिक प्रफुल्ल हुँदै नियालेर हेरिबसेँ– डाँडाहरूले नघेरिएका आकाशसँग जोडिएको पृथ्वी । पछि थाहा भयो– ती तराईका विशाल फाँट रहेछन् । डाँडाकै पल्लोपट्टि हरिया वन–जंगलले ढाकिएको चमैता गाउँ, तल बग्ने देउमाई खोला । डाँडाकै अलिक तल पूर्वपट्टि फलाँटे बजार लाग्ने सिम्सारा गाउँ । त्यहाँबाट उँधो देखिने गजुरमुखी देवस्थल । यसअघि नै कति पटक भाग्दै गाउँलेका पछि लागेर म फलाँटे बजार आएको थिएँ । त्यहाँबाट देखिने फाकफोक गाउँ । जुन गाउँको नामबाट प्रसिद्ध लोकगीत बनेको थियो–
‘इलामको सिलाम फाकफोकको तोरी तेल झर्यो लै लै तुरुरु...।’
घरमा म भागेर हिँडेको थाहा भएपछि बुबाले हाम्रा कारबारी चन्द्रमान तामाङलाई लुगाफाटो बोकाई पठाउनुभएछ । भरिया साथीहरू, कारबारी चन्द्रमान, माइला दाजु डिल्लीविक्रम र साइँला दाजु भुवानीसँग भेट भएपछि लागियो इलामतिर ।
पुगियो इलाम बजार ।
धप्परको चेपचाप, देउमाई खोलाको उकालो र ओरालो भई रक्सेमा उसिनेको आलुको खाजा खाएर साखेजुङको ओरालो झुत्रे र पुवाखोला नाघेर तोरीबारीको करेङ परेको उकालो बाटो, कान्लाका सालिम्मो, लछेप्रै उम्रेका हरिया अम्लिसो घारी र बाक्लो बाँसघारी हुँदै सजिलै काट्यौँ । अझ पनि एउटा दृश्यको सम्झना हुन्छ– तोरीबारीको करेङ परेको उकालोमा निकै माथि एउटा चिलाउनेको रूख थियो, जसको फेदमा अगेनुमा पानीको भाँडा, अर्को भाँडोमा अलिकति दूध, बटुकामा केही चिनी र दुई–तीनवटा गिलास राखेर, व्यापारधन्दाको झिटिझ्याम्टी सबै लिएर कुनै दोकाने बसिरहेको– बटुवाहरूको प्रतीक्षामा ।
गुलियो चिया र पकाएको चना, आलुचना खाएर चुरेघाँटी र नारायणथान हुँदै झमक्क साँझ परेपछि इलाम बजारबीच भएर सुन्तलाबारी मावली घर पुग्यौँ । यसरी गोठ गएको केटो, पुग्यो इलाम बजार । तर, मेरो नाम त अर्कै पो भएछ ।
मेरा बाबुले बिचारी भएपछि नै साउँअक्षर सिकेका रे । यसपछि जागेको शिक्षाप्रेमले पछि उनी लिम्बूवानका सुब्बाहरूमा आफ्ना छोराहरू स्कुलमा पढाउनेहरूमा पहिला व्यक्ति भए भनिन्छ । यसरी आधा पढाइसकिएको भए पनि दाजुहरू र मामाहरूको प्रयासले मेरो नाम लेखाउने काम भएछ, पद्मोदय हाइस्कुलमा । पहिलो दिन सम्झन्छु म । जब हाजिरी लिने क्रम सुरु भयो, कान्छा गुरु श्रीकृष्ण शर्माले हाजिर गराए । सबैले पालैपालो उठ्दै ‘यस सर’ भन्दै गए । अनि, कान्छा गुरुले ‘तिलविक्रम’ भने तर जवाफ छैन । फेरिफेरि यही नाम बोलाए । जवाफ आएन । अन्त्यमा सोधे, “नयाँ आउने छात्र को हो ?” सबैले मलाई देखाए । म उभिएँ । “आफ्नो नाम थाहा नपाएको तैँले ?” कान्छा गुरुले झपारे ।
“बोलाउने मेरो नाम त काइँला थियो । फुपू र बज्यूहरूले ओझाहाङ भन्थे । घरमा त...,” मैले डराउँदै जवाफ दिएँ । “अबदेखि तेरो नाम तिलविक्रम भयो बुझिस् ?,” कान्छा गुरुले फैसला सुनाए । यसरी म तिलविक्रम भएँ ।
यसरी गोठमा नुन पुर्याउन जाने चिनामा लेखिएको नाम वझाङ (ओझाहाङ) नाम भएको लाठे केटो इलाम त पुग्यो तर परिचय पो सधैँका लागि अर्कै पाएछ– तिलविक्रम सुब्बा । अहिलेको तिलविक्रम नेम्बाङ ।
प्रस्तुति : रमण घिमिरे
सम्बन्धित
कम्युनिस्ट पार्टीको गुपचुप गतिविधि गरिरहेका नरबहादुर कम्मर र छाती दुवैतिर जापानी, भारु, ने...
थैले काण्डमा पक्राउ पुर्जी
नारदमुनि स्वयंले अंग्रेजी पढाउँथे । ब्रिटिस फौजको जमदार भएका र त्यति धेरै नपढेका उनले हाम...
नारदमुनि थुलुङको सम्झना
हुन त कतिपयले ममा भारतीय कलाकार मकबुल फिदा हुसैनको प्रभाव परेको भन्ठान्छन् । तर भक्तपुरमा ...
यस कारण घोडाचित्र
राजा वीरेन्द्रले आफ्ना निजी सचिव चेतबहादुर कुँवरमार्फत ६० हजार रुपैयाँ पठाइदिए । त्यही पै...
राजाले दिएको टिकटमा अमेरिका
सरकारी स्वामित्वको अखबार भएको हुँदा व्यवस्थाको विरोध गरेर गोरखापत्रमा व्यंग्यचित्र बनाउन प...
अखबारमा कार्टुनकारिता
जापानको फुकुओका आर्ट म्युजियममा पहिलोपल्ट आयोजित एसियाली कला प्रदर्शनीमा दस अवतार सिर्जना ...