[स्मरण] बीपीले दिमाग भुटे
बीपीको भाषणले हाम्रो दिमाग भुटिदियो । हामीजस्ता साहित्यकारलाई त उनको भनाइ नै गुरुमन्त्र भयो ।
पहिलो आमनिर्वाचन, ०१५ को प्रचारका क्रममा दार्जिलिङ पुगेका थिए विश्वेश्वरप्रसाद कोइराला । त्यसबेला इलाम, पाँचथर, ताप्लेजुङलगायतका पहाडी जिल्ला जान दार्जिलिङबाट पशुपतिनगर हुँदै नेपाल पस्नुपथ्र्यो । र, उनको सम्मानमा स्थानीय सबै संघसंस्था मिलेर जीडीएनएसको हलमा एउटा बृहत् सभा आयोजना गरिएको थियो । यसका अगुवामध्ये एक थिए, अगमसिंह गिरी ।
दार्जिलिङको नेपाली साहित्य सम्मेलनले धेरै अगाडि कोइरालाको दोषी चस्मा छापिसकेको थियो । उनी विश्व साहित्यमा आएको परिवर्तन र नवीनतम प्रवृत्तिबारे जानकार भएको हामीलाई प्रस्ट भयो । बीपीले त्यहाँ आधुनिक साहित्यको परिभाषा दिए, अत्याधुनिक साहित्यको भाषा, शैली र प्रवृत्तिमाथि गहकिला कुरा बोले ।
उनले आफ्नो अभिभाषणमा अस्तित्ववाद र विसंगतिवादका कुरा गर्दै केही वर्षअघि नोबेल पुरस्कार पाएको अल्बेयर कामुको प्लेग र स्ट्रान्जर उपन्यास अनि सात्र्रहरूको चर्चा गरे । गिनेचुनेकाबाहेक नेपालकै पनि कति विद्वान्ले यो कोटिको अध्ययन गरिसकेका थिएनन् भने हामी त झन् भर्खर कलेज पढ्दै गरेका विद्यार्थी !
प्रवचनका क्रममा उनले ‘लेखनमा त म क्यामुको ‘स्ट्र्यान्जर’ जस्तै भएँ’ पनि भने । उनले भने, “साहित्य लेख्न बस्दा मनले भन्छ– तँ राजनीतिक मानिस होस्, अनि राजनीतिको भाषण गर्दै जाँदा यही मनले भन्छ– तँ साहित्यकार होस्, तैँले त साहित्य पो लेख्नुपर्छ । त्यसैले म अन्योलमा छु– के म क्यामुकै परदेशी हुँ त ? बुझ्न सकिरहेको छैन ।”
प्रवचनका क्रममा बीपीले दार्जिलिङको त्यही सभामा भनेको कुरा कालान्तरमा प्रख्यात वाणी नै बन्यो, “राजनीतिमा म प्रजातन्त्रवादी हुँ । अर्थनीतिमा पक्का माक्र्सवादी । साहित्यमा म अराजकतावादी ।”
बीपीको भाषणले हाम्रो दिमाग भुटिदियो । हामीजस्ता साहित्यकारलाई त उनको भनाइ नै गुरुमन्त्र भयो । त्यो विश्वभरका साहित्यमा आधुनिकतावादी चिन्तनको उत्कर्ष थियो । टीएस इलियटका कविताले हामीलाई प्रभावित गरेको समय थियो । हिन्दी साहित्यमा अज्ञेयको सम्पादनमा ‘ तारसप्तक’, ‘दूसरा सप्तक’ र ‘तीसरा सप्तक’ पनि प्रकाशित भइसकेका थिए । हिन्दी साहित्यमा ‘अकथा’, ‘अकविता’ सुरु भएर आधुनिकतावादमाथि नै प्रश्नचिह्न लाग्न थालेको सन्धिकाल थियो त्यो ।
त्यसै हल्लिरहेको हाम्रो मनस्थितिमा ठूलो कम्प गयो । नेपाली साहित्य पनि आधुनिक लेखनतिर उन्मुख भएका बेला ‘गिरी स्कुल’ को मात्रिक छन्द र स्वच्छन्दतावादी धाराका सिर्जनाभन्दा भिन्न आधुनिक जगमा उभिइसकेका थियौँ । कोठेगोष्ठी साहित्य प्रतिष्ठानको स्थापनापछि हामीमा नयाँ ढंगबाट लेख्नुपर्छ भन्ने विचार प्रवाह भइसकेको थियो । तर, जब हामीले बीपीका एकदमै फरक धारका नितान्त नौला विचार सुन्यौँ अनि विश्वस्त भयौँ, हामीले खोजेको कुरा यही हो ।
साहित्यमा नयाँ सोचले लाग्न हामीसँग दुइटा विकल्प थिए– आफू अगाडि बढ्न या त अघिल्लो पुस्तालाई धकेलेर लडाउने या त छुट्टै नयाँ बाटो बनाउने । राजाको छोराले राजा हुन खोजेजस्तै हो यो पनि । राजाको छोराले राजा हुन या त आफ्नो बाबुको मृत्युसम्म पर्खिनुपर्छ या त बाबुलाई मार्नुपर्छ । तर, हामी पुरानो विचारलाई मार्ने वा मर्न दिने दुवै पक्षमा गएनौँ ।
बीपीको भाषणले हामीलाई आफ्नै नयाँ बाटो बनाउने प्रेरणा मिल्यो । स्वच्छन्दतावादी साहित्यको गोहोलाई नछोई आफ्नै नयाँ धार निर्माणमा कोठेगोष्ठी साहित्य प्रतिष्ठान निर्माण गरेर साहित्यिक गतिविधिलाई क्रियाशील बनायौँ ।
ईश्वरवल्लभले टर्नबुल हाइस्कुलमा संस्कृत शिक्षकको जागिर पाइसकेका थिए । म पनि आईएस्सीमा गभर्मेन्ट कलेजमा भर्ना भइसकेको थिएँ । मेरो खाने–बस्ने प्रबन्ध स्थानीय संरक्षक मितबुबा मन्तुलाल क्षत्रीकहाँ थियो । माइला दाजु बीए सकेर अघिल्लै वर्ष फर्किसकेका थिए । साइँला दाजु भने अलग डेरामा पेइङ गेस्ट बसेका थिए । वल्लभजी र म भने साहित्यको नयाँ बाटो बनाउने संकल्पका साथ लाग्यौँ । पहिलेभन्दा नयाँ गर्नु थियो ।
त्यतिबेलासम्म कविता लेख्नेहरूमा हामी पनि निकै चल्तापुर्जा भइसकेका रहेछौँ । थाहै नपाई दार्जिलिङको साहित्यमा अर्को पुस्ता निर्माणमा लागिसकेका रहेछौँ । अब हाम्रो केन्द्र परिवर्तन भयो । ‘तेस्रो आयाम’ को गर्भाधान भइसकेछ ।
प्रस्तुति : रमण घिमिरे
सम्बन्धित
कम्युनिस्ट पार्टीको गुपचुप गतिविधि गरिरहेका नरबहादुर कम्मर र छाती दुवैतिर जापानी, भारु, ने...
थैले काण्डमा पक्राउ पुर्जी
नारदमुनि स्वयंले अंग्रेजी पढाउँथे । ब्रिटिस फौजको जमदार भएका र त्यति धेरै नपढेका उनले हाम...
नारदमुनि थुलुङको सम्झना
हुन त कतिपयले ममा भारतीय कलाकार मकबुल फिदा हुसैनको प्रभाव परेको भन्ठान्छन् । तर भक्तपुरमा ...
यस कारण घोडाचित्र
राजा वीरेन्द्रले आफ्ना निजी सचिव चेतबहादुर कुँवरमार्फत ६० हजार रुपैयाँ पठाइदिए । त्यही पै...
राजाले दिएको टिकटमा अमेरिका
सरकारी स्वामित्वको अखबार भएको हुँदा व्यवस्थाको विरोध गरेर गोरखापत्रमा व्यंग्यचित्र बनाउन प...
अखबारमा कार्टुनकारिता
जापानको फुकुओका आर्ट म्युजियममा पहिलोपल्ट आयोजित एसियाली कला प्रदर्शनीमा दस अवतार सिर्जना ...