बेथानमा खसालिएको पर्चा
विसं २०१८ को घटना हो । त्यतिबेला म ४ कक्षामा पढ्थेँ, रामेछापको कुशेश्वर प्रावि, बेथानमा । हामीहरु कक्षा सकाएर दिउँसो १ बजेको खाजा खान स्कुल मैदानमा बसेका थियौँ । आकाशमा फन्को मार्दै हेलिकप्टर घुमिरह्यो, स्कुल वरपर । हेलिकप्टरले आकाशबाटै सेतो कागजमा लेखेका पर्चा छर्यो ।
राणा शासन अवसान भएसँगै बाबा भक्तबहादुर खड्काको नेता बीपी कोइरालासँग २००८ देखि संगत थियो । बाबाले बीपीको नेतृत्वमा प्रजातन्त्रका लागि भएका संघर्षको इतिवृत्तान्त हामीलाई पनि घरमा सुनाउनुहुन्थ्यो । प्रजातन्त्रका लागि बीपीले पाएको दु:खका पोका बाबाले फुकाउँदा मैले धैर्यसाथ सुन्न छुटाउँदिनथेँ ।
०१६ जेठमा गठित कांग्रेसको बहुमतप्राप्त सरकारको नेतृत्व गरेका बीपीलाई राजा महेन्द्रले सैनिक बलमा अपदस्थ गरे । पञ्चायत व्यवस्थाका समर्थकहरुले कांग्रेस कार्यकर्तालाई अनेक दु:खकष्ट दिन थाले । प्रजातन्त्रवादीलाई अराष्ट्रिय तफ्वको पगरी भिराइन्थ्यो । राजा महेन्द्रले जनमतबाट चुनिएका बीपीलाई बिनाअभियोग बन्दी बनाए । कांग्रेसविरोधीलाई साथसमर्थन दिन र आफ्ना पक्षधरलाई उक्साउन पञ्चायती शासनका औजार प्रयोग गरिन्थ्यो ।
विसं २०१८ को घटना हो । त्यतिबेला म ४ कक्षामा पढ्थेँ, रामेछापको कुशेश्वर प्रावि, बेथानमा । हामीहरु कक्षा सकाएर दिउँसो १ बजेको खाजा खान स्कुल मैदानमा बसेका थियौँ । आकाशमा फन्को मार्दै हेलिकप्टर घुमिरह्यो, स्कुल वरपर । हेलिकप्टरले आकाशबाटै सेतो कागजमा लेखेका पर्चा छर्यो । छरिएकामध्ये केही स्कुलको मैदानमा पनि झरे । त्यसमा के लेखिएको रहेछ भनेर जान्ने उत्सुकता ममा बढ्यो । दुई प्रति हातमा लिएँ । पछि कक्षाकोठामा गएर झोलामा राखेँ ।
स्कुल बिदा भएपछि झोलामा राखेका ती पर्चा पहिले बाबा र दाजु शिवबहादुर खड्कालाई देखाएँ । दाजुचाहिँ त्यतिबेला काठमाडौँको त्रिचन्द्र कलेज पढ्थे । उबेला स्ववियु अस्तित्वमा आइसकेको थिएन । अञ्चलस्तरीय विद्यार्थी संगठन भने हुन्थे । दाजु पहिलो पटक २०२० मा त्रिचन्द्रमा भएको चुनावमा कांग्रेस समर्थक विद्यार्थीबाट अध्यक्ष चुनिएका थिए ।
त्यो पर्चामा कांग्रेसलाई अराष्ट्रिय तत्त्व भनेर लेखिएका संकेत चिह्न थिए । कांग्रेस समर्थक र प्रजातन्त्रवादीलाई सहयोग नगर्न स्थानीय जनतालाई चेतावनीसहितको पञ्चायती शासनले उबेला नेपालभर हेलिकप्टरमार्फत खसाएर प्रचार गरेको रहेछ । यो कुराको जानकारी मलाई बाबाले दिनुभयो । त्यसपछि मात्र मैले कांग्रेस र प्रजातन्त्रबारे अलिअलि चासो दिन थालेकी हुँ । मंगलादेवी सिंह, शैलजा आचार्य, साहाना प्रधानजस्ता नेतृहरुका त्याग र बलिदानीका संघर्षका कथा पनि बाबाबाटै सुनेँ । त्यसकारण मलाई बच्चैदेखि प्रजातन्त्र र कांग्रेसप्रति लगाव बढेको हो ।
बेथानमा ५ कक्षा सकाएपछि म दाजुसँगै अध्ययन गर्न काठमाडौँ आएँ, २०२५ मा । त्यसपछि ६ कक्षामा भर्ना भएँ । दाजु शिवबहादुरसँग हालका कांग्रेस सभापति शेरबहादुर देउवाको हिमचिम गाढा थियो । दाजुको संगत कांग्रेसका नेताहरुसँग पनि रहनुले मलाई नेविसंघको राजनीति गर्न त्यति धेरै झमेला मोल्नुपरेन । नेविसंघ होस् वा कांग्रेस, राजनीतिक रुपमा अगाडि बढ्न पारिवारिक सहयोग र साथ हरदम पाइरहेँ ।
माध्यमिक विद्यालयको पढाइपछि ०३२ मा महिलाले मात्र अध्ययन गर्न पाउने काठमाडौँ बागबजारको पद्मकन्या क्याम्पस (पीके) मा भर्ना भएँ । ०३७ मा पीकेबाट स्नातक सकाएँ । पञ्चायती शासनको मध्य समय, ०३६ मा विद्यार्थी आन्दोलन भयो । हामीले शिक्षामा सुधार, कलेजमा स्ववियु गठनलगायतका ३६ सूत्रीय माग राखेर त्रिभुवन विश्वविद्यालयविरुद्ध आन्दोलन गर्यौँ । त्यो आन्दोलनमा म पक्राउ परेँ । दुई महिनाजति सेन्ट्रल जेलमा बन्दी बनाइएँ । जेल बस्दा तनाव पनि भोग्नुपर्यो, कांग्रेस समर्थक भएकै कारण । विद्यार्थीले उठाएका माग सुन्न बाध्य भए, पञ्चायती शासक र त्रिवि प्रशासन । त्यसैको परिणाम– सरकारी तथा निजी कलेजमा स्ववियुले वैधानिकता पायो । ०३६ को पहिलो स्ववियु निर्वाचनमा म पीकेबाट अध्यक्ष चुनिएँ ।
(पाण्डे नेपाली कांग्रेसकी नेतृ हुन् ।)
प्रस्तुति : गोकुल अर्याल
सम्बन्धित
कम्युनिस्ट पार्टीको गुपचुप गतिविधि गरिरहेका नरबहादुर कम्मर र छाती दुवैतिर जापानी, भारु, ने...
थैले काण्डमा पक्राउ पुर्जी
नारदमुनि स्वयंले अंग्रेजी पढाउँथे । ब्रिटिस फौजको जमदार भएका र त्यति धेरै नपढेका उनले हाम...
नारदमुनि थुलुङको सम्झना
हुन त कतिपयले ममा भारतीय कलाकार मकबुल फिदा हुसैनको प्रभाव परेको भन्ठान्छन् । तर भक्तपुरमा ...
यस कारण घोडाचित्र
राजा वीरेन्द्रले आफ्ना निजी सचिव चेतबहादुर कुँवरमार्फत ६० हजार रुपैयाँ पठाइदिए । त्यही पै...
राजाले दिएको टिकटमा अमेरिका
सरकारी स्वामित्वको अखबार भएको हुँदा व्यवस्थाको विरोध गरेर गोरखापत्रमा व्यंग्यचित्र बनाउन प...
अखबारमा कार्टुनकारिता
जापानको फुकुओका आर्ट म्युजियममा पहिलोपल्ट आयोजित एसियाली कला प्रदर्शनीमा दस अवतार सिर्जना ...