खुकुरी दलविरुद्ध रक्षा मण्डल
१ सय ४ वर्षे गुमेको राणा रजगज फिर्ता ल्याउने भित्री मनसायले गठन गरिएको खुकुरी दलको अराजकतालाई जवाफ दिन चैत २००७ मा रक्षा मण्डल खोलियो, काठमाडौँमा । रक्षा मण्डलले पाटनलाई कार्यक्षेत्र बनाएर खुकुरी दलका आतंक र अशान्ति नियन्त्रणका लागि काम गर्यो ।
दिल्लीमा राजा-कांग्रेस-राणा त्रिपक्षीय सम्झौता भयो, १ फागुन २००७ मा । त्यसअनुसार प्राइममिनिस्टर बनेका मोहनशमशेर र बबरशमशेरको प्रत्यक्ष/परोक्ष निर्देशनमा शासनच्युत भएका राणा खलकले प्रजातन्त्रलाई अफापसिद्ध बनाउन भरतशमशेर, बेनीबहादुर कार्की, रणवीर सुब्बा आदिको नेतृत्वमा गोरखा (खुकुरी) दल गठन भयो, फागुन २००७ मै ।
१ सय ४ वर्षे गुमेको राणा रजगज फिर्ता ल्याउने भित्री मनसायले गठन गरिएको खुकुरी दलको अराजकतालाई जवाफ दिन चैत २००७ मा रक्षा मण्डल खोलियो, काठमाडौँमा । रक्षा मण्डलले पाटनलाई कार्यक्षेत्र बनाएर खुकुरी दलका आतंक र अशान्ति नियन्त्रणका लागि काम गर्यो ।
सत्यमोहन जोशी, मूर्तिमान शाक्य, आशाराम शाक्य र केशवराम जोशीको नेतृत्वमा खोलिएको रक्षामण्डलले पाटन क्षेत्रमा रातमा गस्ती र घरलौरी गर्न थाल्यो । केशवराम मेरा साख्खे दाजु हुन् । उनी रक्षा मण्डलको अध्यक्ष पनि भए ।
खुकुरी दलका सदस्यको अराजकता रोक्ने त्यो समूहमा म सहभागी थिइनँ किनभने त्यतिबेला १३ वर्षको मात्रै थिएँ । रक्षा मण्डलले प्रतिक्रान्तिलाई निस्तेज गर्न पाटन क्षेत्रलाई सुरक्षित बनायो । रक्षा मण्डलकै कारण खुकुरी दलका कार्यकर्ताले पाटन क्षेत्र छिर्ने हिम्मतै गरेनन् ।
खुकुरी दलका एक सदस्य बेनीबहादुर कार्की पाटन, टुँडिखेलपारि कार्की गाउँका थिए । त्यसैले उनले ललितपुरमा पनि अराजकता निम्त्याउने आशंका थियो । बेनीबहादुर गोरखा दलमा लाग्नुको कारणचाहिँ उनका पिता राणा शासनमा सेनामा क्याप्टेन थिए । मुक्ति सेनाको विद्रोह दबाउन मोहनशमशेरले उनकै नेतृत्वको सेनालाई मंसिर २००७ मा वीरगन्ज पठाएका थिए । वीरगन्जको त्यो लडाइँमा मुक्तिसेनाको गोली लागेर उनी मारिए । पिता मारिएपछि त्यसको प्रतिशोधस्वरुप बेनीबहादुर खुकुरी दलमा लागेका थिए ।
भरतशमशेरको नेतृत्वमा प्रतिक्रान्तिस्वरुप नेपालभर आतंक मच्चिएको थियो त्यतिबेला । देशभर अराजकता फैलियो । घरघरमा लुटपाट हुन थाल्यो । गृहमन्त्री रहेका बीपी कोइरालाले १९ फागुन २००७ मा गोरखा दलमाथि प्रतिबन्ध लगाइदिए । भरतशमशेर र रणधीर सुब्बा ३० चैत २००७ मा पक्राउ परे ।
पक्राउको विरोधमा राणाप्रति वफादार आठपहरिया समर्थकले जेल तोडे र बीपीको त्रिपुरेश्वर निवास तोडफोड गरे । पछि जनता-सेनाको मिलिभगतमा भरतशमशेर दोस्रोचोटि पनि पक्राउ परे र श्रीमहलमा नजरबन्द भए । प्रजातन्त्रको बर्खिलापमा लागेको भन्दै क्रुद्ध जनताले उनको गाडीमा समेत आगजनी गरिदिए ।
राणा समर्थक खुकुरी दलले आफ्ना नेता/कार्यकर्ता छुटाउन फेरि पनि गृहमन्त्री निवासलाई निशाना बनायो । त्यसै क्रममा आफ्नै सुरक्षाका लागि बीपीले गोली चलाउँदा खुकुरी दलका दुई कार्यकर्ताको मृत्यु भयो । त्यसपछि बीपीले २५ कात्तिक २००८ मा गृहमन्त्रीबाट राजीनामा दिए ।
संयुक्त सरकार गठनका बेला एउटाले राजीनामा दिँदा अर्को पक्षले पनि छाड्नुपर्ने समझदारी थियो । त्यही समझदारीअनुरुप मोहनशमशेरले पनि प्राइममिनिस्टर पदबाट राजीनामा दिनुपर्यो । राणा, राजा र कांग्रेसको संयुक्त सरकार ७ महिनाभन्दा बढी टिकेन । पुनः राणातन्त्र ल्याउने खुकुरी दलको भित्री मनसुवा बीपीले राजीनामा दिएसँगै तुहिन पुग्यो । मोहनशमशेरको राजीनामापछि खुकुरी दलका गतिविधि पनि साम्य भए । घटना साम्य भएपछि भरतशमशेरलाई २४ कात्तिक २००८ मा रिहा गरियो ।
गृहमन्त्रीबाट राजीनामा दिएपछि बीपीले मातृकाप्रसाद कोइरालालालाई पार्टी सभापतिको जिम्मेवारी सुम्पे । भारतीय प्रधानमन्त्री जवाहरलाल नेहरुको सल्लाहमा राजा त्रिभुवनले कांग्रेस सभापति मातृकालाई प्रधानमन्त्री नियुक्त गरे । उनी प्रधानमन्त्री हुनासाथ कांग्रेसमा गृहकलह सुरु भयो ।
यसरी राणा रजगज फिर्ता ल्याउने उद्देश्य बोकेको खुकुरी दलको रणनीति विफल बनाउन काठमाडौँमा गठन भएको रक्षा मण्डलले ९ महिनासम्म क्रियाशील रहेर पाटनलाई सुरक्षित राख्न सक्यो ।
प्रस्तुति : गोकुल अर्याल
सम्बन्धित
कम्युनिस्ट पार्टीको गुपचुप गतिविधि गरिरहेका नरबहादुर कम्मर र छाती दुवैतिर जापानी, भारु, ने...
थैले काण्डमा पक्राउ पुर्जी
नारदमुनि स्वयंले अंग्रेजी पढाउँथे । ब्रिटिस फौजको जमदार भएका र त्यति धेरै नपढेका उनले हाम...
नारदमुनि थुलुङको सम्झना
हुन त कतिपयले ममा भारतीय कलाकार मकबुल फिदा हुसैनको प्रभाव परेको भन्ठान्छन् । तर भक्तपुरमा ...
यस कारण घोडाचित्र
राजा वीरेन्द्रले आफ्ना निजी सचिव चेतबहादुर कुँवरमार्फत ६० हजार रुपैयाँ पठाइदिए । त्यही पै...
राजाले दिएको टिकटमा अमेरिका
सरकारी स्वामित्वको अखबार भएको हुँदा व्यवस्थाको विरोध गरेर गोरखापत्रमा व्यंग्यचित्र बनाउन प...
अखबारमा कार्टुनकारिता
जापानको फुकुओका आर्ट म्युजियममा पहिलोपल्ट आयोजित एसियाली कला प्रदर्शनीमा दस अवतार सिर्जना ...