[स्मरण] ‘मातेको मान्छे’ देखि ‘अन्धा र हात्ती’ सम्म
मेरो परिवारले ००७ को जनक्रान्तिमा पनि एकतन्त्री जहानियाँ राणा शासनविरुद्धमा सहयोगी भूमिका नै खेल्यो ।
‘मातेको मान्छेको भाषण : मध्यरातपछिको सडकसित’ कविताको चर्चा हुनुको मुख्य कारण त्यसको लेखन काल र विषयवस्तु पनि हो । राजा महेन्द्रले १ पुस ०१७ मा जननिर्वाचित सरकार र संसद् भंग गरी पञ्चायती प्रजातन्त्रको खोलले ढाकछोप गरे । निरंकुश राजतन्त्रको एकतन्त्री शासनको अभ्यास प्रारम्भ गरेपछि प्रजातन्त्र, मानवाधिकार, आधारभूत मौलिक अधिकारबाट पनि वञ्चित आम नेपाली जनताले बेहोर्नुपरेको त्रासपूर्ण परिस्थितिको विरोधमा स्वाभिमानी र जागरुक नेपाली त उठेकै थिए । त्यो महान् अभियानमा साहित्यकारका नाताले मेरो पनि सानो सहभागिता थियो– यो कविता ।
त्यसो त, मेरो परिवारले ००७ को जनक्रान्तिमा पनि एकतन्त्री जहानियाँ राणा शासनविरुद्धमा सहयोगी भूमिका नै खेल्यो । निरंकुश राजतन्त्रको प्रचारप्रसारमा पल्लो किरातको पाँचथर जाँदै गरेको दौडाहामाथि आक्रमण गरी सुरक्षाकर्मीका हातहतियार खोसेर मेरै परिवारका सदस्यहरुले ०१८ मा सशस्त्र क्रान्ति सुरु गरेका थिए । त्यसमा अग्रणी भूमिकामा मेरा साइँला दाइ भूविक्रम नेम्बाङ र भाइ कृष्णविक्रमको नाम अग्रपंक्तिमा आउँछ । यो कविता लेख्दाताका भूविक्रम आफ्ना सहयोगी तथा जिल्लाका सयौँका संख्यामा निर्वासित नेपाली कांग्रेसका नेता/कार्यकर्तासँग दार्जिलिङमा थिए भने भाइ कृष्णविक्रम धनकुटा जेलमा बन्दी थिए । सशस्त्र क्रान्तिमा लागेर निर्वासित भएको र ‘अराष्ट्रिय तफ्व’ घोषणा गरिएको अनि सर्वस्वहरण भएको छोराका कारण घरमा आमाबाबु, दाजुभाइ र दिदीबहिनीले भोग्नुपरेको ताडना, अपमान, अमानुषिक र अमर्यादित व्यवहार अनि शब्द बयान गर्नै सकिँदैन ।
००७ को जनक्रान्ति सिंहदरबारको राणाको जहानियाँ शासन हटाएर शक्तिको केन्द्र नारायणहिटी दरबारमा स्थानान्तरण गर्न मात्र नभएर प्रजातान्त्रिक मूल्यमान्यताको स्थापना र जनताको शासन जनताका प्रतिनिधिबाट जनताका लागि नै हुनुपर्ने आधारभूत सिद्धान्तमाथि उभिएर आम नेपालीको सहयोगमा सफल भएको थियो । तर, भयो उल्टो । राणाजीहरुले खोपीको देवता बनाएका राजा अब बाघ भएर गर्जंदै टुँडिखेलमा मात्र होइन, मुलुकका गाउँगाउँ पस्न सक्ने गरी बलियो भइसकेका थिए ।
विश्वमा विभिन्न वैचारिक क्रान्ति र मुक्तिका लागि भएका परिघटनाका लागि सन् साठीको दशक महत्त्वपूर्ण छ । ठूला शक्तिराष्ट्रका शक्तिमा क्षय र कहिल्यै घाम नअस्ताउने राज्यको शासन गर्ने ब्रिटिस उपनिवेशवाद अन्त्यको अवस्था थियो त्यो । ससाना राष्ट्रले स्वाभिमान र पहिचानका लागि टाउको उठाउन थालिसकेका थिए । विश्वका दुई शक्तिराष्ट्रका हाराहारी असंलग्न राष्ट्रहरुको ठूलै समूह गोलबद्ध हुँदै गरेको समय । ठूला राष्ट्र होऊन् वा साना राष्ट्र, सबैको सम्प्रभुता समान हुन्छ भन्ने मान्यताले शिर खडा पारेको त्यस अवधिमा थिचोमिचो, शासक र शोषकको दलन–मलनको विरोध गर्न सक्ने विवेक हुर्किसकेको थियो । यस्तो परिस्थितिमा जन्मियो मेरो कविता– ‘मातेको मान्छेको भाषण : मध्यरातपछिको सडकसित’ ।
मातेको मान्छे मुक्तिकामी जनताको प्रतीक थियो भने मध्यरात निरंकुशताको चरम अवस्था अन्त्यको संकेत । त्यसरी नै रक्सी– स्वतन्त्रताको चेतनाबोध र मध्यरातपछिको सडक परिवर्तनका लागि व्यग्र समय र मुक्त जीवनका विम्ब थिए । त्यसैले स्वतन्त्रताको चेतनाबोधले जागृत मानिसको प्रतिनिधित्व गर्दछ मातेको मान्छेले । अन्याय, अत्याचार र असमानताविरुद्ध बोल्ने र मानवाधिकारको पक्षमा उभिने ।
नागरिक कसरी र कहिलेसम्म शिर झुकाएर शासकहरुको वंशावलीलाई आफ्नो पनि इतिहास भनेर पढिरहन सहमत हुन्छ ? यही विद्रोहको चेतना र अन्त्यमा त मुक्तिकामी जनताको विजय निश्चित छ भन्ने आस्था र विश्वास जगाएकै कारण यो कविता सबैको प्रिय पनि हुन पुग्यो होला ।
आयामको वस्तुताबाट फाल हानेर आईबी राईमा आएको लीलालेखनले वस्तुताको निरपेक्ष स्वतन्त्र सत्ता हल्लिएको भेटिन्छ । यही लीलाबोधमा नजाँनिदो गरी आधारित हुन पुग्यो मेरो ०२१ मा प्रकाशित कविता– ‘अन्धा मान्छेहरु र हात्ती’ । लीलालेखनले लेखकको तटस्थतामा भन्दा आत्मपरकतामा जोड दिन्छ । हात्तीको हात्तिता (वस्तुता) पनि अब आयामिक कालको झैँ स्वतन्त्र, निरपेक्ष र निर्दिष्ट नभएर अनिर्धार्य छ । जानेका अर्थहरुमा बहुलता आएको छ भनौँ, सत्यहरु एउटा नभएर बहुल अथवा सबै भ्रमजस्ता, लीलाजस्ता हुन पुगेका छन् ।
छामिने हात्ती (कृति) र छाम्ने क्रिया (पठन) का बीच छाम्ने कार्य गर्ने अन्धा मान्छेहरु (पाठकहरु) सधैँ उपस्थित छन् । एउटा हात्ती र लोककथामा वर्णित अन्धा मानिसहरुका सापेक्ष दृष्टिबाट भेटिएका धेरै हात्तीहरुले दार्शनिकले औँल्याएका सत्यको बहुलता सिद्ध गर्छन् अथवा अनिर्धार्यताको । कुनै वस्तु, कृति र पाठलाई सबैले एकै अर्थमा बुझ्नुपर्ने भन्ने धारणा अब गलत भएको तथ्य देखाउने राम्रो उदाहरण हो– लोककथाको ‘अन्धा मान्छेहरु र हात्ती’ को आख्यान ।
प्रस्तुति : रमण घिमिरे
सम्बन्धित
कम्युनिस्ट पार्टीको गुपचुप गतिविधि गरिरहेका नरबहादुर कम्मर र छाती दुवैतिर जापानी, भारु, ने...
थैले काण्डमा पक्राउ पुर्जी
नारदमुनि स्वयंले अंग्रेजी पढाउँथे । ब्रिटिस फौजको जमदार भएका र त्यति धेरै नपढेका उनले हाम...
नारदमुनि थुलुङको सम्झना
हुन त कतिपयले ममा भारतीय कलाकार मकबुल फिदा हुसैनको प्रभाव परेको भन्ठान्छन् । तर भक्तपुरमा ...
यस कारण घोडाचित्र
राजा वीरेन्द्रले आफ्ना निजी सचिव चेतबहादुर कुँवरमार्फत ६० हजार रुपैयाँ पठाइदिए । त्यही पै...
राजाले दिएको टिकटमा अमेरिका
सरकारी स्वामित्वको अखबार भएको हुँदा व्यवस्थाको विरोध गरेर गोरखापत्रमा व्यंग्यचित्र बनाउन प...
अखबारमा कार्टुनकारिता
जापानको फुकुओका आर्ट म्युजियममा पहिलोपल्ट आयोजित एसियाली कला प्रदर्शनीमा दस अवतार सिर्जना ...