कीर्तिपुरस्थित अन्तर्राष्ट्रिय क्रिकेट मैदान नेपाली टोलीलाई फाप्छ । त्यही मैदानमा एक दशकअघि विश्व क्रिकेट लिग डिभिजन ५ को फाइनलमा अमेरिकालाई पराजित गरेर पहिलोपल्ट आईसीसीको प्रतियोगिता जितेको नेपाली टोली अहिले घरेलु मैदानमा पहिलो अन्तर्राष्ट्रिय एक दिवसीय खेल खेल्दै छ । अमेरिकासँगको फाइनल यात्राका लागि भएको लिग चरणको खेलमा नेपाली दर्शकले मैदानमा ढुंगा प्रहार नगरेको भए र खेल अवरुद्ध नभएको भए सायद नेपालको फाइनल यात्रामा धक्का लाग्ने थियो । अवरुद्ध भएको खेलको ओभर घटाउँदा हारका बाबजुद नेपालले अमेरिकासँग फाइनल खेल्ने तय भएको थियो । 

यस पटक २२ माघमा ओमानविरुद्ध विश्वकप क्रिकेट लिग २ को पहिलो खेलमा उत्रिँदा नेपाली टोली र नेपाल क्रिकेट संघ क्यानले १० वर्षअघिको घटनाबाट निकै पाठ सिकिसकेका छन् । त्यतिबेलाको ढुंगाकाण्डपछि कीर्तिपुरमा तारजाली लगाउने काम भयो । मैदानमा केही भौतिक पूर्वाधार पनि थपिए । तर थपिएका पूर्वाधार पनि नेपालले पाएको एक दिवसीय मान्यताअनुसारका छैनन् । त्यसैले पनि कीर्तिपुर मैदानले नेपालको पहिलो अन्तर्राष्ट्रिय एक दिवसीय क्रिकेट प्रतियोगिता आयोजना गर्दा अर्को कीर्तिमान बन्ने पक्का भएको छ । 

विश्वकप छनोट यात्रा मानिएको लिग २ मा नेपालले पहिलो खेल खेल्दै छ । ८ मध्ये ६ वटामा खेलमा जित निकालेको अमेरिका १२ अंकमा तालिकाको शीर्ष स्थानमा छ । ४ खेलमा जित निकालेको ओमान चौथो स्थानमा छ । ओमानले २ वटा खेल खेल्न पाएन । स्कटल्यान्ड ९ अंकमा दोस्रो र नामिबिया ८ अंकमा तालिकाको तेस्रो स्थानमा छ । घरेलु मैदानमा हुने खेलमा जित हात पार्न सके नेपालको विश्वकप खेल्ने सपनाले बिस्तारै मूर्त रूप लिने आधार तय हुनेछ । 

नेपाली टोलीका प्रशिक्षक जगत टमाटा लिग २ महत्त्वपूर्ण हुँदा सोहीअनुसार प्रशिक्षण र खेलाडीको मनोबल रहेको बताउँछन् । “घरेलु मैदानमा हुने खेलमा नतिजा आफ्नो पक्षमा पार्न सकिए विश्वकपको ढोका उघार्न मद्दत गर्छ । यो कुरा खेलाडीलाई पनि राम्ररी थाहा छ । त्यसैले सबैले आफूले सक्नेभन्दा बढी नतिजा दिन्छन् भन्ने मलाई लाग्छ,” टमाटा नतिजा राम्रो हुनेमा ढुक्क छन् । 

तर अवस्था ठ्याक्कै टमाटाले भनेजस्तो छैन । कुनै समय थियो, जतिबेला नेपाल र अमेरिकाको क्रिकेट विपरीत अवस्थामा थिए । नेपाल डिभिजन ५ हुँदै माथि उक्लियो भने अमेरिका तलतिर झर्न थाल्यो । केही वर्षयता अमेरिकाले क्रिकेटमा छलाङ मारेको छ । त्यसको परिणाम भनेकै वान डे मान्यता पाएर नेपालसँगै सिरिज खेल्न आउनु हो । 

४ महिनायता नेपाली टोलीको कप्तानी सम्हालिरहेका ज्ञानेन्द्र मल्ल अमेरिका र ओमान दुवै बलियो टोली भएकाले प्रतिस्पर्धा रोचक हुने ठान्छन् । लिग २ विश्वकप छनोटको पनि यात्रा भएकाले बलिया टोलीलाई हराएरै अघि बढ्नुपर्ने उनको धारणा छ । “पोखरामा मलेसियासँग खेलिएको ३ वटा म्याचमा राम्रै अनुभव भएको छ । तर पोखरा र कीर्तिपुरको पिच फरक छ । अहिले कीर्तिपुरमा अभ्यास गर्दै छौँ । घरेलु मैदानमा पहिलो वान डे सिरिज खेल्न पाउँदा त्यसलाई अविस्मरणीय बनाउने प्रयत्न गर्छौं,” उनको योजना छ । 

पूर्वकप्तान पारस कीर्तिपुरको मैदानमा क्रिकेट खेल्न पाउने क्षणको कल्पनाले पनि आनन्द मिल्ने बताउँछन् । भन्छन्, “सपना साकार भएजस्तो लागेको छ । कीर्तिपुर मैदानमा खेल्नुको अर्कै फिलिङ्स हुन्छ । २ वर्षपछि राष्ट्रिय जर्सी लगाएर खेल्न लागेको छु । त्यसैले सिरिजलाई यादगार बनाउने प्रयत्न हुन्छ ।”

नेपालले अहिलेसम्म खेलेका ६ वटा वान डे अन्तर्राष्ट्रिय म्याचमा मिश्रित नतिजा निकालेको छ । संयुक्त अरब इमिरेट्ससँग खेलेको ४ वटा खेलमा २ मा जित हात पारेको नेपालले बाँकी २ खेल विपक्षीलाई सुम्पिएको छ । त्यस्तै, नेदरल्यान्ड्ससँग खेलेको २ खेलमा १ मा जित र अर्कोमा हारको सामनागरेको छ । त्यसैले बलिया अमेरिका र ओमानसँगको म्याच चुनौतीपूर्ण नै हुने एक दिवसीय क्रिकेटमा शतक प्रहार गर्ने नेपालका एक्ला ब्याट्सम्यान पारस खड्का बताउँछन् । 

हालै घोषित नेपाली टोलीमा स्पिनर वसन्त रेग्मी र अलराउन्डर सोमपाल कामी अटाएका छैनन् । वसन्त पारिवारिक र सोमपाल स्वास्थ्यका कारण पनि टिममा परेनन् । तर यी दुवै टिमलाई आवश्यक पर्दा जस्तोसुकै भूमिका निर्वाह गर्ने भरपर्दा खेलाडी हुन् । टिममा युवा खेलाडी कमलसिंह ऐरी, अभिनाश बोहरा र कुशल मल्लले स्थान बनाएका छन् । अभिनाश र कुशलले ट्वान्टी ट्वान्टी म्याच खेले पनि नेपालबाट ५० ओभरको खेल खेलेका छैनन् । फास्ट बलर कमलले त यही लिगमार्फत नेपाली टोलीमा डेब्यु गर्दै छन् । 

प्रशिक्षक टमाटा अनुभवी खेलाडीलाई मिस गरिए पनि नयाँबाट आश गरिएको बताउँछन् । नयाँका लागि अझ उत्कृष्ट प्रदर्शन गर्ने मौका छ । भन्छन्, “केही गरेर देखाउनुपर्छ भन्ने सोच भएका खेलाडीका लागि नयाँ हुनु अवसर पनि हो । यही अवसरलाई छोप्छन् भन्ने आशा गरेका छौँ ।”

कप्तान ज्ञानेन्द्र बेन्च स्ट्रेन्थका लागि पनि नयाँ अनुहार टोलीमा हुन जरुरी रहेको तर्क गर्छन् । “पुरानाको अनुभवले टिमलाई बलियो बनाउन सहयोग गर्छ । तर नयाँ खेलाडीको जोसले टिममा नयाँ ऊर्जा सञ्चार गर्छ । नयाँ खेलाडीले यो सिरिजबाट आफूलाई प्रमाणित गर्नेमा उनी पनि आशावादी छन् । 

टिममा नयाँ अनुहारसँगै नेपालको ओपनिङ ब्याटिङ गर्ने जोडी को हुन्छ भनेर कुतूहल थपिएको छ । पछिल्लो समय नेपाली टिमको ओपनिङ लाइनअप सम्हाल्दै आएका कप्तान ज्ञानेन्द्र मल्ल ओपनरका निर्विवाद छनोट हुन् । उनलाई कसले साथ दिने भन्ने प्रश्नमा टमाटा भन्छन्, “हामीसँग अहिले ८ नम्बरसम्मै ब्याटिङ गर्ने खेलाडी छन् । ओपनिङ कसले गर्ने भन्ने खासै समस्या छैन । पारस, शरद भेषवाकर, विनोद भण्डारीहरू पनि तल्लो क्रमबाट ब्याटिङ गर्दै माथिल्लो क्रममा आएका हुन् । टिम मिटिङपछि मात्रै ज्ञानेन्द्रको जोडीको नाम आउला ।”

कसले ओपनिङ गर्नेभन्दा पनि टिमको जित महत्त्वपूर्ण हुने बताउँछन्, कप्तान ज्ञानेन्द्र । भन्छन्, “कसले ओपनिङ गर्छ वा को–को जोडी जम्छ भन्दा पनि नेपालले जित्छ कि जित्दैन भन्ने महत्त्वपूर्ण हो । टोलीलाई आवश्यक पर्दा म आफैँ पनि तल्लो क्रममा जानुपर्छ । अहिले नै यो–योले, यसरी–यसरी खेल्छन् भन्नु सान्दर्भिक हुँदैन ।” उनको कूटनीतिक जवाफ छ, “जो–जोले, जहाँ–जहाँबाट वा जुन क्रममा खेले पनि नेपालको जितका लागि खेल्छन् ।” तर अनुभवका आधारमा र टिम संरचना हेर्दा ज्ञानेन्द्र र पारसको जोडीले ओपनिङ गर्ने सम्भावना बढी छ । 

ओमान, अमेरिका र नेपाल सम्मिलित त्रिकोणात्मक सिरिजका लागि कीर्तिपुर मैदानको मुहार फेर्ने काम पनि भएको छ । अन्तर्राष्ट्रिय क्रिकेट काउन्सिलले एक दिवसीय म्याच गर्न केही सर्त र पूर्वाधार निर्माणमा जोड दिएको थियो । सोहीअनुसार तारजालीले बारबेर, बाउन्ड्री निर्माण, प्लेयर्स बक्सको संरचनागत सुधार आदि काम भइसकेको छ । भीआईपी प्यारापिट र पिच मर्मत पनि अन्तिम चरणमा पुगेको छ । क्युटेर मधु तामाङका अनुसार पिच खनेर नयाँ बनाउने काम भइरहेको छ । सोही कामको रेखदेख गर्न आईसीसीले श्रीलंकाली बन्दुला वार्नापुरालाई खटाएको छ । उनकै निर्देशनमा पिचको काम भइरहेको तामाङ सुनाउँछन् ।