म्यान्चेस्टर सिटीलाई च्याम्पियन्स लिगमा प्रतिबन्ध किन ?
म्यान्चेस्टर सिटीलाई आगामी दुई सिजन च्याम्पियन्स लिग खेल्न प्रतिबन्ध
![म्यान्चेस्टर सिटीलाई च्याम्पियन्स लिगमा प्रतिबन्ध किन ? म्यान्चेस्टर सिटीलाई च्याम्पियन्स लिगमा प्रतिबन्ध किन ?](http://nepal-assets-api.ekantipur.com/thumb.php?src=http://nepal-assets-cdn.ekantipur.com/uploads/source/news/2020/sports/mancester-city.jpg&w=900&height=601)
इङ्लिस प्रिमियरसिपको डिफेन्डिङ च्याम्पियन तथा विश्वकै सबैभन्दा धनी फुटबल क्लब मध्येको एक म्यान्चेस्टर सिटीलाई युरोपेली फुटबल महासंघ (युफा) ले आगामी दुई सिजन च्याम्पियन्स लिग खेल्नबाट प्रतिबन्ध लगाएको छ । युफाको आरोप छ- सिटीले युरोपेली फुटबलको आर्थिक नियमावलीको गम्भीर उल्लंघन गरेको छ । साथै उसले क्लबलाई तीन करोड पाउन्ड जरिवाना पनि तिर्न भनेको छ ।
लाइसेन्सिङ प्रक्रिया र आर्थिक सुशासनका पक्षमा क्लबले ध्यान पुर्याउन नसकेको उसको ठहर छ । युफाले आर्थिक नियमावली बनाएपछि कुनै क्लबमाथि गरेको यो नै एक दशकयताकै सबैभन्दा ठूलो कारबाही हो । सिटीले एक सिजन च्याम्पियन्स लिग नखेल्दा १० करोड डलरभन्दा बढी घाटा हुन्छ । यसबाट क्लबले अनुबन्ध गर्ने खेलाडी र प्रशिक्षक पेप ग्वार्डिओलाकै करिअरमा पनि धक्का पर्नसक्छ ।
तर, सिटीले यस वर्षको च्याम्पियन्स लिग खेल्न पाउनेछ । अझैसम्म च्याम्पियन्स लिगको टाइटल उचाल्न नसकेको सिटीले फागुन १४ मा रियाल मड्रिडसँग घरेलु मैदान इत्तेहाद स्टेडियममा राउन्ड अफ १६ को पहिलो लिग खेल्दैछ ।
संयुक्त अरब इमिरेट्सका शासकका भाइ शेख मन्सुर बिन जायद अल नाहएनको आर्थिक सहयोगपछि क्लब संसारकै सबैभन्दा धनी क्लबमा दर्ज भएको थियो । शेख मन्सुरले दुई दशकमा मात्रै अर्बौ डलर क्लबको खेलाडी, प्रशिक्षक, क्लबको भौतिक पूर्वाधारमा खर्च गरिसकेका छन् ।
सन् २००२ मा इङलिस फुटबलको दोस्रो वरियताको लिग खेल्ने क्लबलाई उनैले यो अवस्थासम्म ल्याइ पुर्याएका हुन् । उनको संलग्नतापछि क्लबमा युएईको राज्यनियन्त्रित लगानी भित्रिएको छ जसमा युएईको राष्ट्रिय ध्वजाबाहक विमान इत्तेहाद संलग्न रहेको छ । युफाको आर्थिक नियमावलीले क्लब सञ्चालकका अन्य कम्पनीबाट लगानीको बाटो नछेके पनि त्यसमा मात्रात्मक भिन्नता बढी पाइएको समाचारहरूमा उल्लेख छ ।
सिटीले सन् २०१२ देखि २०१६ को बीचमा क्लबलाई आएको प्रायोजन र लेखा परीक्षणबारे अनुसन्धान गर्न खोज्दा समन्वय नगरेको आरोप लागेको थियो । त्यसबेला सिटीले प्रायोजन गरेभन्दा बढी रकम लेखा परीक्षणमा राखेको आरोप छ । सिटीले प्रायोजन बापतको झुटो रकम देखाएको युफाले जनाएको छ । 'प्रायोजन बापतको रकम खातामा गलत देखाएर सन् २०१२ देखि २०१६ सम्म युईएफएमा बुझाएको देखिएको छ,' युफोको विज्ञप्तिमा उल्लेख छ ।
सिटीले गत सिजनमात्र च्याम्पियन्स लिगबाट ८ करोड ६० लाख पाउन्ड आम्दानी गरेको थियो । दुई वर्ष च्याम्पियन्स लिगमा सहभागी हुन नपाउने भएपछि सिटीले कम्तिमा १७ करोड पाउन्ड रकम गुमाउनेछ ।
युफाको कारबाहीमा परेको सिटी प्रिमियर लिगमा पनि कारबाहीमा पर्ने सम्भावना छ । प्रिमियर लिगमा भने अंक घटाएर कुनै टोलीलाई कारवाही गर्ने प्राबधान छ । यसबारे प्रिमियर लिगले पनि छिट्टै आफ्नो निर्णय सुनाउने छ । योसँगै क्लबमाथि धेरै प्रश्न उठेका छन । यस्तैमा उसले सन् २०१४ मा जितेको प्रिमियर लिगको उपाधि पनि गुमाउनुपर्ने भएको छ ।
युफाको प्रतिबन्धपछि सिटीले आफ्नो आर्थिक व्यवस्थापन पूर्ण रुपमा गर्नुपर्ने भएको छ । यदि उसले अपिल गरेको कोर्ट अफ आर्बिटेसनले पनि उसको प्रतिबन्धलाई कायम राखेमा झन् समस्या हुने भएको छ ।