क्लासिकबाट नम्रता श्रेष्ठले तारिफ त कमाइन् तर फिल्मले पैसा कमाएन । एकै दिन रिलिज भएको प्रेमगीतले उछिन्यो, व्यापार र समीक्षा दुवैमा । त्यसैले दृष्टिविहीनको भूमिकामा जीवन्त अभिनय गरे पनि नम्रता धेरैको आँखामा परिनन् । त्यसअगाडि उनी अभिनीत सोल सिस्टर, ताण्डव र मेघाले दर्शकको मन जितेका थिएनन् । यसरी सफलताको प्यासी बनेकी नम्रताको नयाँ फिल्म होमवर्क रिलिज भयो, ७ जेठमा । यसमा चिरपरिचित को–स्टार आर्यन सिग्देलसँगै देखिएकी थिइन् तर दु:खको कुरा, यसपटक पनि नम्रताको जादू चलेन । निरक पौड्याल निर्देशित यस फिल्मको सुरुआती व्यापारसमेत सुुखद रहेन । बनाउन त यसलाई गोपीकृष्णजस्तो हिट ब्यानरले नै बनाएको हो तर गुदी नभएपछि कसको के लाग्छ ? त्यसैले त निर्माताको लगानी मात्र होइन, नम्रताको करिअर र क्रेजसमेत संकटमा परेको छ ।