यस वर्षको वातावरण पत्रकारिता पुरस्कार नेपाल म्यागजिनका सम्वाददाता यम बमलाई प्रदान गरिने भएको छ । नेपाल वातावरण पत्रकार समूह (नेवापस) ले तीन दशकदेखि विश्व वातावरण दिवस (जून ५) का अवसरमा यो पुरस्कार प्रदान गर्दै आएको छ । पुरस्कारको राशि २५ हजार रुपैयाँ र प्रमाण–पत्र छ ।

सन् २०१९ मा वातावरण र दिगो विकासका विषयमा पत्रपत्रिका, रेडियो, टेलिभिजन तथा अनलाइनमा प्रकाशित–प्रसारित सामग्री र कार्यक्रमहरु मध्येबाट छनोट गरी विषयगत विविधता, तथ्य–तथ्याङ्क, भाषा, जनसरोकार र मौलिकताका आधारमा मूल्याङ्कन गरेर यो पुरस्कार प्रदान गर्ने निर्णय नेपाल वातावरण पत्रकार समूहले जनाएको छ । पत्रकारहरूबाट आवेदन आह्वान गरी छनोट समितिमार्फत् पुरस्कारका लागि बमलाई छानिएको समूहले जनाएको छ ।

समूहका पूर्व अध्यक्ष तथा पत्रकार तीर्थ कोइराला संयोजक, पूर्व महासचिव तथा पत्रकार बद्री पौड्याल र वातावरणविद् बटुकृष्ण उप्रेती रहेको समितिले प्राप्त सामग्रीहरुको मूल्यांकन गरेको थियो ।

ग्रामीण विकासमा स्नातक बम नेपाल साप्ताहिकमा वातावरणसहित आर्थिक-समाजिक मुद्दाहरूमा रिपोर्टिङ गर्छन्

नेपाल वातावरण पत्रकार समूहद्वारा स्थापित यो पुरस्कार पाउने बम ३३ औँ पत्रकार हुन् । पुरस्कार समूहको वार्षिकोत्सवको अवसर पारेर वितरण गरिन्छ ।

पढ्नुस् यम बमका वातावरणीय मुद्दा समेटिएका पछिल्ला रिपोर्टहरूः 

ग्यास च्याम्बर बन्दैछ काठमाडौँ : राजधानीको धुलोमा धातु, झन्डै एक चौथाइ जनताको स्वास्थ्य कसरी छ जोखिममा ? 

२०७६ मंसिरमा माथिको रिपोर्ट नेपाल म्यागजिनको कभर स्टोरी बनेको थियो । मल्टिमिडिया, तथ्यांक, इन्फोग्राफिक, तस्बिरहरू, पोडकास्टसहितको यो प्याकेजले कसरी राजधानी काठमाडौं प्रदूषित बन्दै छ र यहाँको जनजीवन खतरामा छ विस्तृतमा खुलाएको थियो । स्टोरीसँगै छापिएको कभर तस्बिर नेपाल म्यागजिनका फोटो पत्रकार सरोज बैजुले खिचेका हुन् ।

यम बमले कसरी महिनौँ लगाएर यो स्टोरी गरेका थिए भन्ने बारेको नेपाल म्यागजिन पोडकास्ट सुन्नुहोस्ः  

• विपद्पछि मात्रै तात्ने ? राष्ट्रिय विपद् जोखिम न्यूनीकरण तथा व्यवस्थापन प्राधिकरण अझै अनिश्चित 
• जोखिमको पर्खाइ : ३६ सय हिमतालमध्ये ४७ विस्फोटको जोखिममा, छैन अन्तर्देशीय सूचना प्रणाली 
• बस्ती जोगाउने कि वन्यजन्तु ? वन्यजन्तुको वस्ती निर्भरता बढ्दै गएपछि सन्त्रासमा रैथाने समुदाय 
• छैन वातावरणीय न्याय : अदालतले बोलेबाहेकका विषयमा सरकार चुप