गणितज्ञको गहकिलो बायोपिक ( फिल्म समीक्षा : सुपर ३०)
बायोपिक फिल्मको बाढी छ, बलिउडमा । खेलाडी, कलाकार, डन, नेतादेखि ऐतिहासिक पात्रका जीवनकथा पर्दामा अटाउन थालेका छन् । यही शृंखलाको नवीन संस्करण हो, सुपर ३० ।
बायोपिक फिल्मको बाढी छ, बलिउडमा । खेलाडी, कलाकार, डन, नेतादेखि ऐतिहासिक पात्रका जीवनकथा पर्दामा अटाउन थालेका छन् । यही शृंखलाको नवीन संस्करण हो, सुपर ३० । गरिब विद्यार्थीलाई सित्तैमा कोचिङ पढाएर ख्याति कमाएका भारतीय गणितज्ञ आनन्दकुमारको संघर्ष फिल्मको केन्द्रमा छ । निर्देशक हुन्, विकास बहल । आनन्दकुमारको भूमिकामा छन्, ऋतिक रोशन । आम बायोपिकमा जस्तै यसमा पनि मुख्य पात्रको सबलतालाई मात्र चित्रण गरिएको छ । फरक कति भने आनन्दकुमार आफैँमा प्रेरणा–पुञ्ज भएकाले फिल्म हेरिरहँदा उनलाई आत्मसात् गर्न सकिन्छ । त्यसो नहुँदो त गणितजस्तो जटिल विषयका अध्यापकको कथा कसरी सरल र मर्मस्पर्शी हुन्थ्यो ! भलै सहायक पात्र र घटनात्रम सोही अनुपातमा सशक्त लाग्दैनन् ।
बिहारको तल्लो वर्गीय परिवारमा हुर्किएका आनन्दकुमार गणितमा तेज छन् । क्याम्ब्रिज विश्वविद्यालयमा पढ्न पाउने मौका जुर्छ तर पैसा जुटाउन नसक्दा जान पाउँदैनन् । यही झोकमा प्रतिष्ठित इन्डियन इन्स्टिच्युट अफ टेक्नोलोजी (आईआईटी) को प्रवेश परीक्षाका लागि गरिब र आदिवासी विद्यार्थीलाई बिनाशुल्क कोचिङ पढाउन थाल्छन् । तर उनको यो शुभकार्य लाखौँ असुलेर कोचिङ पढाइरहेका ‘माफिया’का लागि सह्य हुन्न । त्यसैले उनीहरू आनन्दकुमार र उनका विद्यार्थीलाई सिध्याउन लागिपर्छन् । एक कर्तव्यनिष्ठ र प्रतिभाशाली शिक्षकले आफ्ना विद्यार्थीको उज्यालो भविष्यका लागि गरेको अथक प्रयासको फेहरिस्त हो, यो फिल्म ।
‘शिक्षामा समान पहुँच’को नारा खुब घन्कने गर्छ । तर वास्तविकताचाहिँ शिक्षामा सम्पत्तिवालाको मात्र पहुँच हुन्छ । जेहेनदार भएपनि निम्न वर्गका विद्यार्थीले स्तरीय विषय र कलेज पढ्न पाउँदैनन् । राज्यप्रणालीले उनीहरूको सपनामै कैँची लगाइदिन्छ । यो विभेद भारतीय समाजमा अझ गहिरो छ । यसकै सिकार हुन्, आनन्दकुमार । र, प्रणालीलाई ध्वस्त पार्न प्रयासरत पनि उनै । यति सानदार पात्रलाई निर्देशक बहल तथा लेखक सञ्जीव दत्तले संवेदनशील शैलीमा प्रस्तुत गरेका छन् । चरित्र स्थापितका लागि खर्चिएका दृश्य भने परम्परागत लाग्छ । कोचिङ सेन्टर खोल्ने क्रममा आनन्दकुमारले भोगेका आन्तरिक र बाह्य द्वन्द्वका दृश्यसँगै फिल्मले पूरापूर ध्यान खिच्छ ।
गणितज्ञको जीवनमार्फत राजनीति र गुन्डागर्दीको आडमा मौलाइरहेको शैक्षिक माफियाकरणमाथि तीखो कटाक्षले सुपर ३०को वजन बढाएको छ । शिक्षालाई धन्दा बनाइरहेका व्यापारी ललन सिंह (आदित्य श्रीवास्तव) र बिहारका शिक्षामन्त्री (पंकज त्रिपाठी)जस्ता पात्र भारतीय मात्र होइन, नेपाली समाजमा पनि छ्यापछ्याप्ती भेटिन्छन् । पैसाकै अभावमा उच्च शिक्षा हासिल गर्न नपाएर तड्पिने विद्यार्थी पनि उत्तिकै छन् हामीकहाँ । त्यसैले सुपर ३० मा अपनत्वबोध हुन्छ । आनन्दकुमारले बर्सेनि पढाउने विद्यार्थीको समूह‘सुपर ३०’ नामले परिचित छ,जसलाई सन् २०१० मा टाइम म्यागजिनले ‘द बेस्ट अफ एसिया’मा सूचीकृत गरेको थियो । यति हो, निर्देशक बहलले आनन्दकुमार र उनको सुपर ३० को मर्ममाथि न्याय गरेका छन् ।
सुरुआतजस्तै मध्यान्तरपछिको २० मिनेट फितलो छ । अस्पतालमा आक्रमण हुँदा विद्यार्थीको प्रतिरोध पत्याउन मुस्किल पर्छ । आनन्दकुमारमाथि एक युवतीले यौन दुर्व्यवहारको आरोप लगाएको दृश्य पनि ‘फेक’ लाग्छ । फिल्ममा आनन्दकुमारले पढाएको भन्दा विरोधी समूहसँग भिडेको र आर्थिक जोहो गर्न खटिएको दृश्य धेरै छन् । उनको लभ अफेयरलाई पनि निर्देशकले खास वास्ता गरेका छैनन् । पत्रकार (अमित साध) को चरित्र अतिरञ्जित छ । तर निर्देशकले जबर्जस्ती ज्ञान लाद्न खोजेका छैनन् । पात्रका भोगाइलाई प्राथमिकता दिएका छन् । आनन्दकुमार र विद्यार्थीको सम्बन्धले दिलखुस हुन्छ । तर विद्यार्थीको चरित्र चित्रणमा चाहिँ कन्जुस्याइँ गरिएको छ । संवाद उत्तिकै चोटिला छन् ।
शारीरिक बनोटले उतिविघ्न साथ नदिए पनि अभिनयकलाको बलमा ऋतिकले आनन्द कुमारको चरित्र जीवन्त बनाएका छन् । यो फिल्मले उनलाई राष्ट्रिय अवार्ड दिलाए अनौठो नमाने हुन्छ । टेलिसिरियलबाट फिल्ममा फड्को मारेकी मृनल ठाकुरको भूमिका छोटो तर रमाइलै छ । पंकज त्रिपाठी अर्का रोचक पात्र हुन् । नकारात्मक भएपनि उनको बोलीचाली, हुलिया र चालढालले दर्शकको मन जित्छ । विद्यार्थीको कास्टिङमा मिहिनेत गरिएको छ । पार्श्वध्वनिले फिल्मलाई विशिष्ट बनाउन कुन हदसम्म भूमिका खेल्नसक्छ भन्ने उदाहरण बन्न सक्छ, फिल्म । प्रशंसाका हकदार हुन्, अजय–अतुल । उनीहरूले नै कम्पोज गरेका गीत कथावाचनका अभिन्न हिस्सा हुन् । शानदारबाट निराश बनाएका विकास बहल सुपर ३० बाट पुरानै लयमा फर्किएका छन् ।
ऋतिक रोशनका फ्यान मात्र होइन, संघर्षबाट सपना पूरा गर्न मरिमेट्ने जोकोहीलाई सुपर ३० प्रिय लाग्छ । फिल्म हेरेपछि अरू केही नभएपनि आनन्दकुमारप्रति सम्मानभाव पैदा हुन्छ, मनबाटै ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...