कंगना–राजकुमारको शान (फिल्म समीक्षा : जजमेन्टल हे क्या)
जीवन्त अभिनयबाट परिचित छन्, कंगना रनावत र राजकुमार राव । फिल्म र चरित्र छनोटमा पनि उत्तिकै चलाख ।
जीवन्त अभिनयबाट परिचित छन्, कंगना रनावत र राजकुमार राव । फिल्म र चरित्र छनोटमा पनि उत्तिकै चलाख । यो जोडीको क्वीनले हिरोकै दबदबा भएको फिल्म मात्र हिट हुन्छ भन्ने बलिउडको स्थापित मान्यतालाई भत्काएको थियो । त्यसैले पनि उनीहरुको नयाँ फिल्म जजमेन्टल हे क्याप्रति धेरै अपेक्षा थियो । तर निराश हुनुनपर्ने भएको छ । कंगना र राजकुमारको सशक्त अभिनयसँगै रसिलो प्रस्तुतीकरणले साइको–ब्ल्याक कमेडी जनराको यस फिल्मलाई अब्बल बनाएको छ । कनिका ढिल्लोनको चुस्त र कसिलो पटकथालाई निर्देशक प्रकाश कोवेलमुदीले न्याय गरेका छन् । मानसिक समस्याबाट पीडित पात्रमार्फत समाजमा विद्यमान अनेक विभेद र हिंसालाई पहिल्याउन खोजिएको छ ।
डबिङ आर्टिस्ट बोब्बी (कंगना) मानसिक रोगबाट ग्रस्त छिन् । उनलाई साँचो कुरा पनि झुट लाग्छ, झुट पनि सत्य । सन्काहा र रिसाहा छिन् । कसैप्रति विश्वास छैन । जुन पात्रको डबिङ गर्यो, वास्तविक जीवनमा पनि आफूलाई त्यस्तै बनाउन खोज्छिन् । उनको घरमा पत्नीसँगै बस्न आइपुग्छन्, केशव (राजकुमार) । पत्नीलाई उनी निकै माया गर्छन् । बिस्तारै बोब्बी केशवप्रति आकर्षित हुन्छिन् । तर उनलाई केशवको आनीबानीमा शंका लाग्न थाल्छ । त्यहीबेला केशवकी पत्नीको मृत्यु हुन्छ । त्यसपछि बोब्बीले गर्ने अनेक हर्कतमा केन्द्रित छ, फिल्म । साँच्चि केशवको वास्तविकताचाहिँ के होला ? क्लाइमेक्समा ट्वीस्ट छ ।
जजमेन्टल हे क्या विशेष हुनुको एउटा कारण हो, यसले बलिउडको मसलेदार सूत्रलाई पूरै नजरअन्दाज गरेको छ । पात्रको चरित्रचित्रण र घटनाक्रम स्वच्छन्द लाग्छ । त्यसैले सुरुआतबाटै नयाँपनको आभास हुन्छ तर पटकथाकार कनिकाले हाम्रो सामाजिक यथार्थकै जगमा कथाउठान गरेकी छन् । त्यो हो, घरेलु हिंसा । सानो छँदा बोब्बीले बारम्बार आफ्नी आमामाथि कुटपिट देख्नुपर्छ । यही कारण उनले आमा मात्र होइन, बुबा पनि गुमाउनुपर्छ । यसले उनको बालमनोविज्ञानमा परेको असरलाई निकै संवेदनशील ढंगबाट देखाउन खोजिएको छ । हरेक दृश्यमा समाजका अध्याँरा पाटामाथि कटाक्ष फिल्मको सुन्दर पक्ष हो ।
बोब्बीको चरित्र स्थापित गर्न यथेष्ट दृश्य खर्चिएको छ । सुरुआतमा उनका हर्कतले रिस पैदा गर्छ तर पीडादायक विगतको पर्दा खुल्दै गएपछि प्रिय लाग्नथाल्छ । वरपरका प्रायः पुरुषले उनीसँग स्वार्थप्रेरित सम्बन्ध राखेका छन् । त्यसले उनलाई थप अस्थिर र अविश्वासी बनाउन भूमिका खेल्छ । केशवको प्रवेशपछि अझ रोचकता थपिन्छ । पत्नीको अगाडि औधी सोझा र मायालु केशवको वास्तविक रुप भिन्नै हुन्छ । यही तथ्य भेउ पाएपछि बोब्बीले शंकालु नजरले हेर्न थाल्छिन् । कथासँगै उनको शंकाको ग्राफ बढ्दै जान्छ । निर्देशक र पटकथाकारले त्यही रहस्यलाई केन्द्रमा राखेका छन् । केशव र बोब्बीको नोकझोकलाई प्रधानता दिइएको छ ।
मध्यान्तरपछि मुख्य दुवै पात्र अलग्गै दुनियाँमा पुग्छन् । दर्शकलाई कथाको लय बिथोलिएको भान हुन्छ तर फेरि पुरानै घटनाक्रममा अनेक ट्वीस्ट थपिन्छन् । यद्यपि बोब्बी र केशवको पुनर्मिलन विश्वसनीय लाग्दैन । बोब्बीको चरित्र चिनाउने चक्कर मध्यान्तरपछि पनि रोकिन्न । तर केशवमा सस्पेन्सको लेप गाढा बनाएसँगै फिल्मले ध्यान खिच्न थाल्छ । पागलपनको सिकार भएका बिरामी कुन हदसम्म पुग्छन् भन्ने प्रस्ट पारिएको छ । मनोविज्ञहरु भन्छन्, कुनै व्यक्ति त्यत्तिकै अपराधी/हिंस्रक हुँदैन, त्यसमा पृष्ठभूमिको भूमिका हुन्छ । यही मान्यताका प्रतिनिधि हुन्, केशव र बोब्बी ।
बलिउडले ब्याकग्राउन्ड म्युजिकमा फड्को मारेको छ । यस फिल्म ताजा नमुना हो । दृश्यमजबुत बनाएर दर्शकलाई बाँध्न संगीतले प्रभावकारी भूमिका खेलेको छ । खिचाइ, सम्पादनजस्ता प्राविधिक पक्ष बुलन्द लाग्छ । कंगनाले आफ्नो विशिष्ट अभिनयकलालाई निरन्तरता दिएकी छन् । हरेक दृश्यलाई स्वाभाविक बनाउन सक्दो मिहिनेत गरेकी छन् । बलिउडमा उनीजस्तो अभिनयशिल्प भएका कलाकारको साँच्चै खडेरी छ ।
हिरोको परम्परागत संरचनाभित्र नअटाउने राजकुमार बलिउडमा किन यतिविघ्न व्यस्त र प्रतिष्ठित हुँदैछन् भन्ने उदारहण हो, जजमेन्टल हे क्या । द्वैधचरित्रको पात्रमा उनले आफूलाई पूरापूर ढालेका छन् । चरित्रनिर्माणमा त यी दुवै पोख्त भइहाले । कनिका ढिल्लोन भारतकी उदीयमान पटकथाकार हुन् । उनको लेखनकला केदारनाथ र मनमर्जियाभन्दा खारिएको छ । दक्षिण भारतीय फिल्म निर्देशन गर्दै आएका प्रकाशले यस सिनेमाबाट बलिउडमा दमदार ‘इन्ट्री गरेका छन् ।
कंगना र राजकुमारका फ्यान मात्र होइन्, जोकोहीले जजमेन्टल हे क्या हेर्दा समय र पैसा खर्चिएकामा पछुताउनु पर्दैन । पात्रजस्तै दर्शकलाई पनि एकहदसम्म पागलपनमा पुर्याउँछ ।
सम्बन्धित
पर्फ्युममा सुँघ्ने क्षमतासँगै अस्तित्वको खोजी र ग्रनोई अवचेतन रूपमै मृत्युको नजिक रहेको दे...
सिनेमामा गन्धको प्रस्तुति
गरिरहेका काम जहाँको तहीँ थाती राखेर क्वारेन्टाइन पसेका रंगकर्मीको उकुसमुकुस ...
नाटकघरमा उज्यालो फर्केला ?
अमेरिकन आइडल–२०२० को उपाधि चुम्न आतुर नेपाली ठिटो...
'भाषा हटाइदिनुस्, भावना उस्तै हुन्छ'
बलिउडमा स्थापित भन्दा फरक पृष्ठभूमिबाट सिनेक्षेत्रमा प्रवेश गरेका इरफानको संघर्ष आफैंमा एउ...
इरफानको शक्तिशाली समय
लकडाउनमा सेलिब्रिटी दैनिकीः पारिवारिक पुनर्मिलन, सिर्जनात्मक रचनादेखि जनचेतनाका आवाजसम्म...
सेलिब्रिटीका लकडाउन सिर्जना
च्याम्पियनका अन्य प्रतिस्पर्धीले कन्टेन्टका लागि माथापच्ची गरिरहादा हिमेश भने तु लेखिसक्थे...